Kropla kamień točyć

Paspaborničać za 30 deputackich mandataŭ u Aršanski harsaviet vyrašyli 97 kandydataŭ. 49 ź ich byli vyłučanyja pracoŭnymi kalektyvami, 28 — zboram podpisaŭ i 20 — miascovymi arhanizacyjami palityčnych partyj.

Z roznych padstavaŭ haradzkaja kamisija pa vybarach admoviła ŭ rehistracyi 6 pretendentam. U paraŭnańni ź minułymi vybarami ŭ saviety sioleta nazirajecca vialikaja aktyŭnaść partyjcaŭ. Bolš za ŭsich kandydataŭ vyłučyła BSDP (NH) — 14. Siarod ich 5 — šlacham partyjnaha vyłučeńnia, 2 — šlacham zboru podpisaŭ, jašče 7 pradublavali svajo vyłučeńnie i partyjnym śpisam, i zboram podpisaŭ. 8 kandydataŭ vyłučyła miascovaja arhanizacyja AHP, ale zarehistravali tolki čatyroch. Usie jany išli praz zbor podpisaŭ. 3 kandydaty mieła PKB i 2 — ŁDPB. U minułyja vybary aktyŭnaść hetych partyj u Voršy była bolšaja.

Usie 49 kandydataŭ, vyłučanych pracoŭnymi kalektyvami, — heta ludzi ŭłady. Siarod ich niama nivodnaha partyjca, zatoje 8 pradastaŭnikoŭ «Voršažyłfondu». I chto heta vyrašyŭ vyłučać kamunalščykaŭ, zdaŭna nielubimych narodam? Ci ź ich vybarami ŭ harsaviet źjavicca ŭ kvaterach ciapło ŭzimku i haračaja vada ŭletku? Sumnieŭna. Astatnija vyłučency ad ułady — načalniki ŭsich uzroŭniaŭ. Paśla rehistracyi na kožnuju akruhu prypadała ŭ siarednim pa try kandydatury. Tolki dźvie byli biezalternatyŭnyja (na minułych vybarach — 10).

Zdavałasia, sioletnija vybary ŭ Voršy pavinny być napružanymi j cikavymi. Ale nie paśpieła «Aršanskaja hazieta» nadrukavać śpis kandydataŭ, jak u kamisiju pasypalisia zajavy achvotnych źniać kandydatury. Na hety momant admovilisia ad baraćby 30 čałaviek. Siarod ich i tyja, kaho vyłučyli pracoŭnyja kalektyvy (časam biaź ich zhody i žadańnia), siabry partyjaŭ. Praz žorstki presynh z boku ŭłady j administracyi admovilisia kamunist Siarhiej Šaŭroŭ, načalnik adździełu na piŭzavodzie, dyrektarka SŠ №3 Halina Daško dy inšyja. Užo na 11 lutaha dziesiać akruhaŭ stali biezalternatyŭnymi, u adzinaccaci zastałosia pa dva kandydaty, u siami — pa try i ŭ dźviuch —pa čatyry.

Ale ŭ kandydatach zastalisia najbolš upartyja i daśviedčanyja ŭ palityčnaj baraćbie ludzi. Siarod ich — siabra BSDP (NH) nastaŭnik Siarhiej Trafimaŭ. Jašče napiaredadni vybarčaj kampanii jon zaŭvažyŭ parušeńni, zroblenyja harvykankamam padčas farmiravańnia vybarčych učastkaŭ. Dla razhladu jaho skarhi ŭ Voršu pryjaždžali pradstaŭniki Centravybarkamu. Jak niezaležny kandydat balatujecca ŭ harsaviet staršynia Aršanskaj TBM Jury Nahorny — dyrektar SŠ №22, siabra niezarehistravanaj ASDP. Surjoznuju kankurencyju jamu składzie zavuč susiedniaj škoły. Cikava, što akruhaŭ, dzie buduć kankuravać nastaŭniki, pa horadzie niekalki. Mo tamu, što na nastaŭnikaŭ lahčej za ŭsio cisnuć?

