Nahodaj dla kryminalnaj spravy stała natatka ŭ hazecie «Bojki Kleck», jakuju Siarhiej Panamaroŭ vydaje ŭłasnymi srodkami i dla jakoj sam piša teksty. U artykule «Adpłata za baćkoŭskuju luboŭ» viałosia pra toje, jak kiraŭnička Kleckaj jurydyčnaj kansultacyi Natalla Siemaškievič adsudziła va ŭłasnaha baćki majomaść dy pazbaviła jaho baćkoŭskich pravoŭ na małodšuju dačku. Raniej jana ŭžo sudziłasia z pradprymalnikam, paličyŭšy adzin z artykułaŭ u hazecie abraźlivym. Ale j tady, i ciapier admysłovaja ekspertyza nie znajšła parušeńnia Kryminalnaha kodeksu. Pra spynieńnie kryminalnaj spravy suprać Panamarova paviedamiŭ jahony advakat Alaksandar Halijeŭ: «Spravu spynili tydzień tamu, ale pakul niama aficyjnaha rašeńnia». Pa jaho słovach, jość śviedčańni cisku asabistaha charaktara na Siarhieja. Nibyta muž Natalli Siemaškievič sprabavaŭ «padrezać» Siarhieja na aŭto siońnia na vulicy, kali toj razvoziŭ na rovary hazetu.
Ź N. Siemaškievič, byłoj vučanicaj žonki, u Panamarova daŭnija stasunki. Niekali jana aformiła damovu ab prodažy Siarhieju pamiaškańniaŭ byłoj vajskovaj častki. Byłuju kazarmu jon prystasavaŭ pad stalarny cech, dzie vyrablaŭ dziela patrebaŭ mieścičaŭ meblu. Kali žonka pradprymalnika Śviatłana ŭ 2004 hodzie pasprabavała svaje siły na parlamenckich vybarach, miascovaja vertykal uziałasia za siamiejny biznes Panamarovych. N. Siemaškievič anulavała ŭkładzienuju joj ža damovu, nibyta znajšoŭšy ŭ joj pamyłki. U vyniku šmatlikich sudoŭ pradprymalnika pazbavili biznesu i jon dahetul nia moža viarnuć układzienyja ŭ cech hrošy. Adnych sudovych mytaŭ Siarhiej spłaciŭ na sumu 1,5 młn rubloŭ.
Hazetu Panamarova, dy j jaho samaho, viedaje ŭvieś horad. «Bojki Kleck» čytajuć milicyjanty, prakuror, sudździ dy miascovaja vertykal. Źmiest hazety — ad kamunalnych prablemaŭ dy ŭzajemadačynieńniaŭ ź miascovaj uładaj da pieradrukaŭ ź niezaležnych internet‑vydańniaŭ. Z dapamohaj žonki klecki aktyvist kansultuje ziemlakoŭ pa šmatlikich jurydyčnych pytańniach. Artykuły Panamarova nia raz vyklikali nehatyŭnuju reakcyju ŭ miascovaj ułady. Pa jaho słovach, kožny paniadziełak, kali vychodzić śviežy numar «Bojkaha Klecku», staršynia rajvykankamu Anatol Bojka pahražaje paździrać u načalnika kleckaj milicyi pahony. Siarhiej Hiermanavič ličyć, što jaho hazeta i jość hałoŭnaj pryčynaj pieraśledu z boku ŭładaŭ.
Svaju spravu katory hod Panamaroŭ robić faktyčna adzin. «Nie spadziajusia na našych palitykaŭ, jakich, vidno pa ŭsim, całkam zadavalniaje stan rečaŭ» — kaža były siabra AHP dy pryhadvaje ciopłym słovam «partneraŭcaŭ», jakija padtrymlivali jaho na sudach. Pakul było aŭto, vaziŭ sa stalicy niezaležnyja hazety. Kali ž partyjnaje kiraŭnictva paraiła najmać transpart u kamersantaŭ, atros ruki i zaniaŭsia ŭłasnaj hazetaj. Jak kampliment, čas ad času čuje ad siabroŭ, što tyja paśla jaho samvydatu amal nie čytajuć «Narodnuju volu».
Daviedaŭšysia pra kryminalnuju spravu, vydaviec «Bojkaha Klecku» nie zbajaŭsia: «U turmie taksama biaz spravy siadzieć nia budu». Ale ciapier plany źmianilisia. Panamaroŭ žyvie ŭ centry horadu, jahony dom mieścicca pobač z uvachodam u haradzki park. Hod tamu ŭ traŭni na dachu jahonaj łaźni kala troch tydniaŭ prałunaŭ bieł‑čyrvona‑bieły ściah. Ciapier haspadar źbirajecca padnavić dach u domie. Adzin schił dachu jon štohod farbuje ŭ bieł‑čyrvona‑bieły koler, a druhi — u žoŭta‑błakitny.
