Dziaviaty tur čempijanatu Biełarusi pa futbole zapomniŭsia hulnioj u Salihorsku, dzie «Šachcior» prymaŭ lidera čempijanatu barysaŭski BATE.
Letaś kamandy syšlisia ŭ apošnim tury pieršynstva, kali vyrašaŭsia los medaloŭ. Salihorcy, prajhrajučy 0:2, vyjhrali ŭ barysaŭcaŭ 3:2 i zavajavali bronzu.
Nia dziva, što BATE prahnuŭ revanšu. Adnak matč pačaŭ składvacca pa scenary «Šachcioru». U pačatku druhoha tajmu salihorcy, dziakujučy dublu Lavončyka i hołu Klimienki, vyjhravali ź likam 3:1. Zdavałasia, što «Šachcior» musić spakojna davieści matč da lahičnaj pieramohi. Adnak u hety momant za spravu ŭziaŭsia lepšy tandem forvardaŭ čempijanatu Vital Radzivonaŭ i Hienadź Bliźniuk. Na dvuch jany zrabili try hały. BATE, prajaviŭšy sapraŭdnuju volu, pieramoh 4:3.
Adarvacca jašče na bolšuju adlehłaść ad kankurentaŭ BATE nia zmoh. Taksama prajhrajučy pa chodu matču, pieramohi z adnolkavym likam 2:1 atrymali asnoŭnyja kankurenty barysaŭcaŭ «Homiel», MTZ‑RIPA i žodzinskaje «Tarpeda», jany akazalisia macniej adpaviedna za «Viciebsk», «Miensk» i «Darydu».
Astatnija matčy turu prynieśli nastupnyja vyniki: «Naftan» – «Smurhoni» 0:1, «Dynama» (Bieraście) – «Nioman» 0:0, «Dynama» (Miensk) – «Dniapro» 1:0.
Turnirnaja tablica paśla dziaviaci turaŭ vyhladaje nastupnym čynam: BATE – 24 punkty, MTZ‑RIPA – 17, «Tarpeda» – 16, «Homiel» – 15, «Nioman» – 14, «Smurhoni» – 13, «Šachcior» – 12, «Dynama» (Miensk) – 11, «Dniapro», «Viciebsk», «Dynama» (Bieraście) – pa 9, «Daryda» – 8, «Naftan» – 7, «Miensk» – 6.
Najlepšym bambardziram źjaŭlajecca Hienadź Bliźniuk (BATE) – 11 hałoŭ.
