Naviny haspadarskija
TRAKTAR MTZ-80 PATAŃNIEŬ z 10,2 da 8,8 tys. dalaraŭ. Ciapier traktary pradajuć pa sabiekošcie, bo zavod choča “razhruzić” składy ad 2,8 tys. mašyn. Kab mieć u takich varunkach hrošy na vytvorčaść, MTZ žorstka ekanomić metał i elektryčnaść. Administracyja zavodu źbirajecca zvolnić 1,5 tys. pensijaneraŭ.
“BIEŁTELEKAM” madernizuje staryja taksafony. Ciapier ź ich možna budzie telefanavać pa novych universalnych kartkach, ale pa-raniejšamu tolki pa horadzie. Madernizavanyja taksafony buduć markiravacca admysłovaj nalepkaj. Z časam usie staryja aparaty zamieniać na ŭniversalnyja taksafony, ź jakich možna telefanavać pa ŭsim śviecie.
VALUTNYJA REZERVY Nacyjanalnaha banku vyraśli ŭ krasaviku amal na 35 młn. dalaraŭ i skłali na 1 traŭnia 235 młn. dalaraŭ.
BANKAMATY NA POŠTACH dazvoliŭ ustaloŭvać Nacbank. Pakul u krainie pracuje ŭsiaho 200 bankamataŭ dla plastykavych kartak.
PADARAŽEŬ BENZYN na 3%. Ciapier na zapraŭkach “Biełnaftachimu” litar benzynu A-76 kaštuje 480 rub., AI-92 — 590 rub., A-95 — 675 rub.
CENY NA KAŠTOŬNYJA METAŁY padvysili skupščyki. Ciapier za hram srebra možna atrymać 190 rub. (padvyška na 9%), za hram zołata — 7800 rub. (na 3%), płaciny — 21600 rub. (na 18%).
12,5 MŁN. KILAVAT-HADZINAŬ elektraenerhii skrali sioleta hramadzianie krainy praz samavolnaje padłučeńnie da elektrasietak i paškodžańnie ličylnikaŭ. Źnikła taksama 22,4 tony aluminievaha drotu i 3 transfarmatary. Z pačatku hodu straty enerhietykaŭ siahajuć pad miljon dalaraŭ.
MIASA Z POLŠČY zabaraniła ŭvozić Ministerstva sielskaj haspadarki, bajučysia karovinaha šalenstva. Heta mocna nie adabjecca na pracy biełaruskich miasakambinataŭ i kiłbasnych cechaŭ, bo polskim miasam jany karystalisia mała. Vyklikaje tryvohu jakaść biełaruskich miasnych vyrabaŭ. Ciapier pierapracoŭčyja kambinaty mohuć rabić kiłbasu z terminam zachoŭvańnia nia bolej za 3 miesiacy, tamu čaściakom jaje pradajuć užo sapsavanaj. Kab źmianić abstalavańnie j pavialičyć terminy zachoŭvańnia, pierapracoŭščykam treba 50 młn. dalaraŭ investycyjaŭ štohod.
CANA NA HAREŁKU padvysiłasia na 2,5%. Plaška “Kryštalu-100” kaštuje 2310 rub., “Biełaj Rusi” i “Kryštalu-luks” — pa 2390 rub. Ahułam sioleta harełka padaražeła ŭžo na 13,1%.
NACYJANALNYMI VALUTAMI buduć raźličvacca Biełaruś i Ŭkraina. Heta ŭmacuje naš rubiel i ŭkrainskuju hryŭniu adnosna dalara ZŠA. Budzie karyść i dla vytvorcaŭ: z-za kanvertacyi nacyjanalnych valutaŭ “praz dalar” ceny na pradukcyju padvyšajucca na tracinu.
NA 13 MŁN. DALARAŬ mieniej vydatkuje sioleta na azdaraŭleńnie fond sacyjalnaj abarony. Hetyja hrošy vyrašyli “pierakinuć” na vypłatu pensijaŭ u traŭni-červieni.
KREDYTY NACBANKU patańnieli z 55 da 50% hadavych. Urad tłumačyć novuju staŭku źnižeńniem inflacyi. Za pieršyja dva tydni traŭnia ceny pavialičylisia na 0,9% — heta najmienšy pakaźnik ad letašniaha vieraśnia.
11,2 MŁN. DALARAŬ daduć sioleta na budoŭlu i ramont małych daroh. Najbolš hrošaj atrymajuć Mienščyna (2,8 młn.) i Viciebščyna (2,3 młn.). Bolšaja častka tych 2,3 miljona pojdzie na darohi Połaččyny, dzie sioleta buduć “Dažynki”.
VALUTNYJA DAŬHI LNoZAVODAŬ (blizu 140 tys. dalaraŭ) pakul što spłacić urad. Viartać hetyja hrošy pradpryjemstvy buduć naleta.
250 TYS. DALARAŬ vydatkavaŭ urad na likvidacyju nastupstvaŭ nadzvyčajnych sytuacyjaŭ. Pałova hetych hrošaj pojdzie na avijacyjnuju chimičnuju apracoŭku lasoŭ ad pažaraŭ.
S.I.
