Sprava Zacharanki-Hančara
Rasstralanyja
Zabojstva z elementami rytualnaha
Hazeta “Biełaruski Čas” miarkuje, što Hančara i Zacharanku pazbavili žyćcia specyjalnym pistaletam dla vykanańnia śmiarotnych prysudaŭ, a Zavadzki moža być žyvy.
U minuły aŭtorak, nie dačakaŭšy reakcyi Łukašenki na svoj list, Uładzimier Hančaryk pieradaŭ u presu kopii dakumentaŭ sa śledčaje spravy ab palityčnych zabojstvach, u tym liku rapart hienerała Łapacika sa śledčaha kamitetu MUS i pratakoły dopytaŭ načalnika mienskaha SIZA Ałkajeva. Hetaje sakretnaje daśje, jakoje najchutčej što trapiła ŭ ruki hramadztva ad adnaho z vysokich čynoŭ Ministerstva ŭnutranych spravaŭ, u cełym paćviardžaje źviestki, pra jakija było viadoma śledčym Słučaku j Pietruškieviču. Pavodle hetych materyjałaŭ, Šejman i Sivakoŭ addavali zahady na fizyčnaje źniščeńnie kamandziru specadździełu Paŭlučenku. Sivakoŭ addaŭ i zahady Ałkajevu na vydaču Paŭlučenku “rasstrelnaha pistaleta”. Daty vydačy supadajuć z datami źniknieńnia Zacharanki, Hančara i Krasoŭskaha.
Hazeta “Biełaruski Čas”, raskazvajučy pra źmiest “daśje Hančaryka”, adznačaje, što, “u adroźnieńnie ad Hančara i Zacharanki, Zavadzki nie ŭjaŭlaŭ pahrozy dla kiraŭnictva Biełarusi. Uvohule ŭ vypadku z Zavadzkim pierakanaŭčaha matyvu dla vykradańnia nie prahladajecca”. Mienavita tamu hazeta nie vyklučaje, što, mahčyma, žurnalist jašče žyvy i jaho chočuć vykarystać pierad vybarami, pa analohii ź Vińnikavaj i Baturynym, u jakaści kontrarhumentu, “trusa z kapieluša fokuśnika”. U vypadkach ź Vińnikavaj i Baturynym ułada demanstravała svaju zdolnaść da doŭhaterminovych i vielmi darahich šmatchadovak, nakiravanych na dezaryjentacyju hramadzkaje dumki.
Nijakich tłumačeńniaŭ z boku Łukašenki i jahonaj administracyi ŭ spravie “daśje Hančaryka” dahetul nia dadziena.
Mikoła
