Padziei hodu.Hovy 2003 hod pačynaŭsia novymi pieśniami: vyjšaŭ albom NRM «Dom kultury» z superhitami «Lohkija-lohkija» i «Majo pakaleńnie».
5 studzienia na prezydenckich vybarach u Litvie niespadziavana pieramahaje Rałandas Paksas. U śniežni parlament raspačnie suprać jaho praceduru impičmentu, paśla taho jak specsłužby apublikujuć infarmacyju pra jahonuju suviaź z mafijaj i rasiejskimi specsłužbami.
26 studzienia ŭ maskoŭskaj lakarni pamiraje lider «Pieśniaroŭ» Uładzimier Mulavin.
1 lutaha raźbiŭsia amerykanski kaśmičny karabiel «Kalumbija».
20 lutaha pałata pradstaŭnikoŭ nacyjanalnaha schodu stanovicca siabram Pastajannaha kamitetu Parlamenckaj asamblei ABSE. Pałata marna damahałasia hetaha statusu ciaham šaści hadoŭ, bo eŭrapiejskija struktury nie pryznavali zakonnaści referendumu 1996 h.
27 lutaha deputackaja hrupa «Respublika» ładzić kruhły stoł «Niezaležnaja Biełaruś jadnaje nas», zaprašajučy na jaho apanentaŭ režymu. Upieršyniu paśla 1996 h. pradstaŭniki demakratyčnaj apazycyi traplajuć u mury parlamentu.
U tym ža miesiacy vychodzić z druku knižka turkmenskaha dyktatara «Ruchnama» pa-biełarusku. Heta vyklikaje vialikuju dyskusiju pra etyčnaść udziełu ŭ pierakładzie takich tvoraŭ.
2 sakavika adbyvajucca vybary ŭ miascovyja orhany ŭłady. Vybarcy masava hałasujuć «suprać usich» — a «ŭsimi» najčaściej źjaŭlajecca adzin kandydat, ad ułady.
U noč z 5 na 6 sakavika ŭ miastečku Mahdalenka pad Varšavaj polski specnaz šturmuje dom, dzie zasieli dva padazravanyja. Adnaho ź ich abviaščajuć «byłym supracoŭnikam biełaruskaha KDB, jaki znachodzicca ŭ vyšuku». KDB adchryščvajecca, a polskaja palicyja nie daje rady ŭziać złačyncu ŭ pałon. Padčas šmathadzinnaha šturmu z udziełam braniatechniki specnazaŭcy cierpiać straty, hinuć i padazravanyja.
Nia mienšuju vajaŭničaść demanstruje i aficyjny Miensk, jaki da apošniaha aktyŭna supracoŭničaje z Chusejnam. U pačatku sakavika mer Bahdadu čatyry dni haściuje ŭ Miensku, a suśvietnaja presa abmiarkoŭvaje Sadamavy šancy atrymać prytułak u našaj krainie.
20 sakavika pačynajecca vajna ŭ Iraku. Da 10 krasavika ŭsio skančajecca: žaŭniery ZŠA biaruć Bahdad. Ale partyzanskija dziejańni praciahnucca, zabirajučy bolš žyćciaŭ amerykanskich žaŭnieraŭ, čym sama vajna.
Tym časam prezydent Biełarusi abviaščaje ab nieabchodnaści ŭzmacnieńnia idealahičnaje pracy i stvareńnia dziaržaŭnaje idealohii. Ź vieraśnia va ŭniversytetach uvodzicca kurs dziaržaŭnaje idealohii. Ministar adukacyi Bryhadzin moŭčki sydzie ŭ adstaŭku.
Na pačatku traŭnia premjer Italii Berluskoni robić ekstravahantnuju zajavu: «Kab stać palityčnym i vajskovym hihantam dy zraŭniacca z ZŠA, Eŭraźviazu treba pryniać u svoj skład Tureččynu, Biełaruś, Ukrainu i Rasieju».
14 traŭnia na miastečka Arechaŭsk, što na Aršanščynie, vypaŭ nadziva bujny hrad. Piacisantymetrovy ŭ dyjametry ledziany šrot pavybivaŭ škło ŭ parnikach ciapličnaha kambinatu.
28 traŭnia ŭ Biełaruski licej pryznačajuć rasiejskamoŭnuju dyrektarku. Ułada sprabuje ŭziać pad kantrol nieŭpadabanuju joj navučalnuju ŭstanovu, ale sutykajecca z družnym supracivam navučencaŭ, baćkoŭ i vykładčykaŭ.
U toj samy dzień ministar infarmacyi Padhajny na try miesiacy spyniaje vydańnie «BDH» i «BDH. Dla słužiebnoho polzovanija». Takaja ž dola pry kancy traŭnia napatkała «Navinki». Začynienaja «BDH» praciahvaje vychodzić pad šapkami inšych hazetaŭ, jakija dajuć joj svaje staronki.
U červieni chakieist Rusłan Salej, pieršy z našych suajčyńnikaŭ, traplaje ŭ finał Kubku Stenli. I choć jaho «mahutnyja kačary» nie ŭzychodziać na samuju vysokuju prystupku, tvar Rusłana pačynaje milhać u reklamie pradukcyi biełaruskich vytvorcaŭ. Jon dy jašče Maksim Mirny ŭ 2003-m robiacca kančatkova paznavalnymi «svaimi» čempijonami.
