***
Carkva ŭ vahonie...Pra himnaziju zabylisia...Rabiecie staŭki, barysaŭcy!...Kalehijum adnoviać...Anhielcy nabyli dom...Aštrafavali niemca...Avaryja na rahu... Haradzienski adkaz Pucinu...Biznes viciebskich astrolahaŭ...Prezentacyja makietaŭ...Łaman u muzei Šmyrova...Mylnyja mianiały...Začyniŭsia “Volny horad”...Staviać carkvu...Bahatyja białyniččanie...Lekar z huzikami...Pahanskaja eŭraintehracyja
Carkva ŭ vahonie
U vajskovych haradkach Barysava adčyniajucca pravasłaŭnyja cerkvy. Tak, u Ladziščach źjaviŭsia chram Śv.Hieorhija. U carkvu pieratvaryli... čyhunačny vahon: zrabili hanak, na dachu prymacavali kryž, a vokny zakratavali. Słužyć tam ajciec Andrej Šabałoŭski. Pavodle jahonych słovaŭ, pieraabstalavańnie vahonu ŭ carkvu — zvyčajnaja praktyka. U inšym vajskovym haradku Barysava — Piačach — budaŭnictva pravasłaŭnaj carkvy Śv.Dźmitryja Danskoha jašče nia skončanaje. Jana, u adroźnieńnie ad ladziščynskaj, budzie mieć tradycyjny vyhlad — z kupałami dy zvanicaju.
Pra himnaziju zabylisia
U Barysavie na 150 tys. žycharoŭ tolki adna navučalnaja ŭstanova, dzie vykładańnie viadziecca całkam pa-biełarusku — 2-ja himnazija. Pracuje jana ŭžo 11 hadoŭ. Vučycca tam 820 čałaviek. Himnazija zaznaje ciažkaści ad niedachopu biełaruskamoŭnych padručnikaŭ dy prablemaŭ z ramontam staroha budynku. Rasiejskamoŭnuju 1-ju himnaziju całkam adramantavali da 900-hodździa Barysava, a pra 2-ju niejak zabylisia.
Rabiecie staŭki, barysaŭcy!
U chutkim časie ŭ Barysavie źjavicca pieršaje kazyno. Jaho planujecca raźmiaścić na pieršym paviersie restaracyi "Biarezina".
Aleh Skatarenka, Barysaŭ
Kalehijum adnoviać
Restaŭracyja byłoha jezuickaha kalehijumu pačniecca ŭ chutkim časie ŭ Voršy. Adnoŭleny pomnik architektury ChVII st. stanie daminantaj u histaryčna-kulturnym centry horadu. U 1842 h. jezuickija mury byli prystasavanyja pad turmu, jakaja praisnavała ŭ ich da 1989 h. U dvuchpaviarchovym budynku raźmieściacca muzei pryrody i mastactva, vystaŭnyja zali, majsterni miascovych mastakoŭ, kaviarni. Upryhožańniem miesta musić stać adnoŭlenaja vieža z hadzińnikam.
Anhielcy nabyli dom
Novaje žyllo atrymaŭ siamiejny dziciačy dom Haŭryłaŭcoŭ u Voršy. Srodki na nabyćcio šykoŭnaha dvuchpaviarchovaha katedžu dy prysiadzibnaha ŭčastku vydatkavała anhielskaja dabračynnaja arhanizacyja “Nadzieja i damy — dzieciam”. Siamiejny dziciačy dom Nadziei i Vasila Haŭryłaŭcoŭ źjaviŭsia 7 hadoŭ tamu i naličvaje dziesiać dziaciej ad 5 da 18 hadoŭ. Pakul jon adziny ŭ Voršy. Brytanskaja arhanizacyja za 2,5 hady pracy ŭ Biełarusi nabyła žyllo dla 15 siamiejnych damoŭ, u jakich vychoŭvajecca 130 dziaciej.
Aštrafavali niemca
Pradstaŭnik niamieckaj firmy “Štoc-Ahra-Servis”, što aranduje ziamlu ŭ kałhasie imia Čapajeva (Aršanščyna), aštrafavany inspekcyjaj pa ekalohii za samavolnaje spaleńnie sałomy, zabaronienaje našym pryrodaachoŭnym zakanadaŭstvam. Adnak štrafu 277 tys. rubloŭ Klaŭs Plotc pakul nie zapłaciŭ. Ciapier jon vyrašaje pytańnie ad padaŭžeńni vizy na znachodžańnie ŭ Biełarusi.
Avaryja na rahu
Na rahu aršanskich vulic Savieckaj i Zamkavaj sutyknulisia “žyhuli” j “KamAZ”. Dziakuj Bohu, kiroŭcy dy pasažyry nie paciarpieli. Hruzavik vyjechaŭ na tratuar dy ŭrezaŭsia ŭ kaviarniu “Zamkavuju”. Asnoŭny ŭdar pryniaŭ na siabie stylizavany kantrafors.
Viktar Lutynski, Vorša
Haradzienski adkaz Pucinu
Haradzienskaja arhanizacyja BNF źbirajecca ładzić pikiety pad lozunham “Za niezaležnaść” suprać prapanovy rasiejskaha prezydenta Pucina ab uklučeńni Biełarusi ŭ skład Rasiei. Adbuducca jany 16 listapada z 11 da 13-j na prypynku kala handlovaha domu “Bieraście” i kala Domu suviazi. Mierapryjemstva projdzie ŭ ramkach ahulnabiełaruskaj akcyi 17 listapada.
