Novyja knihi, dasłanyja ŭ redakcyju
A.Lićvin. Akupacyja Biełarusi (1941—44): pytańni supracivu j kalabaracyi. — Miensk: «Biełaruski knihazbor», 2000. — 288 s. — Nakład 300 as. ISBN 985-6318-87-4
Viadomy daślednik historyi Biełarusi peryjadu druhoje suśvietnaje vajny A.Lićvin sabraŭ pad adnoj vokładkaj svaje publikacyi, što pabačyli śviet za apošniuju čvertku stahodździa j pryśviečanyja pytańniam supracivu akupacyjnamu režymu j supracoŭnictvu ź niemcami na abšary Hieneralnaha kamisaryjatu Biełarusi ŭ 1941—44 hady. Kniha ŭžo spatkała šmat narakańniaŭ z boku niekatorych veteranskich arhanizacyjaŭ za niezaležny pohlad aŭtara na padziei apošniaje vajny.
Arche-Skaryna: Analityka. Eseistyka. Krytyka. Recenzii. № 4 (9), 2000. — Miensk, 2000. — 80 s. — Nakład 1100 as.
Siarod najcikaviejšych tekstaŭ druhoha sioletniaha vypusku časapisu «Arche-Skaryna»: Valerki Bułhakava «Deklasavanaja elita» dy Ŭładzimiera Roŭdy «Rasieja j svaboda». Najtańniej «Arche-Skarynu» možna prydbać u siadzibie BNF — za 250 rubloŭ, u inšych miescach — trochi daražej.
Belarussische Erzahlungen — Biełaruskija apaviadańni / Układańnie j pradmova Ŭ.Sakałoŭskaha; Pierakład ź biełaruskaje movy H.Herbat, A.Randaŭ dy inš. — Miensk: «Biellitfond», 2000. — 256 s. — Nakład 1000 as. ISBN 985-6376-07-5
Kniha ŭłučaje pa adnym tvory ŭ biełaruskaj dy niamieckaj movach najvydatniejšych biełaruskich piśmieńnikaŭ XX st.: Jadvihina Š., Ciotki, Jakuba Kołasa, Źmitraka Biaduli, Maksima Bahdanoviča, Maksima Hareckaha, Kuźmy Čornaha, Maksima Zareckaha, Janki Bryla, Ivana Šamiakina, Ivana Mieleža, Vasila Bykava, Uładzimiera Karatkieviča, Ivana Čyhrynava, Alesia Rybaka dy Volhi Ipatavaj. Hety zbornik budzie karysny vykładnikam niamieckaje movy.
Biełaruskija piśmieńniki Polščy. Druhaja pałova XX stahodździa / Układalnik Ja.Čykvin; Pradmova Ŭ.Konana. — Miensk: «Biełaruski knihazbor», 2000. — 576 s., ił. — Nakład 2000 as. ISBN 985-6318-80-7
Hetaja kniha vyjšła pad vokładkaju seryi «Biełaruski knihazbor», i ŭłučaje 18 bijahrafijaŭ dy ŭzoraŭ tvorčaści biełaruskich paetaŭ i prazaikaŭ Polščy (pieravažna Biełastoččyny).
M.Rusak. Lavonava dola: uspaminy pra majho baćku Stanisłava Stankieviča. — Vilnia: Vydaviectva biełarusaŭ Litvy «Ruń», 2000. — 106 s., ił. — Nakład 500 as.
Mirasłava Rusak uspaminaje pra svajho baćku Stanisłava Stankieviča — vilenskaha hramadzkaha dziejača j knižnika mižvajennaje pary.
Janka Kupała i Adam Mickievič. Z Kupałaŭskich miaścin: Zbornik / Pad redakcyjaj Ž.Dapkiunas i V.Rahojšy. — Miensk: «Biełaruski knihazbor», 2000. — 160 s. — Nakład 400 as. ISBN 985-6318-82-3
Zbornik składzieny na padstavie spavieščańniaŭ IV Mižnarodnych Kupałaŭskich čytańniaŭ (Miensk, 9 vieraśnia 1998 h.), dzie asensoŭvajucca suviazi Janki Kupały z asobaj i tvorčaściaj Adama Mickieviča. Druhaja častka zbornika — matarjały II Mižnarodnych Rakaŭskich čytańniaŭ «Rakaŭskija Paŭnočnyja Ateny: Marjan Ździachoŭski, Eliza Ažeška j prablemy kulturnaha kantaktu narodaŭ Centralnaj i Ŭschodniaj Eŭropy» (Rakaŭ, 10 vieraśnia 1999 h.). U «Dadatku» źmieščanyja pierakłady tvoraŭ Adama Mickieviča, zroblenyja Jankam Kupałam, a taksama paetaŭ vystup z nahody 85-hodździa z dnia śmierci pieśniara Navahradčyny.
H.Davydova. Ot Minska do Ła-Manša, ili Dorohami Chołokosta: Dokumientalnaja poviesť. — Vydaviectva «Čatyry čvertki», 2000. — 232 s., ił. — Nakład 500 as. ISBN 985-6089-58-1
Heta kniha-pamiać serca adnej z šmatlikich achviar hienacydu suprać žydoŭ času druhoje suśvietnaje vajny — dziaŭčynki, jakaja, kab vyžyć, pravandravała darohami Hałakostu ad Miensku da La-Manšu.
Ł.Levšun. Očierki istorii sriednieviekovoj vostočnosłavianskoj knižnosti: Evolucija tvorčieskich mietodov. — Miensk: Eŭrapiejski humanitarny ŭniversytet, 2000. — 270 s. — Nakład 300 as. ISBN 985-6614-05-8
Aŭtarka pa-novamu razhladaje historyju knižnaści ziemlaŭ Uschodniaj Eŭropy epochi siaredniaviečča. Zamiest terminu «staražytnaruskaja litaratura» jana prapanuje inakšy, «bolš prastoravy j važki», — «uschodniesłavianskaja siaredniaviečnaja knižnaść». U asobny raździeł u knizie vyłučanaja historyja knižnaści Vialikaha kniastva Litoŭskaha XVI—XVII st.
Ahlad padrychtavaŭ Viktar Muchin
