Vyzvaleńnie palitviaźnia
Sprava Ŭładzimiera Kudzinava
Navina, što pačynajuć urešcie vypuskać z turmy deputataŭ-źniavolenych, była b zusim dobraj, kab sudy pierahladali ichnyja spravy z ulikam ich palityčnaje matyvavanaści – inšymi słovami, kab deputaty byli pryznanyja nievinavatymi. Ale, raz pry isnaj uładzie takoha my dakładna nie dačakajem, dobraj navinoj jość i prosta pierahlad spravaŭ zhodna z novym kryminalnym zakanadaŭstvam.
U piatnicu ahienctva BiełaPAN raspaŭsiudziła źviestki pra pierahlad u Barysaŭskim rajsudzie spravy deputata Viarchoŭnaha Savietu 13 sklikańnia Ŭładzimiera Kudzinava ŭ źviazku z pryniaćciem novaha Kryminalnaha kodeksu, jaki značna źmiakčaje šerah artykułaŭ. Hazety zastrakacieli paviedamleńniami ab tym, što pytańnie vyzvaleńnia deputata – heta sprava pary dzion. Nam taksama vielmi chaciełasia b, kab hety numar “NN” sp.Kudzinaŭ čytaŭ, siedziačy doma na kanapie ŭ atačeńni rodnych i siabroŭ. Tym nia mienš, pryciahvaje ŭvahu šerah drobnych niedarečnaściaŭ, u śviatle jakich praz paru dzion musić adbycca doŭhačakanaje vyzvaleńnie Kudzinava.
Kudzinaŭ byŭ asudžany da 7 hadoŭ turmy zhodna z artykułam 170 č.2 ciapier užo niesapraŭdnaha Kryminalnaha kodeksu, sud pryznaŭ jaho vinavatym u dačy chabaru. Za kratami deputat znachodzicca z 4 lutaha 1997 h. Novy Kryminalny kodeks za toje samaje (art. 431 č.2) praduhledžvaje pakarańnie da 5 hadoŭ pazbaŭleńnia voli. Takim čynam, 1 lutaha, u minuły čaćvier, sud Barysaŭskaha rajonu byccam by źmienšyŭ viaźniu pakarańnie – ź siami da piaci hadoŭ. Ale... Za tyja 4 hady, što Uładzimier Kudzinaŭ siadzić za kratami, jon pieražyŭ užo dźvie amnistyi, zhodna ź jakimi jahony termin źniavoleńnia byŭ dvojčy skaročany na adzin hod. Na momant pierahladu spravy ŭ Barysavie Kudzinaŭ mieŭ faktyčny termin 5 hod. Tamu nielha skazać, što barysaŭski sud zrabiŭ niejkuju asablivuju łasku. Kudzinaŭ ničoha ŭ terminie źniavoleńnia nia straciŭ (choć u biełaruskich umovach jašče dziakuj Bohu, što nie nabyŭ).
Zaŭvažcie taksama, što sudzili Kudzinava ŭ 97-m hodzie pa artykule “ad 7 da 15” i dali najnižejšaje vyznačanaje pakarańnie. U 2001-m spravu pierahledzieli pa artykule “da 5-ci” — i maksymalnyja 5 hadoŭ pakinuli. Jak tyja kažuć, uvachod – rubiel, vychad – dva...
Adkul tady źviestki pra takoje chutkaje vyzvaleńnie? Čamu ŭ asiarodku žurnalistaŭ u piatnicu praniesłasia: “U paniadziełak, 5 lutaha, sustrakajem Kudzinava”?
Jak vyśvietliłasia, mienavita ŭ paniadziełak sustrakać muža paraiŭ žoncy deputata, Zoi Kudzinavaj, sudździa Mienskaha abłasnoha sudu Siarhiej Mikulič. Vychodzić, što kali sudździa Mikulič nia chłusić – tady chłusić ahienctva BiełaPAN. I tady Kudzinavu ŭ vyniku pierahladu jahonaj spravy prysudžany termin nia piać hadoŭ, a čatyry – mienavita hetki termin “adsiedki” skančajecca dla deputata 4 lutaha.
Niališnie zaŭvažyć: zhodna z Kryminalna-pracesualnym kodeksam, kali termin źniavoleńnia skančajecca ŭ niadzielu ci inšy vychodny dzień, turemnaja administracyja abaviazana vyzvalić čałavieka na dzień raniej. I zvyčajna načalstva kalonijaŭ ad hetaha punktu zakanadaŭstva nie adstupaje. Ale ŭ minułuju subotu z ustanovy UŽ-15/1, što znachodzicca ŭ Miensku na vulicy Kalvaryjskaj, vyzvalilisia try čałavieki, siarod jakich nie było Ŭ.Kudzinava. My asabista razmaŭlali z hetymi ludźmi – pavodle ichnich słovaŭ, Kudzinava na vyzvaleńnie ŭ toj dzień nichto nie vyklikaŭ.
Dziažurny pamočnik načalnika kalonii na Kalvaryjskaj, sp.Borachaŭ, u telefonnaj razmovie zaznačyŭ, što ničoha nia viedaje pra majučaje adbycca vyzvaleńnie deputata.
Vychodzić, što niechta – žurnalisty, sudździa Mikulič ci chtości inšy — jašče raz “amnistavaŭ” Kudzinava na dva hady, pakinuŭšy jamu trochhadovy termin pakarańnia. Było b dobra, kab adna j taja ž amnistyja skaračała terminy źniavoleńnia dvojčy. Ale hetak adbyvajecca tolki ŭ sałodkich marach pačynajučych viaźniaŭ. I nidzie bolej.
Kali Kudzinava sapraŭdy vyzvalać na hetym tydni, my pieršymi paciśniem ruku hetamu mužnamu čałavieku. Ale pakul što peŭnaści niama. Kali b sapraŭdy na novy 5-hadovy termin upłyvała amnistyja, Kudzinaŭ mieŭ by siadzieć, z ulikam papiarednich amnistyjaŭ, tolki try hady, i tady jaho musili adpuścić nieadkładna pa vyniasieńni barysaŭskim sudom rašeńnia pra źmiakčeńnie pakarańnia. Bolš za toje, deputat mieŭ by prava patrabavać ad dziaržavy kampensacyju za niezakonna adsiedžany im hod. Kali b sudździ, praduhledžvajučy taki pavarot spravy, zachacieli praduchilić skarhi, rašeńnie sudu pra vyzvaleńnie mieła b farmuloŭku “abmiežavacca adsiedžanym terminam”. Ale tady Uładzimier Kudzinaŭ abniaŭ by žonku j dačok taksama ŭ minuły čaćvier. Bo, zhodna z kryminalna-pracesualnym zakonam, sudovaje rašeńnie ab vyzvaleńni źniavolenaha padlahaje nieadkładnamu vykanańniu niezaležna ad taho, ci budzie jano apratestavanaje prakuraturaj. Adzinaje tłumačeńnie ŭsioj hetaj spravy – što adbyłasia niejkaja błytanina. Što Łukašenka ŭsio ž pastaviŭ zadańnie vypuścić palitviaźniaŭ (prynamsi, ich častku) napiaredadni vybaraŭ, ale rajsud apranuŭ hetaje rašeńnie ŭ niejkuju pakul pamyłkovuju farmuloŭku.
Nie śpiašajmasia, panovie, kazać dziakuj. Nie zabyvajma, chto palitviaźniaŭ adpraviŭ u svoj čas za kraty.
Taciana Śnitko,
Źmicier Harbunoŭ
