Zhodny z rezalucyjami schodu, z bolšaściu vystupoŭcaŭ, salidarny z tymi, chto prydumaŭ i sabraŭ hety schod, mieŭ zadavalnieńnie ad znosinaŭ z starymi znajomymi ŭ kuluarach. Tolki čamuści nie pakidaje adčuvańnie marna stračanaha času. I jakoha času? Chaj by sabie niadzielny dzień — zdajecca, što stračanyja hady.
Jość rečy, jakija treba rabić, niezaležna ad taho, ci budzie vynik, ci dasiahniecca meta. Kab nahadać, što niešta isnuje. Schod čarhovy raz nahadaŭ, što ŭ asiarodku intelihiencyi nia źnik supraciŭ ustalavanamu paradku.
1. Paradak u krainie ŭstalavaŭsia, jak i supraciŭ hetamu paradku. Štohod my pavinny heta paćviardžać, nahadvać pra heta sabie, uładam, vonkavym naziralnikam, abyjakavym hramadzianam.
2. Čas ad času adnadumcam treba razmaŭlać pamiž saboj, kab upeŭnicca, što my pa-raniejšamu adnadumcy, što nie zhubili svaich kaštoŭnaściaŭ, nia zdradzili ideałam. Na schodzie my pahavaryli j upeŭnilisia ŭ hetym.
3. Lidery pavinny razumieć, što im raście źmiena. Patrebnaja ratacyja lideraŭ. Na schodzie my bačyli, što jość kamu ładzić takija mierapryjemstvy, što jość źmiena, rezervy.
Hetym abmiažoŭvajucca stanoŭčyja vyniki j nazirańni. Dalej pesymistyčnyja vysnovy.
1. Hady iduć, a intelihiencyja nie źmianiajecca. Ja nie pačuŭ na schodzie ničoha novaha: ni idejaŭ, ni metaŭ, ni bolš daskanałych mierkavańniaŭ, čym piać, dziesiać hadoŭ tamu.
2. Štohod źjaŭlajucca novyja ludzi, niechta sychodzić. Heta nie vyklikaje ni jakasnych pieramienaŭ, ni kolkasnaha rostu. Novyja ludzi nie niasuć dadatkovaj aktyŭnaści.
3. Takija schody jaskrava adlustroŭvajuć stahnacyju. Kulturnuju ŭ pieršuju čarhu. Idučy na schod, ja nie čakaŭ ad jaho ničoha stanoŭčaha. Kali ja nie adzin z takim nastrojem, značyć, takija demanstracyi supracivu isnamu režymu pieratvarylisia ŭ rytuał.
Kožny hod my rytualna sustrakajemsia, kab paskardzicca adzin adnamu na ciažki los. Paśla kožnaj sustrečy my razychodzimsia niezadavolenyja, tamu nie praciahvajem, a prydumlajem niešta inšaje. Źbiralisia na Ŭsiebiełaruski źjezd, a ciapier na Schod intelihiencyi. Nazva inšaja, a skład udzielnikaŭ toj samy, dyj źmiest.
Patrebny novyja idei, novyja ludzi, novyja mety. Inakš my hublajem sami siabie. Biełaruś nie zahinie, pakul my žyvyja. Tolki my niejkija ni žyvyja ni miertvyja. Niejkija nievyraznyja. Ad taho i ŭsia biada.
Uładzimier Mackievič
