Michaił Miaśnikovič, Zianon Łomać i namieśnik kiraŭnika Administracyi prezydenta Leanid Anfimaŭ vystupili va ŭnison z A.Łukašenkam z krytykaj «asobnych dziejańniaŭ uradu». «My ŭzhadavali ceły kłas utrymancaŭ», — hrymieŭ Anfimaŭ. U roli vykaźnika intaresaŭ dyrektaratu vystupiŭ tolki Ŭładzimier Siamaška.
U Biełarusi dziaržaŭnaja padtrymka budzie akazvacca tolki efektyŭnym pradpryjemstvam i tolki pad akupnyja prajekty. Jak paviedamlaje BIEŁTA, ab hetym zajaviŭ Alaksandar Łukašenka 26 červienia na naradzie pa pytańniach dziaržaŭnaj padtrymki realnamu sektaru ekanomiki. «U pradpryjemstvaŭ było bolš za 10 hadoŭ, kab adaptavacca da novych umoŭ. Pradpryjemstvy i kalektyvy, jakija nie zmahli heta zrabić, nam prosta nie patrebnyja», — zajaviŭ A.Łukašenka.
Niajasna, ci heta prosta čarhovyja pahrozy z metaj zaachvocić startnyja pradpryjemstvy pracavać lepiej, ci padrychtoŭka da realnaha skaračeńnia biudžetnych vydatkaŭ. Apošnija hady ŭsio abmiažoŭvałasia słovami.
Łukašenka padkreśliŭ, što ŭsie najaŭnyja srodki pavinny być skancentravany na praryŭnych napramkach, jakija zabiaśpiečvajuć pavyšeńnie kankurentazdolnaści ekanomiki.
Specyfičnym terminam «realny sektar ekanomiki» ŭ Biełarusi akreślivajuć pramysłovaść i sielskuju haspadarku. Sferu pasłuh i navukovyja daśledavańni, dola jakich u susśvietnym VUP imkliva raście, da «realnaha sektaru» nie adnosiać. I ŭ pryjarytety ich nikoli nie zaličvali. Biełaruskija ŭradoŭcy dahetul zastajucca ŭ pałonie savieckich ujaŭleńniaŭ pra ekanomiku, pavodle jakich stupień raźvićcia krainy prama praparcyjnaja maštabam pramysłovaj vytvorčaści, najpierš — ciažkaj pramysłovaści. Heta było abumoŭlena važnaściu VPK dla dasiahnieńnia hałoŭnaj mety savieckaha režymu — suśvietnaha panavańnia. Ciažka skazać, ci adekvatny taki padychod nacyjanalnym intaresam Biełarusi. Ciažkaja pramysłovaść i sielskaja haspadarka — enerhajomistyja haliny. I ź inšaha boku, hieahrafičnaje stanovišča Biełarusi i adukacyjnaja infrastruktura naturalna spryjajuć pašyreńniu sfery pasłuh (ad prahramavańnia da bankaŭskaj sfery, ad transpartu da budaŭnictva).
Padtrymka pramysłovaści i sielskaj haspadarki doŭhija hady mieła palityčnuju metu: zachavać zaniataść na dziaržaŭnych pradpryjemstvach i tym samym zaležnaść ad administracyi, zabiaśpiečyć padtrymku aŭtarytarnaj ułady, prademanstravać jaje pieravahi pierad demakratyčnaj i nacyjanalnaj alternatyvaj. Ale «ŭ pradpryjemstvaŭ było bolš za 10 hadoŭ, kab adaptavacca da novych umovaŭ. Pradpryjemstvy i kalektyvy, jakija nie zmahli heta zrabić, nam prosta nie patrebnyja», — zajaviŭ ciapier A.Łukašenka. «Kali i abvaliciesia — dziaržava ad hetaha nie zahinie, a raniej, kali b usie abvalilisia, to i dziaržava zahinuła b. Tamu my vymušany byli pravodzić takuju palityku», — skazaŭ A.Łukašenka.
Asabliva dastałosia sielskaj haspadarcy i lohkaj pramysłovaści, dzie sytuacyja najhoršaja.
«Ja rablu adnu vysnovu, što ŭrad za košt biudžetu sprabuje skryć svaju niazdatnaść i drennuju rabotu», — skazaŭ A.Łukašenka.
Michaił Miaśnikovič, Zianon Łomać i namieśnik kiraŭnika Administracyi prezydenta Leanid Anfimaŭ vystupili va ŭnison z A.Łukašenkam z krytykaj «asobnych dziejańniaŭ uradu». «My ŭzhadavali ceły kłas utrymancaŭ», — hrymieŭ Anfimaŭ.
Piarečyć navažyŭsia tolki vice‑premjer Uładzimier Siamaška. Jon vykazaŭsia za praciah praktyki dziaržpadtrymki. Užo nia pieršy raz U.Siamaška vystupaje ŭ roli vykaźnika intaresaŭ dyrektaratu. Hetak, niadaŭna jon vystupiŭ za «pavyšeńnie sacyjalnaj abaronienaści kiraŭnikoŭ pradpryjemstvaŭ». Heta značyć, za rost zarobkaŭ, pensijaŭ, vyhodaŭ dla ich.
Śmiełyja, pa łukašenkaŭskich mierkach, zajavy U.Siamaški adlustroŭvajuć rost supiarečnaściaŭ miž dyrektaratam i idealahična‑siłavym aparatam režymu. Pieršamu chočacca pavieličeńnia ŭłasnaj roli ŭ pracesie kapitalizacyi. Druhi imkniecca da pabudovy dziaržaŭna‑manapalistyčnaha kapitalizmu.
