Biełaruskaja AES za miažoju RB
Praniamiecki ŭrad Navickaha hatovy investavać u raźvićcio enerhietyki Smalenščyny
Biełaruś moža ŭkłaści hrošy ŭ budoŭlu novaha enerhabloku Smalenskaj AES. Honar zrabić hetuju zajavu dastaŭsia novapryznačanamu prezydentu Nacyjanalnaj akademii navuk Biełarusi Michaiłu Miaśnikoviču na sustrečy z namieśnikam ministra atamnaj enerhii Rasiei Valancinam Ivanovym.
Rasiejcy padtrymali prapanovu biełaruskaha boku. Heta dla ich vyhadnaja investycyja. Miaśnikovič ličyć, što novy enerhablok dazvolić Biełarusi vypracoŭvać i atrymlivać patrebnuju kolkaść elektraenerhii dy razam z Rasiejaj ekspartavać jaje ŭ Polšču i Niamieččynu.
Biełaruś pra lepšaje nie mahła j maryć. Zamiest taho kab budavać stancyju na svajoj terytoryi, jana zbuduje jaje na rasiejskaj. U Rasiei ž buduć składvacca atamnyja adkidy. Deficyt elektraenerhii, ad jakoha pakutuje Biełaruś, źmienšycca.
Upłyŭ Biełarusi na rasiejskaje pamiežža, u tym liku i na etnična biełaruskija ŭ minułym častki Smalenščyny i Branščyny, vialiki. Tłumačycca jon ekanamičnaj ekspansijaj Biełarusi ŭ ich. 40% sumiesnych pradpryjemstvaŭ tam — biełaruska-rasiejskija. Jany zajmajucca pieravažna handlem tavarami, niezakonna ci napaŭzakonna ŭviezienymi ź Biełarusi. Možna tolki ŭjavić, nakolki pašyrycca hety ŭpłyŭ u vypadku raźvićcia pryvatnaha sektaru ŭ Biełarusi i prytoku niamieckich investycyjaŭ u našu krainu. Biełaruś i ciapier ujaŭlajecca žycharam rasiejskaha pamiežža ŭzoram paradku i sacyjalnaj stabilnaści. Pad huki intehracyjnych pramovaŭ šmatlikija tamtejšyja pradpryjemstvy nia vytrymali kankurencyi ź biełaruskimi, jakija atrymlivali datacyi ź dziaržbiudžetu. Hetak “zahnulisia” smalenskija cahielni dy branskaja meblevaja pramysłovaść. Ź inšaha boku, smalenskaja charčovaja pramysłovaść žyvie ekspartam nizkajakasnaha tannaha charču ŭ Biełaruś.
Dla Biełarusi było b cikava, kab na budoŭli i ŭ absłuhoŭvańni budučaha enerhabloku pracavaŭ i biełaruski persanał. Naša kraina taksama zacikaŭlenaja ŭ adpaviednaści budučaj stancyi eŭrapiejskim standartam biaśpieki i najnoŭšym technalohijam.
Kali “smalenski prajekt” skončycca pośpiecham, biełaruskija ŭkładańni ŭ syravinnuju i enerhietyčnuju haliny rasiejskaj haspadarki buduć i dalej uzrastać. A naša kraina — pieratvaracca ŭ svojeasablivuju “padušku” biaśpieki pamiž Rasiejaj i Niamieččynaj.
Niemcy pastanavili začynić usie svaje AES. Budaŭnictva novych krynicaŭ enerhii im darečy. Biełarusy hatovyja im dapamahać — ale minimizujučy ekalahičnuju ryzyku dla svajoj krainy.
Barys Tumar
