Pryvidy Hoi (Goya's Ghosts)
Hišpanija, 2006, kalarovy, 114 chv.
Režyser: Miłaš Forman
Roli vykonvajuć: Chaŭjer Bardem, Natali Portman, Stełan Skarshard, Rendzi Kuejd, Błanka Partyljo, Majkł Łonsdejł, Chase Łuis Homies, Mabel Ryvera
Žanr: Historyčnaja drama z elementami bijahrafii
Adznaka: 8 (z 10)
1792 hod. Hoja (Stełan Skarshard) maluje pryhožuju dziaŭčynu Ines (Natali Portmen), jakaja nieŭzabavie traplaje ŭ turmu inkvizycyi, jak patajemnaja iudziejka. Inkvizytar Larenca (Chaŭjer Bardem), jašče adzin klijent mastaka, abiacaje dapamahčy Hoi – i spakušaje dziaŭčynu. Ichniaja dačka staniecca prastytutkaj.
A kali paśla vyhnańnia napaleonaŭskich vojskaŭ Larenca pakarajuć śmierciu, jak kalabaranta j hieretyka, za jahonym ciełam budzie iści zvarjaciełaja Ines i ahłuchły Hoja…
Ašałamlalny sacyjalny hratesk Miłaša Formana, dzie bijahrafija Hoi – tolki nahoda dla histaryčnych kašmaraŭ i zalimitnaj bulvarnaj meladramy.
Hoja – reparter, medyjum, pasiarednik.
Jahonyja pryvidy na afortach nie adlustroŭvajuć žyćcio, a stanoviacca im.
I što tut moža Hoja zrabić? Zdani historyi skałynajuć pavietra: hierylja, inkvizycyja, akupanty – i niaščasny tvar muzy.
Miłaš Forman pakazvaje maleńkaha čałavieka, na jakoha vyźvieryłasia epocha. Čałaviek moža być karaleŭskim žyvapiscam – ci dziciom bahataha kupca. Jon ahient Śviatoje pałaty, jaki stanovicca zmaharom za “Svabodu, roŭnaść, braterstva” – ci biskup, na jakoha načapili kajdanki. Złučvo charastva j zvyrodstva, hodnaści j podłaści, mužnaści j prystasavanstva, žorstkaści j sentymentalnaści.
Ci nie takoje žyćcio na złomie?
Chaŭjer Bardem demanstruje nadzvyčajnyja zdolnaści pieraŭvasableńnia, Natali Portman hraje adnačasova dźvie roli – źniaviečanaj pryhažuni j jejnaj dački-prastytutki; Miłaš Forman pałochaje i ździŭlaje.
Da vas pryjšli pryvidy Hoi.
Seansy ŭ kinateatry “Pieramoha” 14-17 červienia a 18.30.
