Na sajcie Alaksandra Milinkieviča pačali źjaŭlacca pieršyja teleroliki na konkurs «Biełaruś, jakuju nie pakazvaje BT». Konkurs byŭ abvieščany rucham «Za svabodu» i pryniać udzieł u im moža kožny žadajučy. Patrabavańni nastupnyja: źniać siužet nia bolš za 10 chvilin i pamieram da 100 MB, zapampavać jaho na videa‑servis YouTube.com, zarehistravacca ŭ hetym servisie i adasłać spasyłku, karotkuju infarmacyju pra videarolik, kantakty na elektronny adras [email protected]
Z dasłanych pracaŭ pakul lidziruje rolik baranavickaha «maładafrontaŭca» Jarasłava Hryščeni «Spynim razbureńnie Horadni». Jarasłaŭ, suprać jakoha zaviedzienaja kryminalnaja sprava pa artykule 193 KK «Dziejnaść ad imia niezarehistravanaj arhanizacyi», byŭ adnym z samych zaŭziatych abaroncaŭ Horadni. Chłopiec biazvyłazna prabyŭ u tam kala dziesiaci dzion u samy haračy čas.
U nievialikim ustupie da siužetu Hryščenia piša: «Haradziency, u histaryčnym centry horadu usiaho kala 900 starych budynkaŭ. 900 budynkaŭ — heta samy vialiki, pryhožy horadabudaŭničy kompleks va ŭsioj našaj miłaj Biełarusi. Niaŭžo my dazvolim, kab jaho pieraŭtvaryli ŭ vychałaščanaje, nikomu nie cikavaje i pustoje Trajeckaje pradmieście ŭ Minsku. Spadziajusia ŭsim sercam — NIE».
Rolik doŭžycca kala čatyroch chvilin. Za hety čas u kadry źjaŭlajucca haradzienskija krajavidy, staryja słajdy haradzienskich pomnikaŭ architektury, kadry rujnavańnia hetych budynkaŭ, akcyi pratestu, zatrymańni. Čas ad času na ekranie źjaŭlajucca nadpisy kštałtu: «Hetaha bolš niama!», «Były park…» ci «Što budzie nastupnym?». Uvieś rolik supravadžajecca pieśniaj j‑mors «Tak‑cik‑tak».
Pracy na konkurs buduć prymacca da 20 lipienia, padviadzieńnia vynikaŭ i ŭznaharodžvańnie pieramožcaŭ adbudziecca 27 lipienia.
