***
Alehu A ź Miensku. Padručniki z klasyčnaha pravapisu najpraściej znajści ŭ Internecie: Branisłaŭ Taraškievič “Biełaruskaja hramatyka dla škoł” http://txt.knihi.com/taraskievic/hramatyka; Vincuk Viačorka “Pišam taraškievicaju. 10 pamiatak biełaruskaha pravapisu” http://www.nn.by/1998/18/04.htm. Tamsama jość i “Słoŭnik biełaruskaje movy (klasyčny pravapis)” http://slounik.hypermart.net/.
Aŭtaru “Tralejbusa”. Heta jašče nie hazetnaje apaviadańnie. Pišacie choraša, stryžań u Vas mocny. Trenirujciesia, zmušajučy siabie pisać u klasyčnych žanrach. A hetuju štučku addajcie ŭ litaraturnuju hazetu ci vydańnie dla junakoŭ.
Tedzie Li. Praciahu muzyčnych recenzij my ad Vas tak i nie dačakali. Pytańnie ź pieršaj porcyjaj: čamu mienavita hetyja, a nia inšyja albomy recenzujucca? Kali b heta była recenzija na “dva najlepšyja albomy minułaha miesiaca”, pajšło b cikaviej. Što da stylu: kali daješ stolki anhielskaha tekstu, varta pakłapacicca pra jakasny pierakład. Nia ŭsie ž čytačy dobra viedajuć pa-anhielsku.
Arciomu A. z Veclara. Hatovyja nadrukavać afaryzmy Kafki, kali dašlecie nam aryhinał (u elektronnym vyhladzie — tekstavym fajłam ci skanavanaj karcinkaj — abo kserakopijaj). U Miensku my jaho nie adšukali.
Siarhieju B. z Homiela. “Limeryki lićvinaŭ” — materyjał dla časopisu. Prapanujcie “Arche” ci “Dziejasłovu”.
Hiervaziju. Heta jašče nie ese: jano zamałoje, a sens, układzieny ŭ jaho, budzie zrazumieły tolki ludziam, blizka z Vami znajomym.
Nastaśsi M. ź Miensku. Vaš “Šarścin” napisany ŭ rečyščy biełaruskaj litaratury 90-ch. Jon nia horšy, ale j nia lepšy ad jakoha-niebudź “Babčyna”. Takija tvory mohuć trapić na staronki “NN” tolki ŭ jakaści vyklučeńnia. Vy zamaładaja, kab my mahli zrabić takoje vyklučeńnie Vam. Vy napisali svoj tvor, nie vychodziačy z kvatery. Jon nie niasie vialikšaj intelektualnaj nahruzki, jahonamu stvareńniu nie papiaredničali “palavaja praca”: siadzieńnie ŭ biblijatecy, ryzykoŭnyja hutarki ź ludźmi, zbor ciažkadastupnaj infarmacyi. Kali pačatkovy kapitał nastolki mizerny — dziciačyja ŭspaminy, nia ŭkrytyja pacinaj žyćciovaha dośviedu, dyk i dadanaja vartaść nia moža vyjści vialikaj. Vy dobra pišacie, u Vas pieknaja mova. Ciapier Vam užo nie iści za ajčynnymi ŭzorami, a vučycca na dobraj — i paśpiachovaj — pierakładnoj litaratury.
Aŭtaru “Textasy”. Vy majecie racyju: z hetaha sapraŭdy vyjdzie spraŭny pačatak pseŭdahistaryčnaha pseŭdadetektyvu albo eratyzavanaha apaviadańnia.
Piatru D. ź Vialikaha Siała. Dobra było b, kab vy stała pisali nam pra toje, što dziejecca ŭ Vašych krajach.
Uładziu H. ź Viciebsku. Vašaje apaviadańnie: maci ad čužych ludziej daznajecca, što jaje syn — biełaruskamoŭny. Sytuacyja nadumanaja. Niejkaja niaŭdałaja fantasmahoryja.
K.T. z Mahiloŭskaj vobł. Adnosiny pamiž kiraŭnikami dziaržavaŭ, jak i miž ludźmi naahuł, musiać vyznačacca nie ekanamičnym stanoviščam, a čałaviečaj hodnaściu i ŭzajemapavahaj.
Mikałaju H. z Maładečna. Zvarotaŭ da prezydenta Biełarusi “NN” nie drukuje. Materyjały Vašaje spravy pieradamo ŭ Pravaabarončy centar “Viasna”.
Vijalecie P. z Kastrycy. “NN” stała pisać pra palityku bolej, bo niezaležnych vydańniaŭ, jakija pra jaje pišuć, niašmat. Pra “mastactva” pišam nia mienš. Teleprahrama aščadžaje hrošy: čytačam nie davodzicca da “NN” kuplać jašče niejkuju hazetu admysłova dziela prahramy. A ŭ nas čałaviek moža čytać jaje pa-biełarusku klasyčnym pravapisam. Takoha bolš ni ŭ jakoj hazecie niama.