Što i kazać, niaprostyja zadačy stajali pierad francuskim prezydentam Žakam Šyrakam padčas arhanizacyi pryznačanaha na 6 červienia śviatkavańnia 60-hodździa vysadki desantu antyhitleraŭskaje kaalicyi ŭ Narmandyju.
Vybar zaprošanych na ŭračystaści haściej musiŭ niedvuchsensoŭna prademanstravać zamiežnapalityčnyja pryjarytety Francyi, a prahrama śviata nie pavinna była stacca dapamohaj amerykanskamu kalehu Bušu ŭ jahonaj prezydenckaj kampanii. Ź pieršaj zadačaj Šyrak spraviŭsia bliskuča, druhoj rady nia daŭ.
Śpis haściej, zaprošanych na śviatkavańni ŭ Narmandyi, pryciahnuŭ uvahu z troch nahod: siarod zaprošanych krain nie było Italii i ŭpieršyniu prysutničali Niamieččyna i Rasieja. Niezaprašeńnie italjanskaha premjera Berluskoni inačaj jak źniavahaj partnera pa Eŭraźviazie nie nazavieš. Papraŭdzie ž, zamiežnapalityčnaja vaha Italii nie takaja ŭžo i małaja — kraina była siarod zasnavalnikaŭ Eŭraźviazu i ŭvachodzić u «vialikuju šaściorku» samych mahutnych industryjalnych dziaržaŭ. Ale ž, vidać, u apošni čas hety svoj upłyŭ kanservatyŭny ŭrad Berluskoni vykarystoŭvaŭ u niepažadanym dla Paryžu kirunku. Italija nie ŭziała pad kazyrok paśla hučnaha francuskaha zahadu «Maŭčać!» uzimku 2003 h. i nasupierak žadańniu aficyjnaha Paryžu padtrymała vajennuju aperacyju Złučanych Štataŭ u Iraku.
Navat paśla taho, jak hrupu krain — sajuźnic Ameryki pakinuła Hišpanija, dzie sacyjalist Sapatera, vykonvajučy papulisckija pieradvybarnyja abiacańni, adnabakova i paśpiešliva vyvieŭ hišpanskija vojski ź Iraku, Italija zastajecca viernaj stratehičnamu partnerstvu z Amerykaj. Takaja pryncypovaja pazycyja italjanskaha premjera, jaki, niahledziačy na ŭsio bolšyja antyamerykanskija nastroi siarod italjanskich vybarščykaŭ, nie apuskajecca da padmieny zamiežnaje palityki hołym papulizmam, zrazumieła, nia moža zachaplać francuskich uradoŭcaŭ. Prademanstravać surovaje staŭleńnie Paryžu da Berluskoni i musiła niezaprašeńnie Italii na ŭračystaści ŭ Narmandyi. Voś i daviałosia Bušu, kab nie padvodzić sajuźnika, pierad svaim pryjezdam u Francyju naviedać Rym, dzie, akramia sustrečy z Berluskoni, adbyłasia aŭdyjencyja Buša ŭ Jana Paŭła II.
Poŭny varyjant artukułu čytajcie ŭ hazecie "Naša Niva"
Siaržuk Vinahradaŭ
