U Biełaruskim licei razhrom, pakinuła FM-dyjapazon biełaruskamoŭnaje radyjo «Stalica», u adzinaj biełaruskamoŭnaj škole Hłybokaha ŭviali rasiejskuju klasu, dola biełaruskamoŭnaha viaščańnia na BT źniziłasia z 10% u 2000 h. da 8% sioleta...
Ale hetyja haniebnyja dla ŭładaŭ fakty tolki ŭmacoŭvajuć prostych ludziej-biełarusaŭ u lubovi da svajoj kultury, movy, pamiatak — taho, što nichto ŭ śviecie nie źbieraže biaz nas. Kab źbierahčy pamiać, ludzi staviać pomniki.
Tak paŭstali sotni kryžoŭ u Kurapatach. Tak ciapier źjaviŭsia pomnik Kupału ŭ Hłybokim, u Miensku adkrytyja memaryjalnaja šylda Viačasłava Adamčyka, na Ŭschodnich mohiłach Miensku źjaviłasia pamiatka pa Ŭładzimieru Karmiłkinu.
Apošniuju stvaryŭ skulptar Aleś Šaternik. Užo hod minuŭ z dnia śmierci fatohrafa, a jaho vializny archiŭ usio jašče systematyzujecca. Tam chopić materyjału na ceły letapis biełaruskaha demakratyčnaha ruchu. Miarkujecca taksama ŭkłaści albom, pryśviečany žurnalistu, — heta budzie jašče adzin pomnik jamu.
Adzin z najstarejšych biełarusaŭ Maskvy Anton Sabaleŭski padaravaŭ svajmu rodnamu Hłybokamu 80-santymetrovy pomnik Kupału. Z hetym eskizam skulptar Valarjan Januškievič braŭ udzieł u konkursie, pieramožca jakoha atrymaŭ zamovu na pomnik Kupału ŭ Maskvie i finansavańnie svajho prajektu z «sajuznaha» biudžetu. Pieramoh skulptar Humileŭski. Pracu ž Januškieviča vykupili maskoŭskija biełarusy. Spačatku Kupału mierkavali pakinuć u tamtejšym centry biełaruskaj kultury na Arbacie, ale paśla vyrašyli zavieźci ŭ Hłybokaje, u historyka-etnahrafičny muzej. «Tut naša, biełaruskaja ziamla. Kupału tut budzie ŭtulniej, a nam, chto zadumaŭ i stvaraŭ hety tvor, — viesialej na dušy», — kazaŭ A.Sabaleŭski.
Pracu skulptara Paŭła Vajnickaha, aŭtara šyldy pamiaci Adamčyka, ufundavali syny piśmieńnika. A Ministerstva kultury? Abiacaje kampensavać vydatki, «kali buduć hrošy».
JUK, MB
