U Siecivie bahata prapanovaŭ kštałtu «prafesijny mastak namaluje Vaš partret za nievialikija hrošy».
Možna zachoŭvać hrošy, nabyvajučy valutu ci zołata. Inšaje vyjście — prydbać akcyi ci adkryć rachunak u banku. A jak nakont taho, kab ukłaści hrošy ŭ razmalavany kavałak pałatniny? Dla nas heta varjactva, ale znakamityja bahaciei daŭno zrazumieli, što tvory mastactva dobra prydajucca dla investycyjaŭ. Z časam jany tolki daražejuć dy amal zaŭsiody znachodziać pakupnika. Kali heta tvory sapraŭdnaha mastactva.
U nas niama svajho aŭkcyjonu nakštałt znakamitaha «Sotheby's», ale mastacki rynak u Biełarusi isnuje. Najlepš heta adčuvajuć sami mastaki, jakim davodzicca kiravać svajoj tvorčaj enerhijaj u zaležnaści ad vahańniaŭ spažyvieckaha popytu dy źmienaŭ padatkovaha klimatu.
Mastaki-pradprymalniki
Kab pradavać pracy z vystavaŭ ci ŭ halerejach, mastak afarmlaje papiery na atrymańnie statusu indyvidualnaha pradprymalnika. Davodzicca płacić adziny padatak (ad 20 eŭra ŭ miesiac) i składki na abaviazkovaje sacyjalnaje strachavańnie (kala 12 eŭra ŭ miesiac). Ale pradprymalnikam, jakija majuć jašče adno miesca pracy, zakon dazvalaje nie płacić «sacyjałki», tamu mastaki najmajucca vieści dziciačyja hurtki i h.d.
Mastaku treba majsternia. Ciapier u lubym ŽREU jość volnyja pamiaškańni. Praŭda, arenda płoščy dla vytvorčaj dziejnaści paciahnie 5 eŭra za m2 u stalicy i 2,5 eŭra — u abłasnych centrach. I volny mastak, jaki maje ŭ Miensku majsterniu ŭ 15 m2, musić płacić štomiesiac amal 110 dalaraŭ (uklučna z padatkami na pradprymalnickuju dziejnaść). Praŭda, prezydencki zahad №495 pakidaje lhoty dla siabroŭ tvorčych sajuzaŭ (im arenda ŭ 5 razoŭ mienšaja).
Pa halerejach
Mastackaja halereja j mastacki salon — roznyja rečy. U pieršyja chodziać, kab pahladzieć na tvory, u druhija — kab da ich prycanicca.
Karcina, napisanaja alejnymi farbami, kaštuje ŭ mienskich mastackich salonach ad 400 tys. da 2 młn. rubloŭ (pamier — prykładna 1,3ch1 m). Karciny viadomych mastakoŭ — Toŭścika, Ščamialova —kaštujuć ad 3—4 młn. A nievialikuju akvarel (20ch15 sm) možna nabyć i za 20—30 tys. Batyk kaštuje pad 130 tys. rubloŭ (40ch55 sm). Avanhardny kieramičny serviz možna prydbać za 100—130 tys. Aryhinalnyja pradmiety dla interjeru kaštujuć 20—150 tys. Nia błytajcie z mastackimi salonami «modnyja» suvenirnyja kramy. U apošnich pradajuć pa niemałoj canie vyraby, što nabyvajuć za miažoj pa mizernym košcie. Tvoraŭ biełaruskich mastakoŭ na realizacyju kramy nie biaruć. Ich cikaviać aptovyja partyi, a nie ŭnikalnyja pracy.
Tutejšyja Manmartry
Mienski art-rynak uvieś čas vandruje. Spačatku jon mieściŭsia na praspekcie Skaryny la halerei «Mastactva», potym pierajechaŭ na płošču Svabody. Kali raspačali adnaŭlać mienskuju ratušu, mastakoŭ ucisnuli pamiž muzejem Vialikaj Ajčynnaj vajny dy Pałacam prafsajuzaŭ. Novy «Vernisaž» schavany ad vačej pakupnikoŭ dy znachodzicca na skryžavańni kanalizacyjnych trubapravodaŭ. Niezadavolenyja mastaki padalisia byli da ŭnivermahu «Biełaruś», ale tam handal išoŭ jašče horš.
Na «Vernisažy» vobmal mastackich tvoraŭ — adno ramieśnictva. Nasamreč, tam i mastakoŭ niebahata. U asnoŭnym realizatary, jakija pradajuć zroblenaje inšymi (pavodle papieraŭ, viadoma, na «Vernisažy» pracujuć spres tvorcy). Siaredniaja cana karciny, napisanaj alejem, — 50 dalaraŭ. Možna adšukać jak maleńkija karcinki za 10—20 dalaraŭ, hetak i vializnyja za 300 z hakam.
Praz Internet
U biełaruskim Siecivie ŭsiaho niekalki virtualnych halerejaŭ, ekspazycyi jakich amal nie abnaŭlajucca. Mała znachodzicca achvotnych nabyć karcinu za paru sotniaŭ dalaraŭ na padstavie maleniečkaha fatazdymku dy karotkaha apisańnia. Niamała budzie kaštavać i pierasyłka. A jak płacić? Dasyłać hrošy poštaj? Pieravodzić na rachunak? Mała chto ryzyknie nabyvać karcinu praz kamputar.
A voś persanalny sajt dla mastaka — vydatny sposab samareklamy, navat kali praź jaho ničoha nie pradasi. Niabłaha šukać praz sajt zamovy na tvory. U Siecivie bahata prapanovaŭ kštałtu «prafesijny mastak namaluje Vaš partret za nievialikija hrošy».
Pakupniki
Kab art-rynak zapracavaŭ, adnych vytvorcaŭ dy pradaŭcoŭ mała. Patrebnyja pakupniki. Ludzi z hrašyma. Pra toje, što jany jość, śviedčyć kolkaść darahich lehkavikoŭ, što pralatajuć praspektam Skaryny za chvilinu. Mabyć, kali peryjad «pieršapačatkovaha ŭzbahačeńnia» minie, pryjdzie peryjad «vialikaha abstalavańnia interjeraŭ» — vialikaja para dla mastactva.
Aleś Kudrycki
