Pakul zbornaja prychodziła ŭ prytomnaść paśla Finlandyi, a federacyja pakutliva vyznačałasia z Zacharavym, Biełaruś zachoplena sačyła za naradžeńniem novaha hieroja chakieju.Finał Kubku Stenli — toje miesca, dzie kujuć metał najvyšejšaje proby. Čas, jaki bavić Rusłan Salej na placoŭcy ŭ hulniach (ad 20 da 26 chvilinaŭ za hulniu), lepiej čym što paćviardžaje jaho nadziejnaść i davier da jaho z boku treneraŭ «Anahajmu». Z dobraha siłavoha abaroncy Rusłan pieratvaryŭsia ŭ sapraŭdnaha terminatara, razburalnika napadnickaha patencyjału supiernika.
Hoł, jaki jon zakinuŭ u overtajmie treciaha matču ŭ bramu «Ńju-Džerzi», technična biezdakorny, adradziŭ nadzieju «Anahajmu» na stanoŭčy vynik usiaje seryi. Biełaruski chakiej nabyŭ majstra, jakoha dahetul nia mieŭ.
NCHŁ hartuje pieradusim charaktar. Tyja, chto maje niedastatkovuju matyvacyju, u Lizie nie zabaviacca. U turnirach Niamieččyny albo Rasiei płanka napruhi značna nižejšaja. Mo jakraz adsutnaść u Finlandyi Saleja, dy jašče charyzmatyčnaha kapitana Alaksandra Andryjeŭskaha, pryviała da taho, što Biełaruś vylecieła z elitnaj abojmy. Kamandzie nie chapiła charaktaru, jaki byŭ kozyram zbornaj raniej. Charaktaru, jaki ŭvasablali hetyja ludzi.
Rusłan Salej — jak Švarcenehier u kinematohrafie — čałaviek, jaki zrabiŭ siabie sam.
Ciapier ciažka skazać, kali my zdolejem ubačyć Rusłana ŭ formie nacyjanalnaj kamandy: hrupa «V» nie jahony ŭzrovień. Dyj mentalna paśla NCHŁ nia ŭpisvajecca jon u biełaruskija chakiejnyja realii, z usimi našymi «Załatymi šajbami», prezydenckimi kamandami i boŭtańniem miž niebam i ziamloj. NCHŁ — inšaja cyvilizacyja, dzie kamandujuć prafesijanały, a nie milicyjanty.
Chakieist Rusłan Salej na svaim asabovym čałaviečym uzroŭni zrabiŭ toje, što musić zrabić kožny z nas i kraina ŭ cełym. Realizavać svoj patencyjał. Stać hierojem.
Aleh Daškievič
