Sadziać,
nia hledziačy na halštuki
U rukach Leanida Małachava — pozva ŭ sud. Vina hetaha impazantnaha pradprymalnika ŭ tym, što jon z kalehami zładziŭ la Kamaroŭki niesankcyjanavany pikiet.
Pradprymalniki pratestavali suprać rašeńnia staličnych uładaŭ, jakoje abaviazvaje ich prymać hrošy tolki praz kasavy aparat. Niahledziačy na toje što Kanstytucyjny sud pryznaŭ takoje rašeńnie supiarečnym dekretu prezydenta №12, jano zastajecca ŭ sile. Kuplać kasavyja aparaty doraha. Pradprymalniki hetaha rabić nie chacieli, ale daviałosia — inakš by ich štrafavali ci ŭvohule vykidali z handlovych centraŭ, jakich u Miensku ciapier 27. Nie chacieli stavić aparaty nia stolki z-za ich cany, drennaj jakaści, kolki z-za taho, što ź ich ustanoŭkaj źmianšajecca mahčymaść utojvańnia svajho abarotu ad padatkovych orhanaŭ. Usie jany musiać jašče paadkryvać rachunki ŭ bankach. Ale pry hetym nichto nie zdymaje ź ich raniejšych “paboraŭ”. (U handlovym centry “Parkinh”, la jakoha adbyvaŭsia pikiet, 1 kv.m handlovaha miesca kaštuje dla pradprymalnikaŭ 7 dalaraŭ u dzień).
A Mienharvykankam uviadzieńniem kasavych aparataŭ raźličvaje pavialičyć padatkovyja zyski.
Chto tut maje racyju, a chto krucić? Pavodle bizantyjskaj mentalnaści, “praŭda vyšejšaja za zakon”. Ale praŭda ŭ kožnaha svaja — i ŭ Małachava, i ŭ kiraŭnika Miensku Paŭłava. A zakon jość zakon. Choć i prymajecca jon pad niečym ciskam. Častka pradprymalnikaŭ dahetul hatovaja adstojvać svaje pravy publična, a nie kabinetna, choć druhi metad prynosić vidavočna bolej karyści.
Sustaršynia hramadzkaha abjadnańnia “Pryvatnaja ŭłasnaść”, kiraŭnik mienskaj haradzkoj arhanizacyi AHP Leanid Małachaŭ u sud źjaviŭsia. I atrymaŭ 10 sutak administracyjnaha aryštu “za arhanizacyju niesankcyjanavanaha pikietu”, zhodna z pastanovaj sudździ Savieckaha rajsudu Natalli Skuharovaj. Svaju vinu Ł.Małachaŭ pryznaŭ častkova: niesankcyjanavanaje było chutčej miesca praviadzieńnia akcyi — Kamaroŭka, tady jak harvykankam dazvoliŭ pradprymalnikam pikietavać Banhałor. Ł.Małachaŭ abiacaje pratestavać dalej. Paśla taho, jak adsiedzić 10 načej u kampanii drobnych chulihanaŭ i pjantosaŭ.
Mikoła Buhaj, Aleh Tačony
