Delehacyja z krainy I.
U Miensku z tydniovym vizytam znachodzicca ŭradavaja delehacyja krainy I., ź jakoj Biełaruś maje stałyja siabroŭskija suviazi. Vysokija hości naviedvajuć našyja pradpryjemstvy, haspadarki, ustanovy. Z asablivaj cikavaściu i-ckija ŭradoŭcy znajomiacca z dasiahnieńniami našaje medycyny. Delehacyja, što składajecca ŭ asnoŭnym z pradstaŭnikoŭ ministerstva vajskovaj pramysłovaści, ź vialikim zadavalnieńniem naviedała kliniku Navukova-techničnaha instytutu radyjacyjnaj medycyny, NDI jadravaj fizyki, špital 120-j motastrałkovaj dyvizii. Ale asablivaje zachapleńnie ŭ hanarovych haściej vyklikali vyprabavańni artapedyčnaha abstalavańnia siaredniaj i małoj dalokaści, specyjalna dla ich zładžanyja na vajskovym palihonie va Ŭruččy.
Nie abyšłosia i biez naviedańnia śviatych dla kožnaha biełarusa miescaŭ. Rakietna-memaryjalny kompleks “Chatyń” zrabiŭ na haściej nadzvyčajnaje ŭražańnie. Adzinym, chto nia zdoleŭ prasiaknucca ŭračysta-pryŭźniatym nastrojem taho miesca, byŭ naš ministar kultury sp.Kulaka, jaki niepadrobna sumavaŭ z pryčyny adsutnaści svajho i-ckaha kalehi. Tamtejšy ministar kultury, na žal, nia zmoh naviedać našuju krainu, bo čas vizytu jakraz supaŭ z Dniom arabskaha piśmienstva, na jakim jon musova pavinien byŭ prysutničać. Kab nie prapadała viza, zamiest jaho pryjechaŭ kiraŭnik Ministerstva srodkaŭ suviazi j pa sumiaščalnictvie šef vyviedki I. Paśla naviedańnia partyzanskich bazaŭ na Miadzielščynie i muzeju vialikaj ajčynnaj vajny jon, u pryvatnaści, adznačyŭ, što niama dvuch inšych takich miralubnych narodaŭ, jak jahony i biełaruski. U časie pramovy jon abvierh čutki, što raspuskajucca pra I. “zmaharami za demakratyju”, skazaŭšy, što jahonaja kraina nia maje ni zbroi masavaha źniščeńnia, ni abstalavańnia dla jaje stvareńnia, ni žadańnia zajmacca takimi spravami. Ale kali ZŠA navažacca na jadravy ŭdar, I. adkaža tym samym.
Abvierh jon taksama plotki pra vajskova-techničnaje supracoŭnictva ź Biełarusiaj. Jahonyja słovy paćvierdziŭ i staršynia Federacyi biełaruska-i-ckich prafsajuzaŭ K.Łozik, jaki rezka raskrytykavaŭ Kamitet pa sankcyjach AAN, što zamaroziŭ pastaŭku ŭ I. mirnaha hruzu: niekalkich tysiačaŭ žyćciova nieabchodnych tam aŭtamabilaŭ i traktaroŭ šyrokaha prymianieńnia.
Ale, niahledziačy ni na što, supracoŭnictva našaj krainy ź I. raźvivajecca — navat u spartovaj sfery. Čakajecca, što ŭ časie nastupnaha vizytu K.Łozika ŭ I. ź im pajedzie hrupa ekspertaŭ-spartoŭcaŭ ź mižnarodnaha Kamitetu dapamohi bijatlanistam (KDB), jaki ŭznačalvaje ciapier Leanid Jeryn. Jany paviazuć u siabroŭskuju krainu medabstalavańnie i leki, a traktary šyrokaha prymianieńnia palatuć svaim chodam śledam za ichnym samalotam.
P.S.: Eksperty ź Biełdziaržkanservatoryi zajavili, što ŭsie noty pratestu, dasłanyja z amerykanskaha pasolstva, vyjavilisia falšyvymi.
Siarhiej Mikulevič
