Moda na sacyjalizm skončyłasia. Libijski pravadyr Muamar Kadafi ŭ subotu skasavaŭ u krainie hramadzkuju i dziaržaŭnuju formy ŭłasnaści dy abvieściŭ pra pačatak ery narodnaha kapitalizmu.
«Pry dziaržaŭnaj ułasnaści ŭsio tolki raskradajuć, a znajści sumlennych i samaaddanych menedžeraŭ niemahčyma», — zajaviŭ kiraŭnik Džamachiryi. U «novaj» Libii ŭsio budzie pryvatyzavacca: banki, aeraporty, čyhunki, aŭtadarohi i, pierš za ŭsio, nafta, što daje krainie 90% prybytku. Razam ź libijcami ŭ pryvatyzacyi zmohuć udzielničać zamiežnyja biznesoŭcy. Kab ažyćciavić radykalnyja pieraŭtvareńni, Kadafi pravioŭ čystki va ŭradzie, a premjerski fatel addaŭ raniejšamu ministru ekanomiki Šokry Hanemu. Pierachodny peryjad «rynkavaha sacyjalizmu» Kadafi nie spatrebiŭsia.
Kadafi, jaki ŭ 80-ja byŭ symbalem antyzachodniaha fanatyzmu, vyraksia revalucyi. Apošnija hady jon sprabuje parazumiecca z Amerykaj i Eŭropaj — svaimi raniejšymi vorahami. U studzieni 2002 h. Kadafi adkryŭ śvietu aŭtarkičnuju libijskuju haspadarku, a ciapier čakaje, kali ZŠA zdymuć sankcyi, nakładzienyja na jaho za padtrymku mižnarodnaha teraryzmu.
Kadafi raźvitaŭsia i ź letucieńniami pra abjadnanuju Afryku pad jaho zahadam. Radykalny plan nieadkładnaha skasavańnia miežaŭ i dziaržavaŭ nie atrymaŭ padtrymki ŭ inšych afrykanskich prezydentaŭ, napałochanych intervencyjami libijskaha specnazu ŭ Toha, Čadzie i Centralnaafrykanskaj Respublicy. U subotu źniavierany Kadafi zahadaŭ likvidavać Ministerstva afrykanskaha adzinstva dy ŭklučyć jaho na pravach departamenta ŭ skład MZS.
Ciapier čytajuć
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii3
Kamientary