Šanoŭny Pavał Izotavič!
Saču za Vašaj tvorčaściu ad časoŭ Vašaha zachapleńnia spartovaj žurnalistykaj. Ciapier Vy zakranajecie prablemy publična značnyja, ahulnanacyjanalnaha, a časam i bolšaha maštabu, ale pa-raniejšamu pišycie žyva i niebiespadstaŭna raźličvajecie na vodhuk u sercach čytačoŭ. Tamu ja i vyrašyŭ raspačać cykł listoŭ da Vas.
Siońnia pra Vaš dopis «Ab charaktary našych hazet». Hałoŭnaja jaho teza — «zaanhažavanaść» niedziaržaŭnaj presy. Kab davieści heta, Vy prapanujecie «zachaplalny eksperyment» — napisać krytyčny materyjał pra Buša-małodšaha i prapanavać jaho niedziaržaŭnym vydańniam, jakija, pavodle Vašaha śćvierdžańnia, ad materyjału admoviacca.
Nia dumaju. Usio zaležyć ad arhumentavanaści i jakaści materyjału. I tamu, dziela čyścini eksperymentu, napišycie i prapanujcie. Vy — asoba znanaja, źjaŭlajeciesia adnym z najbujniejšych biełaruskich žurnalistaŭ. Pierakanany, što Vaš artykuł nie zastaniecca pa-za ŭvahaj anivodnaha hałoŭnaha redaktara niedziaržaŭnaha vydańnia.
Zasmucili mianie, adnak, u Vašym dopisie kolki miescaŭ, jakija zastalisia niepraśvietlenymi i čytaču niezrazumiełymi.
Naprykład, čamu heta raptam staršynia partyi BNF Vincuk Viačorka, «bujny demakrat», pavodle Vašaha aznačeńnia, zachacieŭ nadrukavacca ŭ «SB»? Padumałasia: pa-pieršaje, kali b sapraŭdy byŭ «bujnym demakratam», dyk nie zachacieŭ by, a pa-druhoje, kali nie demakrat, to čamu Vy tady jamu admovili?
Zrazumieŭ z Vašaha artykułu tolki toje, što V.Viačorka dasłaŭ u hazetu niejkija «ahitki», a Vy ich nie nadrukavali, abapirajučysia na ćviordy redaktarski pryncyp: «Padychodzić hazecie materyjał — publikujem, nie spadabajecca — vybačajcie».
Ale što Vam tak nie spadabałasia? Akazałasia — aficyjny list Partyi BNF u šerah dziaržaŭnych instancyj, u tym liku i ŭ «SB».
U im, u pryvatnaści, havorycca, što «SB» u numary 170 ad 9 vieraśnia 2004 h. źmiaściła zajavu adnaho hramadzkaha farmavańnia, u jakoj jahonyja pradstaŭniki zaklikajuć «…vykazać adnadušnuju padtrymku prezydentu A.R.Łukašenku na kanstytucyjnym referendumie i prahałasavać za…». Taksama Vaša hazeta apublikavała «ahitacyjnyja zvaroty hramadzian zamiežnych krain, što jość hrubym parušeńniem častki 5 artykułu 45 Vybarčaha kodeksu, jakaja zabaraniaje zamiežnym hramadzianam brać udzieł u ahitacyi».
A tamu biełaruskija hramadzianie, jakija majuć nia mienšyja za zamiežnikaŭ pravy, zapatrabavali, kab ichnyja materyjały suprać adnabakovaj ahitacyi byli taksama nadrukavanyja. I Vam, Pavał Izotavič, heta nie spadabałasia? Ja nie zakońnik, ale adčuvaju, što, apublikavaŭšy materyjały pradstaŭnikoŭ inšaha abjadnańnia, anijakaha artykułu Vybarčaha kodeksu Vy nie parušyli b.
Chacia… Vy nazvali svoj dopis pa-lenisku.
Moža, tamu, što juryst Uł.Uljanaŭ kiravaŭsia nie zakonami, a «revalucyjnaj metazhodnaściu»? Heta značyć — čymści blizkim da iracyjanalnaha pryncypu «padychodzić… — publikujem, nie spadabajecca — vybačajcie».
A ci nia varta było b Vašaj hazecie znajści jaki-niebudź inšy, bolš zrazumieły čytaču pryncyp? Naprykład — šyrokaje adlustravańnie samych roznych sacyjalnych i palityčnych pohladaŭ, što isnujuć u biełaruskim hramadztvie.
Z pažadańniami pośpiechaŭ,
Aleś Ancipienka, hramadzianin RB
