Kaścian pajšoŭ šlacham Bondar
Mirasłaŭ Adamčyk nie abvierhnuŭ i nie paćvierdziŭ našaj infarmacyi ab tym, što zahad ab jaho pryznačeńni ŭžo padpisany S.Kaścianam. Znachodziačysia ŭ Maskvie, jon nia ŭ kursie taho, što adbyvajecca ŭ Miensku. A ŭ Miensku tym časam u adstaŭku syšoŭ sam S.Kaścian.
Kiraŭnik chołdynhu “LiM” Siarhiej Kaścian na nastupny dzień paśla vychadu artykuła ŭ “NN” abvierh u interviju internet-hazecie naviny.by źviestki ab sychodzie T.Bondar i pryznačeńni M. Adamčyka. Toje samaje zrabiŭ ministar infarmacyi M.Padhajny ŭ kamentary dla subotniaha numaru hazety “Źviazda”. Taisa Bondar, pavodle jahonych słovaŭ, “pa-raniejšamu ŭznačalvaje časopis”. Voś tolki sama T.Bondar jašče ŭ piatnicu ŭ interviju radyjo “Svaboda” paćvierdziła, što jana ŭžo miesiac jak padała ŭ adstaŭku i “zdała ŭsie klučy”...
Jak paviedamili “NN” supracoŭniki chołdynhu, rasparadžeńnie nakont pryznačeńnia M.Adamčyka było vydadziena S.Kaścianam, adnak zahad ministra z hetaj nahody nie źjaviŭsia. Miž tym, kiraŭnik chołdynhu nia maje prava pryznačać redaktaraŭ: usie rašeńni prymajucca na ŭzroŭni ministerstva.
A ŭ paniadziełak ź litaraturnaha chołdynhu pryjšli viestki, što z pradpryjemstva syšoŭ... sam Kaścian. U kreśle dyrektara chołdynhu jaho zamianiŭ namieśnik — Jaŭhien Novikaŭ. Jon achvotna raspavioŭ “NN” pra pieramieny:
— Tak, u Ministerstvie infarmacyi ŭžo padpisany zahad pra toje, što spadar Kaścian nie ŭznačalvaje chołdynh. Pavodle zakonu, jon moh na praciahu troch miesiacaŭ sumiaščać pracu ŭ chołdynhu i vykanańnie deputackich abaviazkaŭ. Kali pryjšoŭ čas vybirać, jon vyrašyŭ viarnucca da deputackaje pracy. Darečy, za ŭvieś čas, pakul S.Kaścian uznačalvaŭ chołdynh, jon nie atrymaŭ ni ad ministerstva, ni ad samoha chołdynhu ni kapiejki — pracavaŭ biez kantraktu, možna skazać, na hramadzkich pačatkach.
Sami supracoŭniki chołdynhu nie vyklučajuć, što padstavaj dla takoha sychodu staŭ skandał vakoł pryznačeńnia hałoŭnaha redaktara “Vsiemirnoj litieratury”. A voś pryčyny jany bačać u starych supiarečnaściach hrupoŭki, jakuju pradstaŭlaje S.Kaścian, ź inšaj płyńniu, da jakoj dałučanyja ministar Padhajny, a taksama hałoŭny redaktar “Sovietskoj Biełoruśsii” Jakubovič i hienerał Čarhiniec. Miž dźviuma hetymi hrupami idzie supiernictva za prava ŭpłyvać na idealahičnuju palityku dziaržavy, a taksama na finansavyja płyni datacyj na ŚMI i systemu adukacyi. S.Kaścian u chołdynhu mieŭ mała siabroŭ, tamu jaho i vyžyli. Ź inšaha boku, jak kadry z chołdynhu sychodziać, tak zaŭtra mohuć i viarnucca.
Jakich jašče źmienaŭ možna čakać ad chołdynhu ŭ najbližejšy čas? Ja.Novikaŭ nie raskryvaje tajamnicy kadravych pierastanovak: hetym, maŭlaŭ, zajmajecca Ministerstva infarmacyi. Pa słovach M. Padhajnaha, jon razhladaje 3 kandydatury na źmienu S. Kaścianu. Na dalejšaje raźvićcio litaraturnych vydańniaŭ u chołdynhu sp.Novikaŭ hladzić aptymistyčna: “My imkniomsia zrabić litaraturnyja vydańni samaakupnymi. Akramia taho, u nas jość śpis aŭtaraŭ — sapraŭdnych patryjarchaŭ biełaruskaj litaratury, tvory jakich nie vydavalisia pa 10—15 hadoŭ. Voś ich my ŭ pieršuju čarhu i budziem drukavać”. Druhim perspektyŭnym kirunkam pracy chołdynhu Ja.Novikaŭ ličyć supracoŭnictva ź filalahičnym fakultetam Biełdziaržuniversytetu: “My zaviazvajem suviazi, budziem drukavać maładych paetaŭ i prazaikaŭ”.
Chołdynh “LiM” pieratvarajecca ŭ nievyčerpnuju krynicu intryh i skandałaŭ.
Arkadź Šanski
