Z usioj krainy
Zapłacicie za pikiet
Asipovickija demakraty źbiralisia pravieści pikiet, prymierkavany da Ŭsiebiełaruskaha Źjezdu za Niezaležnaść. Chacieli vykazacca ŭ padtrymku hałoŭnaj idei Źjezdu. U adkaz ułady prapanavali arhanizataram pikietu apłacić toje, što tamtejšyja čynoŭniki nazvali «pasłuhami»: milicyi, sanitarnaj słužby, medykaŭ. A pakolki asipovickija demakraty, naturalna, nie svajaki Rotšyldu i raźličvali ŭsiaho tolki na harantavanaje im Kanstytucyjaj prava pikietavać, dyk płacić uładam admovilisia. A im admovili ŭ pikiecie. Arhanizatary źbirajucca abskardzić admovu ŭ sudzie.
Symon Hłazštejn
Dzie nia chodziać pa hryby
Słužba radyjacyjnaha kantrolu Mahiloŭskaha abłasnoha vytvorčaha lesahaspadarčaha abjadnańnia raspaŭsiudziła infarmacyju pra niebiaśpiečnyja miescy zboru hryboŭ i jahad na terytoryi Mahiloŭščyny, piša BiełaPAN.
Naprykład, u Savinickim laśnictvie Kaściukovickaha lashasu ŭ lisičkach i syraježkach utrymańnie radyjanuklidaŭ pieravyšaje dapuščalnyja normy ŭ 18 razoŭ, u rajonie vioski Vołkavičy Mahiloŭskaha lashasu — u 20 razoŭ. Jość šmatrazovaje pieravyšeńnie normaŭ zabrudžvańnia hryboŭ na terytoryi Kaściukovickaha, Druckaha i Kličaŭskaha lashasaŭ. Zaražeńnie radyjacyjaj čarnic u Savinickim laśnictvie pieravyšaje normy ŭ 64 razy, u Pańkaŭskim Kaściukovickaha lashasu — u 20 razoŭ. 2-4-razovaje pieravyšeńnie ŭ lasnych jahadach zafiksavanaje ŭ laśnictvach Białynickaha i Mahiloŭskaha lashasaŭ. Zbor jahad i hryboŭ na terytoryi Krasnapolskaha, Čerykaŭskaha i Słaŭharadzkaha rajonaŭ naohuł zabaronieny.
Budzie novy młyn
Jak raniej pisała «NN», 19 krasavika ŭ litaraturna-etnahrafičnym muzei, što mieścicca ŭ v. Rusiny pad Baranavičami, byŭ spaleny młyn.
Dyrektar muzeju Michaił Biernat nie pakładajučy ruk pracuje, kab adnavić i pašyryć ekspazycyju. Dniami jon zdoleŭ znajści młyn, jaki, mahčyma, zamienić spaleny. Amal struchnieły młyn mieścicca kala vioski Harbačy Lachavickaha rajonu. Ź jaho planujuć źniać niekatoryja detali (nakštałt machavika, pavarotu), astatniaje ŭsio budzie rabicca nanoŭ, z novych došak.
Ale nikomu raniej nie patrebny młyn siońnia raptam zacikaviŭ mnohich. Staršynia kałhasu, na terytoryi jakoha mieścicca histaryčnaja pabudova, zapatrabavaŭ abmien. Za niekalki detalaŭ młynu jon žadaje atrymać miakki kutok u kantoru. Takaja mebla kaštuje prykłada $350. Heta vialikija hrošy dla muzeju. Ale jość nadzieja, što dapamoža harvykankam.
Darečy, jak pryznaŭsia spadar Michaił, nichto nie adhuknuŭsia na zaklik u «Našaj Nivie» ab hrašovaj dapamozie , adnak jon padziakavaŭ za ŭvahu j maralnuju padtrymku.
Rusłan Raviaka
Rychtujcie pašparty, pasažyry
Biełaruskaja čyhunka z 1 žniŭnia ŭvodzić imiannyja kvitki. Ciapier treba budzie pakazvać u kasie svoj pašpart, kab nabyć kvitok u lubuju z krainaŭ SNH i Bałtyi. Raniej padobnaje praktykavałasia ŭ dačynieńni da ciahnikoŭ u Rasieju. Rašeńnie pryniataje, kab paźbiehnuć spekulacyi z kvitkami. Pry hetym čyhunačniki spasyłajucca na padobnuju praktyku ŭ Rasiei i Ŭkrainie. Ale varta adznačyć, što ŭ kijeŭskich i maskoŭskich vakzałach kolkaść spekulantaŭ takoj mieraju nie pamienšyłasia. Jak i raniej, jany špacyrujuć pobač z čerhami i prapanujuć svaje «pasłuhi». Vidavočna, što deficyt pieraadolvajecca nie zabaronami, a pavieličeńniem prapanovy. Pakul nie chapaje rejsaŭ i ciahnikoŭ, budzie kvitnieć słavuty «błat».
S.H.
Pomnik Pieršaj Respublicy
U Miensku na Maskoŭskich mohiłkach adkryli pomnik Hienadziu Karpienku. Adbyłosia heta 27 lipienia, na były Dzień Niezaležnaści, u prysutnaści sotni čałaviek. Biełaruskaja kiraŭničaja elita, jakuju ŭvasablaŭ Karpienka, biełarusizavałasia, ale tak i nie źbiełarusiłasia darešty. Jana sprabavała pahadzić niesumiaščalnyja vartaści i ideały, movy i symboliki, papulizm i liberalizm... U niezaležnaj Biełarusi palityčnaja platforma i evalucyja Hienadzia Karpienki stanuć abjektam daśledavańnia. Ciapier ža ŭsio spraščajecca da schiemaŭ «za»—»suprać», «ułada»—»apazycyja». Ścipły pomnik lideru Partyi Narodnaj Zhody — heta pomnik biezabličnaj eposie, jakuju niekali, mahčyma, nazavuć Pieršaj Respublikaj.
«Baćkaŭščynu» pačyścili
U noč z 23 na 24 lipienia była abrabavanaja siadziba Mižnarodnaha hramadzkaha abjadnańnia «Zhurtavańnie biełarusaŭ śvietu «Baćkaŭščyna». Nieviadomyja złačyncy ŭzłamali zamki, skrali systemny blok kamputaru z bazaj źviestak pra dziejnaść «Baćkaŭščyny» za 10 hadoŭ, a taksama infarmacyjaj ab suśvietnaj biełaruskaj dyjaspary (adrasy, telefony). Skradzieny taksama novy lazerny prynter i telefaks «Panasonic». Cikava, što złačyncam nie spatrebiŭsia kseraks, manitor ad kamputara z klavijaturaj, pišučaja mašynka. Rabaŭnikoŭ taksama nie zacikaviŭ sejf arhanizacyi.
Takim čynam, napiaredadni 10-hodździa z dnia zasnavańnia MHA «ZBS «Baćkaŭščyna» i praviadzieńnia zaplanavanaha 3-ha Mižnarodnaha Kanhresu biełarusistaŭ «Biełaruskaja dyjaspara jak pasiarednica dyjalohu cyvilizacyjaŭ» arhanizacyja pazbaŭlenaja mahčymaści narmalna pracavać.
Radzim Harecki