Andrej Mialeška, Horadnia
Biznes viciebskich astrolahaŭ
Viciebski centar markietynhu prapanuje novuju pasłuhu: astralohiju biznesu. Tam možna zamović strukturny analiz firmy, prahnoz u sfery dziejnaści i adpaviednuju acenku persanału. Asnoŭnaje značeńnie nadajecca haraskopu času rehistracyi firmy, tamu viciebskim biznesmenam rekamendavana źviartacca da astrolahaŭ jašče da pačatku asnoŭnaj dziejnaści.
Prezentacyja makietaŭ
6 listapada ŭ Viciebsku adbyłasia prezentacyja architekturnaha makietu źniščanaj u 1985 h. zabudovy častki praspektu Frunze ŭ rajonie Letniaha amfiteatru. Stvaryli makiet architektary Aleś Vaškievič i Alaksandar Michalukoŭ pry ŭdziele Ihara Ciškina, jaki zabiaśpiečvaŭ historyka-archiealahičnuju častku dośledaŭ. Try budynki, uznoŭlenyja ŭ maštabie 1:50, byli architekturnymi pomnikami XVII—XVIII st. Źnieści ich zahadaŭ tahačasny hałoŭny architektar Uł.Andarałaŭ — dziela spraščeńnia ruchu tralejbusaŭ. Prezentacyja planšetu z makietami adbyłasia ŭ kaviarni “Alhierd”, blizka miesca, dzie niekali stajali architekturnyja pomniki.
Łaman u muzei Šmyrova
8 listapada ŭ muzei Šmyrova adbyłasia sustreča z aktoram Kołasaŭskaha teatru Piatrom Łamanam. Jaje arhanizavała supracoŭnica muzeju Taciana Maranava, jakaja niadaŭna pierajechała ŭ Viciebsk ź Jeziaryšča. Ź jejnym źjaŭleńniem u muzei viadomaha partyzana ŭpieršyniu zahučała biełaruskaja mova. Padčas sustrečy bard Leanid Maranaŭ praśpiavaŭ svaje pieśni na vieršy Piatra Łamana.
Michał Čarvinski, Viciebsk
Mylnyja mianiały
Nie pašancavała kiroŭcu Smurhonskaha zavodu aptyčnaha stankabudavańnia. U łaźni, jamu terminova spatrebilisia biełaruskija rubli. U kišeni byli tolki sto dalaraŭ. Pamianiać hrošy vyzvalisia dva vypadkovyja znajomcy. Niaciažka zdahadacca, što mianiajuć jany ich dasiońnia.
Marjan Vianhroŭski, Astraviec
Začyniŭsia “Volny horad”
Numar ad 1 listapada zaviaršyŭ saboj vydańnie kryčaŭskaha niezarehistravanaha tydniovika “Volny horad”. Pryčynaj zakryćcia stalisia finansavyja prablemy. Za ŭvieś čas isnavańnia, z 1998 h., śviet pabačyli 109 numaroŭ “Volnaha horadu”, jakija drukavalisia ŭ smalenskaj drukarni j raspaŭsiudžvalisia siarod žycharoŭ Kryčaŭščyny.
Andrej Kuźmin, Kryčaŭ
Staviać carkvu
Pravasłaŭnuju carkvu na 10 kupałoŭ uzvodziać u Białyničach na miescy, dzie niekali stajaŭ karmelicki kaścioł. Budynak kaściołu byŭ zrujnavany ŭ 1967 h. pry dapamozie piratechnikaŭ ź Leninhradu. Na pačatku hodu budaŭnictva carkvy było abvieščana na Białyniččynie ŭsienarodnaj spravaj. Na achviaravańni białyničanaŭ užo pastaŭleny zrub bažnicy. Ciapier specyjalisty ź Miensku vyrablajuć kupały. Na heta treba 10 kuboŭ draŭniny i tona miedzi. Kaštujuć dach i kupały bolš za 35 młn. rubloŭ.
Bahatyja białyniččanie
Pavodle infarmacyi administracyi białynickaj filii №701 AAT “Biełarusbank”, z pačatku hodu depazyty ŭkładčykaŭ filii ŭ nacyjanalnaj valucie vyraśli na 82%, a ŭ zamiežnaj — na 26%. Jany vymiarajucca sumami ŭ 468,6 młn. rubloŭ i 242,3 tys. umoŭnych adzinak. U pieraliku na kožnaha žychara rajonu heta składaje pa 19525 rub. i 10,1 u.a.
Bazyl Lićvinovič, Białyničy
Lekar z huzikami
U Čavusach try dni hastralavaŭ tak zvany narodny lekar Uładzimier. Lačyŭ jon šlacham unušeńnia i sapraŭdy biaspłatna, zatoje “zamoŭlenyja” huziki, bułaŭki i śviečki pradavaŭ pa 6000 rubloŭ za kožnuju.
“Iskra”, Čavusy
Pahanskaja eŭraintehracyja
Asiarodak biełaruskich pahancaŭ Ģega Ruch — Kryuskaja Draugija Druvingau byŭ załučany ŭ skład paneŭrapiejskaha rušańnia Heathen Front u jakaści Kryŭskaj filii. Adnym ź lideraŭ i ideolahaŭ Frontu źjaŭlajecca słynny narveski dziajač i muzyka Varh Vikiernes, jaki ciapier adbyvaje termin u viaźnicy za zabojstva satanista. Rasiejskija neapahancy mieli namier stvaryć usiesłavianskaje zadzinočańnie, kudy, pavodle ich mierkavańnia, musili ŭvajści j biełaruskija prychilniki staraviečnych kultaŭ. Adyli, zvažajučy na naležnaść našaha kraju da Prybałtyjskaha historyka-kulturnaha rehijonu i bałckuju dachryścijanskuju tradycyju, kryŭskija druvinhi admovilisia ad supracy pad słavianskaju ehidaju.
Alaksiej Dziarmanis, Miensk
Kamientary