Miensk. Čaćvier. Spartovaja kaviarnia. Da pačatku futbołu — amal cełaja hadzina, a volnych miescaŭ nasuprać piacimetrovaha teleekranu ŭžo nie znajści. U pavietry raźlitaje čakańnie, na stolikach — piva siarod spartovaj presy. Atmasfera raspalvajecca.
Sprava hrupa razmalavanych u čyrvona-zialonyja kolery padletkaŭ horača abmiarkoŭvaje šancy abiedźviuch kamandaŭ: «Dy što tam hetyja makarońniki, u nas na ich na ŭsich jość Hleb!» Ź levaha boku — stanisty mužčyna siarednich hadoŭ niešta tłumačyć svajmu synu hadoŭ dziesiaci. Abodva ŭ futbołkach nacyjanalnaj kamandy… Startavy śvistok českaha arbitra Złamała na «Rurštadyjonie» ŭ niamieckim Bochumie vyklikaje ŭ zali buru avacyjaŭ. Pačałosia! Da teleekranaŭ ułasnych televizaraŭ prylipła pieravažnaja bolšaść mužčynskaha nasielnictva krainy. Futboł — naša praducha. Pieramohi biełaruskich futbalistaŭ — sapraŭdnaje śviata, jakoje byvaje tolki zredku. Ale ź jaho nadychodam usie žyćciovyja kłopaty i prablemy adychodziać na druhi plan.
…Hetaj padziei my čakali doŭhija dziesiać hadoŭ. Roŭna stolki, kolki ŭ Biełarusi isnuje suverenny futboł. Biełaruskija futbolnyja zaŭziatary ŭžo pryzvyčailisia da taho, što naša moładź vystupaje značna lepiej za svaich darosłych kalehaŭ. Za piać adboračnych cykłaŭ da čempijanataŭ śvietu i Eŭropy (z 1994 da 2003 h.) moładzievaja zbornaja atrymała amal u try razy bolej pieramoh, čym nacyjanalnaja. Ale nikoli biełaruskim chłopcam nie vypadała pieraadoleć kvalifikacyjny raŭnd. Navat toj supertalenavitaj kamandzie pieršaha sklikańnia, honar jakoj na pačatku 90-ch baranili niaźmiennyja lidery ciapierašniaj «nacyjanałki» — «kijeŭcy» Bialkievič z Chackievičam, Štaniuk, Kulčy…
Vyprabavańnie favarytam
Sioletni sezon kamanda Puntusa pačała z tavaryskaha turniru na Malcie. Paraza ad słavakaŭ (0:2) i pieramoha nad albancami (2:1) — nia bolej čym pracoŭnyja momanty, niebłahaja mahčymaść dla abkatki. Apošniaj ža pieradčempijanataŭskaj repetycyjaj stała ŭpeŭnienaja chatniaja pieramoha nad druhim finalistam kantynentalnaha pieršynstva Švajcaryjaj — 4:0. Niahledziačy na heta, siarod favarytaŭ eŭrapieršynstva Biełaruś nia značyłasia, chutčej naadvarot. Ab hetym śviedčyli i vyniki maštabnaha hałasavańnia, naładžanaha na aficyjnym veb-sajcie Eŭrapiejskaha Źviazu futbolnych asacyjacyjaŭ (UEFA): tolki 4% (mieniej — u Švecyi dy Švajcaryi) zaŭziataraŭ bačyli biełarusaŭ patencyjnymi pieramožcami.
Zatoje hałoŭny trener našaj kamandy Jury Puntus pastaviŭ maksymalnuju zadaču — trapić u lik troch najmacniejšych, što ŭ svaju čarhu dazvolić jaho padnačalenym vystupić na Alimpijadzie. Takim čynam, biełaruskija majstry skuranoha miača vypravilisia na finał u vyhodnaj roli «čornaha konika». Praŭda, nie abyšłosia biaz strat. Jašče da pajezdki ŭ Niamieččynu za bortam kamandy praz traŭmy zastalisia hulcy asnovy Aleh Popiel i Vital Nadzijeŭski. A ŭžo na samim turniry zvyšsurjoznyja paškodžańni atrymali Arciom Kancavy i Pavał Šmihiera.
Pieršaja hulnia na čempijanacie musiła stać sapraŭdnym vyprabavańniem dla biełarusaŭ, bo ekzamenavać ich vypała čatyrochrazovamu čempijonu Eŭropy — italjancam. Ab mocy hetaj kamandy možna było mierkavać z adnaho tolki faktu: usie 22 hulcy ŭ jaje składzie vystupajuć za kluby najmacniejšaj u śviecie italjanskaj futbolnaj lihi, a jaje lider — 21-hadovy Alberta Džylardzina z «Parmy» — staŭsia tam sioleta najlepšym bambardziram.
Užo pačatak sustrečy vyjaviŭ ahresiŭnuju atakavalnuju manieru padnačalenych Juryja Puntusa: jakoje-kolečy nervavańnie i bojaź pierad hrandami adsutničała całkam. A ŭžo na šostaj chvilinie padaču z vuhła ŭsiudyisnaha «flanha» Cimafieja Kałačova ŭdaram hałavoj zamknuŭ abaronca Raman Kirenkin. Kali hadzińnik českaha arbitra adličvaŭ pieradapošniuju chvilinu pieršaj pałovy sustrečy, paŭabaronca niamieckaha «Štuthartu» Alaksandar Hleb zaviaršyŭ svoj karonny słałamny prachod efektnym strełam z 25 metraŭ. Italjancy złomlenyja psychalahična. Usio, što im udałosia ŭ druhim tajmie, — tolki skaracić razryŭ.
Rumynski kat
«Kali my zdolejem pieramahčy ŭ druhoj hulni charvataŭ, tady daroha ŭ paŭfinał budzie dla nas adkrytaja i my zdolejem dasiahnuć svajoj mety», — adznačyŭ paśla histaryčnaj pieramohi Jury Puntus.
Poŭny varyjant artukułu čytajcie ŭ hazecie "Naša Niva"
Kastuś Łaškievič
