Pohlad ź Miensku
My z čačencami
Paśla kryvavaha zamachu na stabilnaść amerykanskaje dziaržavy adzin moj znajomy biełarus ź Ńju-Jorku, śviedka padzieńnia chmaračosaŭ, pryznaŭsia ŭ liście, što ciapier jon pa-inšamu hladzić i na arabaŭ, i na čačenaŭ. Ciapier, piša, jon razumieje, čamu rasiejcy vajujuć na Kaŭkazie. Takaja pieraacenka adbyłasia i ŭ miljonaŭ jahonych surodzičaŭ miž Dźvinoj a Prypiaćciu. “Hetych nielha raspuskać! Pravilna Pucin ich bje!” Abo z pretenzijaj na surjoznaść: “Adnaho bałota čerci: što ŭ Aŭhanistanie, što ŭ Palestynie, što ŭ Čačenii”.
Nikoli paśla kanfliktu ŭ Kosavie chryścijanskaja, “biełaja” cyvilizacyja nie adčuvała hetkaje jednaści, jak paśla ataki na Ameryku. Niebiaśpieka hurtuje.
Viadziecca havorka pra stvareńnie suśvietnaj antyterarystyčnaj kaalicyi. Anachraničnaj zdajecca krytyka amerykanskich planaŭ stvareńnia bolš sučasnaj systemy procirakietnaj abarony, što niadaŭna hučała z kalidoraŭ bieła-čyrvonaha pałacu na vulicy Lenina ŭ Miensku. Masava zhadvajuć stary dobry vyraz “cyvilizavany śviet”: “Vyklik kinuty ŭsiamu cyvilizavanamu śvietu”.
Rasiejcy łoviać momant dla dyplamatyčnaha zabieśpiačeńnia svaich akcyjaŭ na Kaŭkazie. Tak atrymałasia, što mienavita prarasiejskija siły daŭno i biespaśpiachova zmahajucca z talibami, jakija pryhreli kubły ben Ładena. I Rasieja ž, pastaŭščyca zbroi režymam kštałtu libijskaha (ci sama, ci rukami satelitaŭ), natchnialnica kanfliktaŭ, kštałtu palestynskaha, jakija prynosiać joj vializarny rost naftahazavych prybytkaŭ, vyjaŭlajecca niezamiennym źvianom antyterarystyčnaj kaalicyi…
Vialikaj prykraściu było b, kab zachodni śviet pasprabavaŭ siłaj vyrašyć “isłamisckuju prablemu”, zabyŭšysia pra nieabchodnaść mižrelihijnaha i mižkulturnaha dyjalohu. Bambiožka Aŭhanistanu cieraz terytoryju Turkmenistanu nia duža źmianiła b ni pieršy, ni druhi.
Prykra było b, kab u afekcie śviet zapluščyŭ vočy na čačenskuju dramu. Ahresaram u Čačenii 7 hadoŭ byli rasiejskija vojski. Jany zrujnavali harady, zrabili dziasiatki tysiačaŭ ludziej uciekačami, amal źniščyli adnu z samych samabytnych kulturaŭ Eŭropy. “Čačenski teraryzm” – nia bolš čym hazetny stereatyp, što hruntujecca na sumnieŭnych abvinavačańniach u padryvie budynkaŭ u Maskvie i na rastyražavanych rasiejskimi ž ŚMI zajavach psychična niepaŭnavartych asobaŭ, kštałtu kantužanaha Radujeva. Nie było nijakaha čačenskaha teraryzmu da pieršaha rasiejskaha ŭvarvańnia ŭ Čačeniju.
Čačency – eŭrapiejski narod, što zmahajecca za niezaležnaść i svaju kulturu. Pra heta nie zabyvajmasia.
Biełaruskija tatary na minułym tydni vystupili z zajavaj: terarysty – heta ludzi biaz Boha i biez nacyjanalnaści. Čačency, jak i biełarusy, ludzi z Boham i nacyjanalnaściu.
Barys Tumar
