Daražeńki Baćka Stalin!
Daražeńki Baćka Stalin! Ja dziaŭčynka 10-hadovaja Irena Alaksandraŭna Hapanionak. Ja chadžu ŭ škołu ŭ 3-ju klasu. Siońnia 8 listapada 1940 h. – vialikaje śviata, jakoje pryniesła dla ŭsiaho savieckaha naroda niečuvanaje ščaście. Siońnia ŭ našaj škole a 10-j ranicy była impreza dla dziaciej. I ja tam deklamavała vieršyk: «Słava!» I kali raspaviadała, rukami* hladzieła na tvoj partret i hučna moviła: «Leninu słava! Stalinu słavu!» I bačyła ja, jak usie zaŭśmichalisia ź vialikaj radaściu, hledziačy na tvoj partret. Viarnuŭšysia dachaty, uziała papieru i piora, i, praciahvajučy da tvajho partretu svaju maleniečkuju ruku, prašu ciabie, nie admaŭlaj mnie ŭ vialikaj prośbie, viarni mnie majho tatulečku, Alaksandra Francaviča Hapanionka, jaki byŭ aryštavany 15 vieraśnia 1940 h. Aryštavała jaho miascovaja milicyja Vialejskaj vobłaści, Duniłavickaha rajonu, vioski Hliniščy. Rodny baćka Stalin, kali nas vysłali ź Vialejskaj vobłaści i my jechali ŭ ciahniku, ja ŭvieś čas piajała pieśni tvaje, stalinskija, pol-skija fašysty mianie abzyvali maleńkuju za heta, maciukali, i abzyvali mianie za heta kamunistkaj. Ale hetaje słova było dla mianie vialikaj słavaj. I heta słova zastałosia vialikaj radaściu. Rodny baćka Stalin. Dni i hadziny budu ad ciabie čakać adkazu. Ja, maleńkaja pijanierka, piaju tvaje pieśni i z hetaj viasiołaj uśmieškaj dačakajusia tvajho lista, ź jakim budu iści pravilnaj darohaj da svajho tatulečki Alaksandra Francaviča Hapanionka, addam tvoj list jamu ŭ ruki… Rodny baćka Stalin, prašu mocna, addaj nam našaha tatačku. Čakaju jak chutčejšaha adkazu, serca majo padskokvaje ad radaści, što baćka Stalin daść adkaz, ja budu pierakananaja, tvaja Stalina dačka, Ira Alaksandraŭna Hapanionak, mnie 10 hod. Moj adras: Paŭładarskaja vobłaść, Bieskarahajski rajon, siało Siemijask.
Paślasłoŭje
Paśla prychodu savietaŭ u vieraśni 1939 h. adrazu pačalisia aryšty. Jak śviedčyć kniha Natalli Ivanovaj i Uładzimiera Adamuški pra represavanych u Vialejskaj vobłaści «Źlitujciesia», pavodle jakoj cytujecca hety list, u Pastaŭskim paviecie była raskrytaja kontrarevalucyjnaja arhanizacyja (OZON) u składzie 14 čałaviek. Siarod siabroŭ arhanizacyi byŭ i Alaksandar Hapanionak. Čym zajmałasia, zhodna z sudovym zaklučeńniem, hetaja hrupa?
1. Pravodziła aktyŭnuju prapahandu i ahitacyju, nakiravanuju na ŭmacavańnie ŭ byłoj Pol-ščy nacyjanał-fašyzmu.
2. Pad čas vybaraŭ ŭ były polski parlament i miascovyja orhany ŭłady ŭ 1938 h., delehatami byli abranyja tyja, jakija byli pažadanyja kiraŭničym kołam Pol-ščy i kiraŭnikam arhanizacyi.
3. Viała aktyŭnuju antysavieckuju prapahandu i paklop na SSSR.
4. Umacoŭvała katalicki kaścioł i pravodziła apalačvańnie nacyjanalnych mienšaściaŭ…
Bolšaść siabroŭ arhanizacyi, siarod ich i baćka dziaŭčynki Alaksandar Hapanionak, atrymali pa vosiem hadoŭ lahieraŭ, ichnyja siemji vysłali ŭ Kazachstan, tam apynułasia i dačka Alaksandra Hapanionka Irena. Hetaja maleńkaja dziaŭčynka ščyra vieryła, što baćku možna viarnuć…
A.H.
* Tak u tekście