Ź ciapierašniaha składu harsavietu «słuhami narodu» pažadali zastacca ŭsiaho 12 deputataŭ, praŭda, niekatoryja ź ich balatujucca pa inšych akruhach. Harsaviet, choć byŭ całkam namenklaturny, ale nie «kišenny» dla vertykali. Chodziać čutki, što jana žadała b bačyć u kreśle staršyni harsavietu bolš padatlivaha čałavieka.

[Trafimov.jpg "Siarhiej Trafimaŭ"] Z vybarami ŭ Aršanski rajsaviet karcina bolš zrazumiełaja. Z 37 akruh 28 biezalternatyŭnyja i tolki ŭ 9 zarehistravanyja pa 2 kandydaty. Siarod ich — vyłučency PKB i BSDP (NH). Ale jość biezalternatyŭnyja akruhi, dzie zarehistravanyja siabry PKB. Praŭda, ichniaja apazycyjnaść nievialikaja, bo adzin — staršynia sielsavietu, druhi — ahranom. Pieravažnaja bolšaść kandydataŭ — staršyni sielsavietaŭ dy kałhasaŭ, dyrektary dziaržpradpryjemstvaŭ dy navučalnych ustanoŭ.

Niejkaja intryha moža być tolki ŭ dźviuch akruhach. U 1-j Vysokaŭskaj balatujecca kiraŭnik Aršanskaha pradstaŭnictva BCHK Vasil Bieraśnieŭ. A ŭ Barzdoŭskaj — nastaŭnik Valery Piačonkin, były dyrektar Barzdoŭskaj škoły-sadu (pajšoŭ z pasady letaś), stvaralnik najlepšaha ŭ krainie školnaha muzeju «Historyja rodnaj vioski». Jon vyłučany zboram podpisaŭ. Jaho kankurentam staŭ ciapierašni dyrektar škoły, staršynia Aršanskaj arhanizacyi aŭhancaŭ Uładzimier Kuźmiankoŭ, jakoha vyłučyŭ pracoŭny kalektyŭ Aršanskaj sielhaschimii. Za deputacki mandat buduć zmahacca načalnik i padnačaleny. Ale Piačonkin zdymać svaju kandydaturu nie źbirajecca. I kali vyniki hałasavańnia nie sfalsyfikujuć, Piačonkin lohka stanie deputatam, bo jaho tut dobra viedaje kožny vybarnik.

Za 8 deputackich mandataŭ Viciebskaha abłsavietu vykazali žadańnie pazmahacca 22 kandydaty, bolšaść ź ich taksama kiraŭniki. Siarod vyłučanych adzin kamunist-kalakiniec i try sacyjał-demakraty. Zarehistravany i kiraŭnik miascovaj supołki BSDP (NH), indyvidualny pradprymalnik Alaksandar Stalaroŭ. Jon idzie pa akruzie, dzie balatujucca namieśnik načalnika Viciebskaha abłasnoha ŭpraŭleńnia MNS Alaksandar Lipataŭ i dyrektarka škoły-himnazii №19 Natalla Kochava. Pikantnaść sytuacyi ŭ tym, što ŭ hetaj škole MNS maje kadeckija klasy.

Z zaklikam bajkatavać vybary źviarnułasia da aršancaŭ supołka KCHP—BNF. Lidery inšych demakratyčnych partyj (u horadzie niama nizavych struktur Partyi BNF, jak, darečy, i KPB) planujuć zaklikać ludziej nie chadzić na tyja «biezalternatyŭnyja» vybarčyja ŭčastki.

Składam budučyja saviety mo i nia buduć nadta roźnicca ad ciapierašnich. Mo nivodny z apazycyjnych kandydataŭ nia stanie deputatam. Ale plon ad vybarčaj kampanii budzie. Ludzi daviedajucca pra isnavańnie ŭ horadzie supołak demakratyčnych partyj, dyj infarmacyja, jakuju paniasuć niezaležnyja kandydaty vybarščykam, budzie roźnicca ad toj, jakoj «kormić» aficyjnaja prapahanda.

Jaŭhien Žarnasiek, Vorša