Raman Jakaŭleŭski
Dyplamatyja bjecca ŭ kanvulsijach
Tradycyjnaja štohadovaja narada kiraŭnikoŭ dyplamatyčnych misijaŭ, jakaja adbyłasia nia tak daŭno ŭ Miensku, mieła šerah asablivaściaŭ. Hetym razam A.Łukašenka nia staŭ asabista pryjaždžać u MZS, kab pastavić pierad svaimi pasłami čarhovyja zadačy. Kiraŭnik ich pryniaŭ u siabie ŭ rezydencyi za specyjalna abstalavanym kruhłym stałom. Pierad hetym mierapryjemstvam hałava zamiežnapalityčnaha viedamstva Michaił Chvastoŭ pravioŭ u siabie naradu z pasłami, na jakoj paviedamiŭ im, što dla niama bolš važnaj zadačy, čym usieahulnaje zabieśpiačeńnie spryjalnych dla režymu vynikaŭ mahčymych prezydenckich vybaraŭ.
Kiraŭniki dyplamatyčnych misijaŭ naŭrad ci čakali niečaha inšaha. Adnak nie abyšłosia i bieź niespadziavanak. Tak, naprykład, prybyłyja z roznych krainaŭ śvietu dyplamaty daviedalisia, što hetym razam čas ich znachodžańnia doma budzie zaličany ŭ jakaści asabistaha štohadovaha adpačynku.
Pasłancy suverennaj Biełarusi, što pracujuć u inšych krainach, jak nichto inšy, asabista na sabie adčuvajuć usie vabnoty izalacyi, u jakoj praciahvaje zastavacca kraina. Pa viartańni dadomu niekatoryja ź ich, sprabujučy demanstravać badziory nastroj, počastu traplajuć u niajomkaje stanovišča. Naprykład, heta zdaryłasia z pasłom u ZŠA Valerjem Capkałam. Vystupajučy na BT, jon vykazaŭ nadzieju, što jahony patron moža źjavicca ź vizytam u Złučanych Štatach. Paśla pajezdki tudy Paŭła Baradzina perspektyva adlotu za akijan samoha A.Łukašenki ŭsprymajecca jak zmročny žart.
Aproč losavyrašalnych prezydenckich vybaraŭ, Biełaruś sioleta čakajuć jašče adny. U Arhanizacyi Abjadnanych Nacyj pavinna adbycca hałasavańnie, jakoje vyznačyć novych niastałych siabroŭ Rady Biaśpieki. Užo druhi raz za apošnija dziesiać hod u Radu Biaśpieki stukajecca Biełaruś. Na minułych vybarach jana sastupiła Čechii. Hetym razam kankurencyju za miesca ŭ Radzie nam składaje Baŭharyja. Usim zrazumieła, što režymu A.Łukašenki nia śviecić vyjhrać. Niekatoryja ź jaho atačeńnia navat navažvalisia niejak pierakanać haspadara nie vystaŭlać na hety raz kandydatury Biełarusi. Ale biezvynikova.
Raznastajnaja krytyka palityki Baŭharyi ŭ dziaržaŭnych ŚMI ŭsprymajecca jak pomsta za jaje budučuju pieramohu na hałasavańni ŭ AAN. Darečy, u Miensku dahetul niama kiraŭnika baŭharskaj misii ŭ ranhu Nadzvyčajnaha i Paŭnamocnaha pasła. Dy i ŭ Safiju niešta nie śpiašajecca A.Łukašenka dasłać svajho. Praŭda, pavodle niekatorych źviestak, takim pasłom moža stać ciapierašni namieśnik ministra — hieneralny sakratar MZS Biełarusi Alaksandar Piatroŭ. Jon užo pracavaŭ u pasolstvie ŭ Safii. Potym, niejki čas paščyravaŭšy pad kiraŭnictvam Łatypava ŭ prezydenckaj administracyi, razam ź im znoŭ apynuŭsia ŭ MZS. Ciapier, vierahodna, paśla sychodu Ŭ.Łatypava ŭ Radu biaśpieki A.Piatroŭ kamuści vyzvalaje miesca.
Abiacajuć stać vakantnymi i miescy astatnich namieśnikaŭ M.Chvastova. Pieršych namieśnikaŭ Siarhieja Martynava i Valancina Vialičku prarakujuć u pasły ŭ Bruseli i Kijevie.
