Naviny za tydzień
Paźniak sudzicca ź Viačorkam
U Haspadarčym sudzie budzie razhladacca pytańnie pra toje, chto maje prava na nazoŭ “BNF” – adna ci druhaja halina raskołataha ruchu. Skarhu na Miniust, jaki zarehistravaŭ i adnych jak «Biełaruski Narodny Front «Adradžeńnie», i druhich, jak «BNF «Adradžeńnie», padali paźniakoŭcy.
Novy paradak deklaravańnia dachodaŭ
Z 12 lutaha ŭvodziać novy paradak deklaravańnia dachodaŭ i majomaści. Ciapier padlahajuć deklaravańniu «tvory mastactva, kaštoŭnyja metały i kaštoŭnyja kamiani, vyraby ź ich», kali košt pradmietu pieravyšaje 1000 min. zarobkaŭ (raniej — 200). Deklaracyju ab krynicach dachodaŭ ciapier treba składać pry ažyćciaŭleńni ździełak na sumu bolej za 2000 min. zarobkaŭ (raniej suma była ŭ čatyry razy mienšaja, adnak razmova išła tolki pra majomasnyja ŭhody). Deklaracyi ab krynicach hrošaj nie pradstaŭlajucca pry budaŭnictvie, rekanstrukcyi abo nabyćci žytła, pry kupli valutnych ablihacyj dziaržaŭnaj pazyki ci Nacbanku, pry źmiaščeńni hrošaj u bank za vyniatkam pieravodu hrošaj za miažu, pry pahašeńni čałaviekam kredytu, atrymanaha inšaj fizyčnaj abo jurydyčnaj asobaj u biełaruskim banku, a taksama pry ažyćciaŭleńni indyvidualnym pradprymalnikam raźlikaŭ, źviazanych z pradprymalnickaj dziejnaściu, z vykarystańniem raźlikovaha «biahučaha» rachunku. Usie pieraličanyja vypadki, za vyniatkam pieršych dvuch, u dekrecie nazvanyja ŭpieršyniu.
B.T.
«Hliniany Viales» — Astraŭcu
Štohod Tavarystva Volnych Litarataraŭ prysudžaje premiju za najlepšuju mastackuju knihu hodu. Čarhovym laŭreatam «Hlinianaha Vialesa» staŭ Siarhiej Astraviec i jahony zbornik prozy «Cenzarskija nažnicy», jaki letaś vyjšaŭ u Biełastoku. Šeść hadoŭ tamu hetaja kniha rychtavałasia da druku ŭ mienskim dziaržaŭnym vydaviectvie «Mastackaja litaratura», ale, ź idealahičnych mierkavańniaŭ, jaje vykinuli z templanu. U knizie — 62 apoviedy.
Siarhiej Astraviec, stały aŭtar «NN», apošnija 15 hadoŭ žyvie ŭ Horadni. Jon šyroka viadomy jak žurnalist.
Vasil Krokva, Połacak
Adzin aryšt, adno źniaćcio, adzin skandał
Aryštavali, bo zapadozryli ŭ krucialstvie, namieśnika dyrektara Mazyrskaha naftapierapracoŭčaha zavodu Leanida Alchimoviča. Byccam by jon mieŭ na rachunkach za miažoj sotni tysiačaŭ dalaraŭ. Skinuli z pasady dyrektara «Biełšyny» Arkadzia Palakova, niahledziačy na zastupnictva kalektyvu, a na jahonaje miesca pastavili byłoha mera Mahilova Dźmitryja Sivickaha. A były načalnik kantrolna-revizijnaha ŭpraŭleńnia ministerstva kultury Alaksandar Hračoŭ vystupiŭ u «Biełorusskoj Diełovoj Hazietie» z abvinavačvańniami na adras ciapierašniaha hienprakurora Šejmana, jahonaha supracoŭnika Aŭsianskaha, a taksama kamandzira specpadraździaleńnia MUS Paŭlučenki, śviedčačy pra pamiery karupcyi i biezzakonnaści, jakija čyniacca ŭ najvyšejšych ešalonach ułady.
B.T.
Kanhres
Demakratyčnych Siłaŭ
U Miensku adbyłosia pieršaje pasiedžańnie arhkamitetu IV Kanhresu Demakratyčnych Siłaŭ. Vyrašyli, što Kanhres praviaduć u sakaviku. Bolš dakładnuju datu nazavuć na pasiedžańni Kaardynacyjnaj Rady Demakratyčnych Siłaŭ 8 lutaha. Tady ž planujuć lepš vyznačycca i z adzinym kandydatam na prezydenckija vybary.