18 červienia Łukašenka kaža pra adsutnaść «ekanamičnych padstavaŭ» dla pahadnieńnia ab valutnym sajuzie Biełarusi i Rasiei. A pahadnieńnie ab uviadzieńni rasiejskaha rubla «supiarečyła b našaj Kanstytucyi», uračysta abviaščaje Biełaruskaje radyjo.
22 červienia na 80-m hodzie žyćcia ŭ Baraŭlanach pamiraje Vasil Bykaŭ. Jaho pachavańnie pieratvarajecca ŭ šmattysiačnuju manifestacyju pad nacyjanalnymi ściahami pa praspekcie Skaryny. Prezydent u hety dzień demanstratyŭna adjaždžaje ŭ Śvietłahorsk.
Paśla nieŭpadabanaha Łukašenkam repartažu z pachavańnia pry kancy červienia ŭłady začyniajuć karpunkt NTV u Miensku.
10 lipienia za nievykanańnie pastaŭlenych zadačaŭ u adstaŭku adpraŭleny ŭrad Uładzimiera Navickaha. Vykonvać abaviazki premjera (paŭnavartasnym premjeram jon stanie tolki 19 śniežnia) pastaŭleny Siarhiej Sidorski. Pieršaj pastanovaj novaha kabinetu stanie vyznačeńnie kančatkovych umovaŭ pryvatyzacyi «Biełtranshazu», na jaki kvapicca «Hazprom».
12 lipienia pazbavili častaty ŭ FM-dyjapazonie biełaruskamoŭnuju stancyju «Stalica». Zamiest jaje źjaviłasia rasiejskamoŭnaja.
Lipień staŭ miesiacam rezkaha pavieličeńnia cenaŭ na kamunalnyja pasłuhi.
6 žniŭnia ŭ adstaŭku sychodzić ministar infarmacyi Padhajny. Apošnija miesiacy jaho kiravańnia adznačylisia chvalaj represij suprać niezaležnaj presy.
1 vieraśnia liceisty pačali novy navučalny hod na dvare, pobač ź Licejem.
10 vieraśnia ŭ stakholmskim supermarkiecie zabitaja ministarka zamiežnych spravaŭ Švecyi Hanna Lind. Zabojcam akazaŭsia šved serbskaha pachodžańnia.
U toj ža dzień prezydenty Biełarusi, Rasiei, Ukrainy i Kazachstanu padpisvajuć u Jałcie ŭhodu ab utvareńni Adzinaj ekanamičnaj prastory. Eŭraźviaz, ukrainskaja i biełaruskaja apazycyja zaścierahajuć Biełaruś i Ŭkrainu ad padpisańnia pahadnieńnia.
Miž tym viadomy amerykanski palitolah Bžazinski zajaŭlaje pra nieabchodnaść pryniać Biełaruś u zachodnija arhanizacyi (pierš za ŭsio ŭ NATO). Choć i abhavorvajecca, što heta sprava niablizkaha času.
U kastryčniku ŭ Biełarusi adbyvajecca samaja masavaja haładoŭka pratestu. U Vaŭkavysku admaŭlajucca ad ježy 30 taksoŭščykaŭ. Jany pratestujuć suprać dziejańniaŭ padatkovaj inspekcyi, jakaja kanfiskavała ich mašyny. Akcyja skančajecca pieramohaj taksistaŭ.
U kastryčniku ž startavaŭ mižrehijanalny telekanał «Ład». Im zamianili «Kulturu» ŭ Miensku i RTR — u pravincyi. Na 12-m hodzie niezaležnaści ŭłady narešcie pačali raźvivać nacyjanalnuju teleprastoru. ANT, STV i «Ład» robiacca nieadjemnaj častkaj teleprahramaŭ, choć i składajucca jašče pieravažna z prahramaŭ rasiejskaje vytvorčaści.
25 kastryčnika ŭ Rasiei aryštoŭvajuć Michaiła Chadarkoŭskaha, samaha bahataha čałavieka krainy, kiraŭnika kampanii «Jukas». Mnohija kamentatary ličać heta sprobaj pierahladu vynikaŭ pryvatyzacyi ŭ Rasiei. Zatoje 7 śniežnia na vybarach u Rasiei partyja ŭłady zavajuje kanstytucyjnuju bolšaść u Dumie. A 23 śniežnia Ŭładzimier Pucin zajavić, što «dumaje nad pytańniem pieraraźmierkavańnia prybytku zdabyŭnych kampanijaŭ».
2 listapada ŭ Hruzii adbyvajucca parlamenckija vybary. Ułady sprabujuć sfalsyfikavać ich vyniki, što vyklikaje palityčny kryzys u krainie. 23 listapada apazycyja šturmam biare parlament. Prezydent Ševardnadze sychodzić u adstaŭku.
U siaredzinie śniežnia MZS Biełarusi spraščaje praceduru atrymańnia biełaruskich vizaŭ dla žycharoŭ Zachodniaj Eŭropy.
13 śniežnia abvieščana pra toje, što Chusejn złoŭleny. Jon chavaŭsia ad amerykancaŭ na praciahu 249 dzion.
19 śniežnia Chrystas Purhurydes apublikavaŭ memarandum u spravie źnikłych palitykaŭ. Jon patrabuje adstaŭki Šejmana i niezaležnaha razboru spravy.
