Na Mahiloŭskim zamčyščy adnaviłasia niesankcyjanavanaje budaŭnictva pravasłaŭnaha chramu. Archieolahi ŭ šoku.
Doktar histaryčnych navuk, vykładčyk Mahiloŭskaha dziaržaŭnaha ŭniversytetu imia Kulašova Ihar Marzaluk nazvaŭ niesankcyjanavanaje budaŭnictva naŭmysnym źniščeńniem nacyjanalnaha pomniku archiealohii. Jon źbirajecca padavać u sud na dziejańni pravasłaŭnaha prychodu Śviatych carskich pakutnikaŭ i praviednikaŭ XX stahodździa, jaki buduje chram.
Adnaŭleńnie budaŭničych rabot na «Mahile lva», jak jašče nazyvajuć Mahiloŭskaje zamčyšča, pačałosia za tydzień da adkryćcia aficyjnych uračystaściaŭ da 740 uhodkaŭ Mahilova. U dzień adkryćcia, 28 traŭnia, raspačnie pracu mižnarodnaja kanferencyja «Mahiloŭ: minuŭščyna i sučasnaść». Jana budzie pryśviečana 430 uhodkam nadańnia Mahilovu Mahdeburskaha prava.
Budavać chram pačali jašče ŭ 2002 hodzie, ale nieŭzabavie raboty prypyniłasia. Ad taho času budaŭničaja placoŭka zastavałasia aharodžanaja.
Siońnia budaŭniki pahłybili na dva metry jaminu pad fundament, a kulturny słoj vyvieźli na śmietnik. Akramia taho da miesca budaŭnictva padvodziacca kamunikacyi, praciahłaść tranšej pad jakija siahaje 200 metraŭ.
Sproba hramadzkich aktyvistaŭ na čale ź Iharam Marzalukom spynić budaŭnictva vyklikała abureńnie z boku pradstaŭnikoŭ pravasłaŭnaha prychodu Śviatych carskich pakutnikaŭ i praviednikaŭ XX stahodździa. Hramadzkich aktyvistaŭ dy žurnalistaŭ abražali, pahražali raspravaj z boku KDB.
Pavodle aficyjnaj infarmacyi, na Mahiloŭskim zamčyščy pabudujuć pravasłaŭny chram‑pomnik pakutnikam i voinam, što zahinuli za ajčynu ŭ XX stahodździ.
Kamientary