Cicha stała navokał. Padazrona cicha. Tak byvaje tolki tady, kali biełarusy znoŭ sychodziać u partyzany.
Partyzanić ułada: na pieramovach z Rasiejaj spačatku paciskaje ruki darahim haściam, a potym kradkom padkładaje ŭsiakija hadaści. Partyzanić apazycyja: zasieła ŭ padpolli i rychtuje dyversantaŭ, jakija pojduć ad viaskovych akruhaŭ u pałatku. Narod dyk toj uvohule chavajecca ŭ les pa poŭnaj prahramie: čym macniejšy ekanamičny kryzys i palityčny pres, tym cišejšyja šołachi.
Urešcie, nadychodzić hłybokaja mahilnaja ciša, jakaja ŭ Biełarusi maje asabliva złaviesnaje značeńnie.
Kudy padzielisia demanstranty kanca 80-ch? Rabočyja 1991-ha? Mitynhoŭcy viasny-96? Usie ŭ Belhiju źjechać nie mahli. Bolšaść — u bytavoj partyzancy.
Sustrakaješ znajomaha, jaki kaliści prałomvaŭ milicejskija kardony, užo z abyvacielskaj avośkaj ci ź dziciačym vazkom, raspytvaješ, jak žyćcio, — i bačyš hetyja vočy, zatojenyja j drymučyja, byccam ruli z huščaru. «Dastała ŭsio... Ničoha nia budzie...» — abyjakava kaža biełarus i advodzić pohlad ubok, kab ty nie paśpieŭ zaŭvažyć strelby. A ŭ pavietry pavisaje jasny praciah: «...Ale ž chaj tolki sunucca ŭ les!»
Biełarusaŭ, jakija zasieli ŭ partyzanach, vielmi ciažka vyvieści na płošču abo, skažam, kandydatami na vybary. Biełarus u partyzanskim stanie maŭklivy, niejki nieachajny, navat sonny na pieršy pahlad. Zdranćvieńnie skančajecca tolki tady, kali pačynajecca surjoznaja zavarucha.
Biełaruskaja ciša maje šmat abliččaŭ. Biełarus chavajecca ŭ chacie, u kuchni, na pracy j navat časam u vybarčaj skryni. Uzbrojenyja da zuboŭ biełarusy mohuć vielmi ŭtulna ŭładkavacca ŭ samych ćmianych, parosłych mocham kutočkach svajoj dušy, tak što ŭsie navokał buduć ździŭlena razhladacca: a dzie ž tut choć by adzin?!
I cišynia...
Biełarusa-partyzana za ŭsiu historyju jašče nie pieramahaŭ nichto. Pytańnie ŭ inšym: akupacyja pry biełaruskaj partyzancy zdolnaja tryvać biaskonca doŭha.
Praŭda, moža atrymacca i jak u tym anekdocie. Vychodziš ź lesu: «Mužyki, niemcy ŭžo syšli?». A vajna ŭžo hadoŭ piać jak skončyłasia.
Pavał Sieviaryniec, lider niezarehistravanaj arhanizacyi «Małady front»
Ciapier čytajuć
Jak razhuł pryrody viarnuŭ cieły Barbary Radzivił i vialikaha kniazia Alaksandra i čamu tajamnicu źniknieńnia ichnich rehalij zmahli raskryć tolki ciapier

Kamientary