Ź niadaŭniaha času ŭsio čaściej pačali kazać pra čarhovy varyjant vyjścia z zamiežnapalityčnaj izalacyi, u jakoj praciahvaje zastavacca kiraŭničy režym. Raniej praryvam u hetaj spravie aficyjny Miensk sprabavaŭ pradstavić, naprykład, udzieł A.Łukašenki ŭ Stambulskim samicie krainaŭ ABSE abo prysutnaść A.Łukašenki na druhim pradstaŭničym forumie — samicie tysiačahodździa ŭ AAN. Mienavita tam upieršyniu była ahałošana prapanova pravieści “dyjaloh cyvilizacyj”. Z takoj inicyjatyvaj vystupiŭ prezydent Iranu Chatami. Darečy, iranski prezydent byŭ adnym ź niešmatlikich, chto pravioŭ tady ŭ Ńju-Jorku dvuchbakovuju sustreču z A.Łukašenkam. Možna nahadać i toje, što Iran źjaŭlajecca adnoj ź niešmatlikich krainaŭ śvietu, dzie z aficyjnym vizytam byŭ A.Łukašenka. Ciapier ža, kali znoŭ pačynajuć kazać pra mažlivaść praryvu izalacyi, majuć na ŭvazie ŭžo susiedniuju Litvu. Pry kancy krasavika ŭ Vilni planujecca pravieści pradstaŭničuju mižnarodnuju kanferencyju na temu “dyjalohu cyvilizacyj”. Miarkujecca, što ŭ joj voźmie ŭdzieł i ceły šerah kiraŭnikoŭ dziaržavaŭ, u pryvatnaści, prezydent Polščy Alaksandar Kvaśnieŭski. Varta nahadać, što na adnym “dyjalohu” ŭ Vilni z udziełam prezydentaŭ šerahu eŭrapiejskich krainaŭ A.Łukašenka ŭžo ŭdzielničaŭ. Było heta ŭ vieraśni 1997 h. Paśla hetaha mnohija ź ich jaŭna nie vykazvali žadańnia znoŭ sustrakacca ź im za adnym stałom. Ale kali mierkavany “dyjaloh cyvilizacyj” u Vilni adbudziecca pad ehidaj AAN, to paźbiehnuć prysutnaści na im A.Łukašenki budzie praktyčna niemahčyma.
U krasaviku da Łukašenki zavitaje Turkmenbašy. Pavodle aficyjnaj infarmacyi, Turkmenistan — taja žadanaja dla Biełarusi kraina, jakaja raźličvajecca za biełaruskija traktary žyvoj valutaj, asabliva kaštoŭnaj u hod vybaraŭ. Na Mienskim traktarnym zavodzie navat pracuje specyjalnaja linija pa vytvorčaści trochkołavych traktaroŭ dla ŭborki na turkmenskich palach. Vyhada dla abodvuch bakoŭ navidavoku. A.Łukašenka niejak kazaŭ, što kali b u jaho było stolki hazu, jak u Turkmenbašy, to jon by biedaŭ nia viedaŭ. I demakratyčnych pa eŭrapiejskich standartach vybaraŭ, mabyć, taksama. Niaciažka pradbačyć, što padčas svaich sustrečaŭ dva pravadyry na vysokim filazofskim uzroŭni pahutarać na temu kłopatu ab svaich narodach. Dyj niekatoryja nieparazumieńni ŭ dvuchbakovych adnosinach vypraviać. Tak, u svoj čas pryznačeńnie biełaruskaha pasła V.Račkova ŭ Tehieranie pasłom pa sumiaščalnictvie ŭ Ašhabacie vyklikała ŭ Turkmenbašy pačućcio niekatoraj kryŭdy. Bo jahony pasoł u Miensku I.Vieldžanaŭ pa ŭsich parametrach pieraŭzychodziŭ pałkoŭnika KDB V.Račkova. Jon i hienerał-lejtenant, były ŭ savieckija časy namieśnik kamandujučaha Biełaruskaj vajskovaj akruhaj, i duajen dyplamatyčnaha korpusu, akredytavanaha ŭ Miensku. Ale, vidać, asablivaj prykmietaj lubovi Turkmenbašy da Biełarusi možna ličyć toje, što pasoł I.Vieldžanaŭ źjaŭlajecca hramadzianinam Biełarusi. Turkmenskim zakonam heta nie supiarečyć. Možna, viadoma, zhadać, što pry ŭsioj svajoj unikalnaści Turkmenistan adroźnivaje ad inšych i taki fakt. Ašhabat aficyjna pryznaje režym talibaŭ u Aŭhanistanie. Cikava, što paśla abvieščanych U.Pucinym sankcyjaŭ suprać talibaŭ šlacham vydańnia specyjalnaha prezydenckaha dekretu niešta nie čuvać było pra analahičny kroku z boku kalehi i sajuźnika ź Miensku.
U hod čakanych prezydenckich vybaraŭ u asablivym režymie buduć pracavać nia tolki dyplamatyčnyja misii Biełarusi ŭ inšych krainach, ale j zamiežnyja misii ŭ Miensku. Vierahodna, što viesnavoje abvastreńnie moža vyrazicca i ŭ čarhovych skandałach vakoł zamiežnych hramadzianaŭ. Jany słužać dla taho, kab adciahnuć uvahu ułasnych hramadzianaŭ ad pravałaŭ unutranaj palityki. Rana ci pozna, ale izalacyja sparadžaje kanvulsii. Schilnaść režymaŭ, analahičnych biełaruskamu, da nahniatańnia ŭsiemažlivych sytuacyjaŭ dziela ŭłasnaj kanservacyi — a refarmavacca jany prosta nia zdolnyja, — heta kanvulsii asudžanaha. Znachodzicca ŭ kanvulsijach doŭha nielha.
