Narodnaje śviata
Sioleta palityčnyja akcyi, prymierkavanyja da Dnia biełaruskaj vajskovaj słavy, byli amal niezaŭvažnymi. Na mitynh-kancert, arhanizavany BNF “Adradžeńnie” na mienskaj płoščy Banhałor, sabrałasia kala sotni ŭdzielnikaŭ. Na mitynh kala Akademii navuk, arhanizavany KCHP-BNF, — pad 70 čałaviek. Imprezy, u jakich śviatočny element pieravažaŭ palityčny, mieli našmat bolšuju papularnaść.
Dzień biełaruskaj vajskovaj słavy za apošnija 10 hadoŭ staŭ sapraŭdnym śviatam dla tych hramadzianaŭ, u jakich žyvie praŭdzivy biełaruski duch. Tamu, niahledziačy na letarhiju palityčnych partyj nacyjanał-demakratyčnaje aryjentacyi, śviatočnyja imprezy prajšli pa ŭsioj krainie.
Tak, u Horadni ŭdzielniki ŭskładali kvietki da memaryjalnaj doški paŭstancam Kaściuški na Novym zamku i ź bieł-čyrvona-biełym ściaham prajšli da pamiatnaha znaku “Pahonia na Hrunvald”, što la Kałožy.
U Zasłaŭi 8 vieraśnia jakraz skančaŭsia fest siaredniaviečnaj kultury “Zasłaŭski nabat”. Jahonaj azdobaj stalisia jak rycarskija bai, tak i vystup ansamblu “Hościca” pad kiraŭnictvam Łarysy Simakovič. Hledačy pabačyli plastyčnyja kampazycyi “Niezvarotnaje”, “Alehoryi Pravialebnaj Panny”, a taksama frahmenty imšy “Himny biełaruskaha Siaredniaviečča”. Vialikaja rycarskaja sieča (buhurt) inscenavała epizod z hramadzianskaj vajny ŭ VKŁ pamiž kniaziami Śvidryhajłam i Žyhimontam, ale heta ŭvodziła ŭ zman chiba tolki ŭłady. Bolšaja častka prysutnych nie chavała taho, što sabrałasia ŭ horad Rahniedy adznačyć Dzień biełaruskaj vajskovaj słavy i pieramohu pad Voršaj. Było bahata muzyki: Uładzimier Puzynia hraŭ na chorumie — instrumencie, jaki jon rekanstrujavaŭ pavodle “Radziviłaŭskaha letapisu”, dźmuŭ u dudu Źmicier Sasnoŭski, śpiavaŭ “Pałac”. Taŭklisia ludzi j vakoł vyjaznoj “ekspazycyi” Brasłaŭskaha krajaznaŭčaha muzeju: tut možna było pajeści blinoŭ, śpiečanych pry tabie ŭ staražytnaj piečy, kupić zroblenyja na miescy hlinianyja hlaki j zbany.
Pad samu Voršu, na Krapivienskaje pole, źjechalisia hości ź Miensku, Bieraścia, Homielu, Horadni, Mahilova, Krupak. Dzień biełaruskaj vajskovaj słavy tut ładziŭsia pa pryncypie narodnaha śviata: biez aficyjnych arhanizataraŭ, sponsarskaj padtrymki, zahadzia padrychtavanaj prahramy. Na Krapivienskim poli nie było aficyjnych pradstaŭnikoŭ palityčnych partyjaŭ, ale panavaŭ biełaruski duch. Pa-biełarusku prymali prysiahu kala Kryža pamiaci skaŭty j “zubry”. Pramaŭlaŭ Uładzimier Arłoŭ, śpiavali Andrej Mielnikaŭ, Źmicier Bartosik, Źmicier Sidarovič, Aleś Muchin-Rabianok, Andrej Łatuškin. Naviedaŭ śviata Barys Chamajda — redaktar viciebskaj hazety “Vybar”, što, jak napisana ŭ vychodnych źviestkach, vydajecca jakraz na Krapivienskim poli. Dziela taho samaha pola pakinuła śviata ŭ Zasłaŭi Aryna Viačorka, jakaja ŭhanaravała ŭdzielnikaŭ aršanskaj imprezy karonami. Karalina Mackievič, što pryjechała na baćkaŭščynu ź Vialikaj Brytanii, śpiavała pieśni z repertuaru lehiendarnaj “Majstroŭni”.
Dzień biełaruskaj vajskovaj słavy pastupova pazbyvajecca floru palityzavanaha i “antyrasiejskaha” śviata. Jon robicca raznastajnym i nasamreč narodnym, zachoŭvajučy pry hetym svoj patryjatyčny charaktar.
Arkadź Šanski
