Usie roŭnyja, ale jość raŭniejšyja

Pradstaŭnikoŭ demakratyčnych partyjaŭ i niaŭradavych arhanizacyj nie ŭklučyli ŭ terytaryjalnyja kamisii na miascovyja vybary.

10 śniežnia sakratar Centravybarkamu Mikałaj Łazavik padvioŭ rysu pad farmavańniem terytaryjalnych vybarčych kamisijaŭ. U krainie stvoranyja 1673 kamisii, u jakija ŭvajšli 13448 čałaviek. Hetyja ludzi buduć atrymlivać zarobak z raźliku siaredni pa krainie plus 10% “za škodnaść”. Naličvacca jon budzie za faktyčna adpracavanyja ŭ kamisii dni.

Siarod siabroŭ kamisijaŭ 11% — moładź da 30 hadoŭ, 56,46% majuć dośvied takoj pracy. Zhodna z zakanadaŭstvam, try subjekty majuć prava vyłučać kandydataŭ u kamisii: palityčnyja partyi (j hramadzkija arhanizacyi), pracoŭnyja kalektyvy dy hramadzianie praz zbor podpisaŭ. “Usie try subjekty aktyŭna skarystalisia svaim pravam”, — kaža M.Łazavik. Ale čamuści pradstaŭnikoŭ demakratyčnych partyjaŭ u kamisijach vobmal: 1 liberał z AHP dy adzin siabar BNF. Zatoje KPB maje ŭ kamisijach 21 pradstaŭnika, Partyja kamunistaŭ Biełaruskaja — 19, partyja Hajdukieviča — 11, Narodnaja Hramada — 5, Ahrarnaja partyja — 2. Pa adnym čalcy majuć Biełaruskaja patryjatyčnaja partyja dy Sacyjał-demakratyčnaja partyja narodnaj zhody.

Chto vinavaty?

M.Łazavik kaža, što mnohija palityčnyja partyi sami siabie zahnali ŭ kut. “Najpieršaja pamyłka — vyłučeńnie kandydataŭ u kamisii respublikanskimi kirujučymi orhanami”. U jakaści prykładu sakratar CVK pryvioŭ historyju z Alaksandram Fiadutam, jakoha ŭ skład Mienskaj haradzkoj kamisii vyłučyŭ respublikanski kamitet arhanizacyi “Jabłoko”: “My žadali b bačyć hetaha čałavieka ŭ kamisii. Ale Fiadutu vyłučyli kandydatam nie ad haradzkoj, a ad respublikanskaj arhanizacyi. Tamu jon nie ŭvajšoŭ u kamisiju, chacia tam jaho ličyli ŭžo ledź nie svaim čałaviekam”.

Paprasić niaŭdačlivaha pretendenta pierarabić papiery ŭ vykankamie, viadoma, nie zdahadalisia.

Kiravanaja demakratyja

U Partyi kamunistaŭ takich prablemaŭ nie ŭźnikła, tamu PKB i praviała ŭ kamisii 19 čałaviek. Praściej kažučy, pierš čym iści na vybary, treba pačytać Vybarčy kodeks: jakim by drennym jon nia byŭ, zakon jość zakon.

Adkazny sakratar Upravy BNF Alaksiej Kavalec paśmichajecca: “Nia viedaju, što tam u Fiaduty i kamunistaŭ, a našych pradstaŭnikoŭ siekli pad lubymi padstavami i biez padstavaŭ. My vyłučyli pa Biełarusi ŭ kamisii za 60 čałaviek, i tolki adzin tudy trapiŭ. Choć našy pradstaŭniki byli pieršymi ŭ śpisach i vyłučalisia ad miascovych supołak. U nas jość źviestki jak z rehijonaŭ, tak i ź Miensku, što składzienyja ŭžo śpisy ludziej, jakich u vykankamach nazyvajuć “deputatami”, -- kaža A.Kavalec.

Mahčymaje niepryznańnie vybaraŭ mižnarodnaj supolnaściu CVK nia duža chvaluje. “Drenna, kali Zachad nie pryznaje vybaraŭ. Ale ž nie pryznaŭ prezydenckija — my niejak pieražyli. Nu, i što zdarycca, kali Zachad nie pryznaje niejkaha sielsavietu?” -- pakieplivaje sakratar CVK.

Standartaŭ niama

M.Łazavik nia viedaje, čamu Biełaruś admoviłasia padpisać Kanvencyju ab standartach demakratyčnych vybaraŭ krainaŭ SND. Staršynia CVK Rasiei Alaksandar Viešniakoŭ vykazaŭ nieparazumieńnie, čamu Biełaruś “u asobie prezydenta raptoŭna admoviłasia padpisać hety dakument”. A.Viešniakoŭ miarkuje, što šerah pałažeńniaŭ biełaruskaha vybarčaha zakanadaŭstva treba karektavać. Staršynia CVK Lidzija Jarmošyna apanuje rasiejskamu kalehu: "Vybarčaje zakanadaŭstva całkam adpaviadaje Kanvencyi”. Čamu ž tady nie padpisać?

“Kanvencyja ab standartach demakratyčnych vybaraŭ — toj dakument, nad jakim my pracavali vielmi napružana ciaham dvuch hadoŭ. Hety dakumient całkam nas zadavalniaje i nijakich dadatkovych pieraškodaŭ dla pracy Centravybarkamu nie stvaraje. Čamu jon nie padpisany Biełarusiaj — pytańnie nie da mianie”, -- padkreśliŭ M.Łazavik.

Treba adzinadušnyja saviety

Sakratar Centravybarkamu pierakanany, što “parušeńniaŭ u časie farmavańnia kamisijaŭ nia vyjaŭlena”. Apazycyja ž peŭnaja: pry takim składzie kamisij nichto nie zastrachavany ad falsyfikacyjaŭ.

Kiraŭnik vybarčaha štabu PKB Alaksandar Pachłopka kaža, što “ŭ niekatorych abłaściach, da prykładu, u Homielskaj, niahledziačy na incydenty ŭ Rečycy, Mazyry, Kalinkavičach, kamisii farmavalisia bolš demakratyčna, čym minułym razam. Haradzienščyna ž jak była, tak i zastajecca apłotam ułady”. A.Pachłopka peŭny, što falsyfikacyi nia tolki byli ŭ časie farmavańnia kamisijaŭ, ale niepaźbiežnyja i nadalej. “Što kazać, kali navat mnohija siabry našaj partyi — z tych, na kaho možna nacisnuć. Samaja biezabaroniennaja katehoryja — nastaŭniki; na asnovie nastaŭnikaŭ buduć nia tolki stvaracca kamisii, ale mienavita ich buduć pchać u deputaty, stavić na čale savietaŭ. Napiaredadni referendumu ab trecim terminu ŭładzie znoŭ patrebnyja adzinadušnyja saviety, jakija toj referendum padtrymajuć”, -- zajaviŭ A.Pachłopka.

Hleb Chmialnicki

• 0
• 0
• 0
• 0
• 0
• 0
• 0
• 0