Praca z apazycyjaj
Na presavaj kanferencyi ŭ Maskvie staršynia kamitetu pa mižnarodnych spravach Dumy (h.zn. parlamentu) Rasiei Dźmitry Rahozin zajaviŭ, što Rasiei varta pracavać ź biełaruskaj apazycyjaj: treba, skazaŭ, paźbiehnuć juhasłaŭskich pamyłak, kali da apošniaha momantu padtrymlivali tolki Miłošaviča.
Intelihiencyja
ŭ Łukašenki
1 lutaha Łukašenka prymaŭ u Pałacy Respubliki prydvornuju intelihiencyju. Pavodle jahonych słovaŭ, kultura za čas jahonaha kiravańnia była zachavanaja i ŭzbahačanaja. Łukašenka zaklikaŭ baranić “słavianskuju cyvilizacyju” ad hlabalizacyi dy amerykanizacyi, abiacaŭ kvatery dy zarobki ŭ sto dalaraŭ prosta sioleta. A pierad tym jon usio vinšavaŭ Ivana Šamiakina z 80-hodździem. Intelihiencyja pytańniaŭ pra losy źnikłych ludziej, ździeki ź biełaruskaje movy i kultury ŭ dziaržaŭnych ŚMI i ckavańnie Bykava nie ŭzdymała.
Strajk u Salihorsku
Z 1 lutaha pačaŭsia biesterminovy strajk indyvidualnych pradprymalnikaŭ Salihorsku, dzie padvysili płatu za arendu handlovych miescaŭ až u 5,2 razy.
Biełarusy pachitreli
Biełaruś prafinansavała biudžet «sajuzu Biełarusi dy Rasiei» za minuły hod tolki na 30%, a Rasieja – na 101%. Takoje adbyłosia ŭpieršyniu, raniej zavinavačvałasia adno Rasieja. Biudžet hetaha «ŭtvareńnia» na 2001 h. roŭny 90 młrd. rubloŭ, ź ich biełarusy musiać spłacić až treciuju častku.
Aleś Kudrycki
Dola samalota
U baranavickim Starym parku demantujuć stareńki samalot AN, jaki bolš za 10 hadoŭ tamu ŭstalavali tam pad dziciačy kinateatar. Paśla pravału taje idei ŭ samalocie niejki čas mieściŭsia muzej avijacyi, jaki, adnak, trymaŭsia na niekalkich amatarach i paśla nieadnarazovych rabunkaŭ taksama byŭ začynieny.
Urešcie kinuty ŭsimi samalot-pomnik zrabiŭsia prybiralniaj i adnačasova chataj dla roznych vałacuhaŭ dy bamžoŭ. Pacichu jaho pačali raskručvać pa šrubkach. Tut tolki pračnulisia ŭłady j zahadali zdać reštki samalota na metałałom.
Kłopat pra dzieci
U baranavickuju SŠ №19 pryjaždžali Viarcinski ź Dziahilevaj. Praviali sustreču ź dziećmi, pačytali im svaje vieršy, paśpiavali pad hitaru. Školniki taksama vystupili ź nievialičkaj prahramaj, paśla jakoj zadavali svaje pytańni haściam ź Miensku. Arhanizavali streču staršynia baranavickaha TBM Viktar Syryca i zavuč pa vychavaŭčaj pracy SŠ №19 Volha Mikuška. Biełaruskamoŭnymi klasami ŭ Baranavičach daŭno apiakujucca tutejšyja filii TBM i BNF: amal štomiesiac ładziać dla dziaciej imprezy i cikavyja padarožžy pa słavutych miaścinach.
«Pan Ministar»
u Baranavičach
U Baranavičach pastavili kamedyju F.Alachnoviča “Pan Ministar”. Apošni raz pjesy słavutaha vilenčuka stavilisia tutaka ŭ časie niamieckaj akupacyi. Zhurtavańnie “Tužlivy paniadziełak” u tutejšym Domie kultury vybrała kamedyju, napisanuju ŭ 1923 h., bo jana aktualnaja i siońnia — vyśmiejvaje pseŭdabiełarusaŭ, jakija irvucca da ŭłady dy nienavidziać usio biełaruskaje.
Rusłan Raviaka, Baranavičy
Praz ZŠA – ź vizaju
Amerykanskaja Słužba imihracyi j naturalizacyi pazbaviła hramadzianaŭ Rasiei dy Biełarusi prava biaźvizavaha tranzytu praz terytoryju ZŠA. Rašeńnie pačnie dziejničać z krasavika. Rasiejcy pierajšli ŭ katehoryju “niadobranadziejnych”. Biełarusaŭ ža razhladajuć jak hałoŭnych ichnych brancaŭ.
A.K.
