Jury Śvirko
Kalidor padślednaha-2
U zatrymańni dziaržaŭnaha sakratara Baradzina ŭ ńju-jorskim aeraporcie «JFK» jość pazytyŭny dy nehatyŭny aspekty.
Pazytyŭny — najpierš dla biudžetu hetak zvanaje sajuznaje dziaržavy dy adpaviedna jejnych padatkapłatnikaŭ. Paŭłu Baradzinu nia tre budzie apłočvać sutačnyja, reprezentatyŭnyja, hatelnyja, restarannyja dy inšyja vydatki ŭ niatannym Ńju-Jorku. Rasiejska-biełaruskija chaŭruśniki pakul patracilisia tolki na avijakvitki dla jaho. Hałoŭnaje ž — znachodžańnie sp.Baradzina ŭ amerykanskaj turmie peŭnym čynam pieraškadžaje realizacyi jahonych vielizarnych planaŭ, pra jakija «NN» raspaviadała čytačam u artykule «Kalidor padślednaha». Usie hetyja tranzytnyja transpartnyja kalidory praź Biełaruś, budaŭnictvy sajuznych parlamenckich centraŭ dy inšyja pražekty kramloŭskaha letucieńnika prynamsi zamarožanyja, kali nia spynienyja nazaŭždy.
Nehatyŭny aspekt ja baču ŭ tym, što sajuznyja čynoŭniki nie čytajuć biełaruskaj niezaležnaj presy. «Kalidor padślednaha-1» byŭ nadrukavany niadaŭna niby admysłova dla Paŭła Baradzina. A ŭ lipieni 2000 h. interviju z hieneralnym prakuroram Ženevy Bernaram Bertusa apublikavali «Narodnaja vola» dy «BDH».
Hienprakuroru Ženevy było zadadzienaje hetkaje pytańnie: «Kali raptam sp.Baradzin pajedzie ŭ Zachodniuju Eŭropu - naprykład, pradstaŭlać rasiejska-biełaruskuju sajuznuju dziaržavu na niejkim forumie, - ci budzie jon aryštavany?»
B. Bertusa daŭ nastupny adkaz:
«Order na aryšt moža dziejničać tolki na terytoryi Švajcaryi, a moža i va ŭsioj Eŭropie, i va ŭsim śviecie. Kali sudździa vydaje taki order, jon nie raskryvaje jahonaha typu», - zajaviŭ sp.Bertusa.
Ženeŭski prakuror na majo «eŭrapiejskaje» pytańnie niezdarma adkazaŭ uva ŭsiaśvietnych maštabach.
A na pytańnie, ci ŭličvali ženeŭskija prakurory ciapierašni status P.Baradzina jak mižnarodnaha rasiejska-biełaruskaha čynoŭnika, Bernar Bertusa adkazaŭ: «Mianie heta nie chvaluje. Jon nia maje tut nijakaha imunitetu. Heta mieła b značeńnie, kab jon mieŭ taki imunitet u Švajcaryi, ale tut inšy vypadak».
Škada, što dziaržsakratar Baradzin, jak i jahonyja pamahatyja, nie čytajuć maich publikacyjaŭ. Ale ž jahony načalnik, što nakiravaŭ jaho ŭ niaŭdałuju kamandziroŭku, ich napeŭna čytaje!
A ja ž chacieŭ, jak lepš. Za ŭłasnyja hrošy letaś źjeździŭ u Švajcaryju, kab vyśvietlić tuju akaličnaść, jakaja ciapier zacikaviła ŭsich. Pryznajusia, što sprava Baradzina była prosta nahodaju, kab atrymać švajcarskuju vizu dy pavandravać hetaj krainaju. Kali ŭ pačatku traŭnia mianie nie puścili z Aŭstryi ŭ Lichtenštajn, jaki maje supolnuju vizavuju prastoru sa Švajcaryjaj, dy jašče pastavili admoŭny štamp u pašpart, ja vielmi razzłavaŭsia i z dapamohaj niekalkich faksaŭ dy listoŭ damohsia vizy dla pajezdki ŭ Ženevu. Jašče nidzie j nikoli mianie nie abšukvali tak pilna, jak na toj samaj lichtenštajnskaj mytni ŭ druhi raz - u červieni. Rasiejskaja ž mafija jedzie! Ale ŭciamiŭšy ŭrešcie, što mafijozi z rasiejskim pašpartam nia moža jechać z adpaviednym listom naŭprost da hienprakurora Ženevy, mianie prapuścili... Za try dni, što ja pravioŭ u Ženevie, ja ledź nie sustreŭsia tam ź biełaruskim premjeram Jarmošynym, jaki raspaviadaŭ niejkamu niedarečnamu samitu pra palepšany dabrabyt žycharoŭ svajoj dziaržavy, papiŭ, jak Siamion Bukčyn, kavy z Andrejem Sańnikavym na bierazie Ženeŭskaha voziera dy amal sutki ŭhavorvaŭ prakurora kantonu Bertusa dać mnie interviju.
Adnak samaje hałoŭnaje ja daviedaŭsia ŭ švajcarskaj stalicy Bernie. U federalnym departamencie justycyi j palicyi mnie skazali, što nijak nia mohuć upłyvać na kantanalnuju prakuraturu dy navat nia viedajuć, što tam robicca. Čamu ciapier aficyjnaja Maskva ładzić niejkija demaršy švajcarskim uładam, ciažka zrazumieć. Kali mnie chapiła hadziny znachodžańnia ŭ bernskim Bundeshaŭsie, kab daviedacca ŭsio patrebnaje pra jurydyčnuju systemu Švajcaryi, što ž miesiacami j hadami robiać u Bernie dyplamaty dźviuch sajuznych dziaržavaŭ?
Pierad tym, jak sklikać naradu ź siłavikami j davać svajmu pamočniku Ŭładzimieru Makieju daručeńnie adkamentavać «Intierfaksu-Zapadu» aryšt Baradzina, Alaksandar Łukašenka moh by patelefanavać Makiejevamu papiaredniku Ŭładzimieru Karalovu, jakoha jon letaś pryznačyŭ pasłom Biełarusi ŭ Švajcaryi.
Bo vielmi ž pa-durnomu atrymałasia: u čaćvier spadar Łukašenka zajaŭlaje, što Baradzin mieŭ dyplamatyčnuju niedatykalnaść (i adpaviedny pašpart), a ŭ piatnicu teleMialeška jaho abviarhaje dy kaža, što dziaržsakratara padstavili svaje ž čynoŭniki, jakija nie zrabili jamu vizy ŭ dyplamatyčny pašpart. Chacia toj ža Jaŭhien Mialeška razam sa svaim ciozkam-«pravaachoŭcam» (termin Śviatłany Dabryjanik) Novikavym słušna zaŭvažyli, što sp.Baradzin paciarpieŭ praz svaju pychu.
Dyk nie vychodźcie z samalotaŭ «Aeraflotu» praz kalidor padślednaha! A taksama - nia leźcie papiarod Pućki ŭ piekła...
