Na presavaj kanferencyi ŭ Maskvie naš premjer Sidorski akcentavaŭ uvahu na sumiesnaj z rasiejcami prahramie kaśmičnaha zandavańnia. Chacia najpierš u biełakamiennaj zandavalisia, musić, inšyja pytańni :-))
Siońnia tam prajšło pasiadžeńnie sajuznaha Saŭminu. Pra što hutaryli premjery biaź lišnich vušej, možna zdahadvacca pavodle ich publičnych vykazvańniaŭ pastfaktum. Tak, Fradkoŭ padkreslliŭ, što ŭ sfery enerhapastavak buduć praciahvacca rynkavyja dačynieńni. Hety akcent navodzić na dumku, što biełaruski bok nie pakidaje sprobaŭ atrymać palohku. Adzinaje, što paabiacaŭ Fradkoŭ, dyk heta pradoŭžyć razhlad pytańnia ab kredycie, kab trochi lahčej było raźličvacca za darahi haz.
Ale, pa-pieršaje, hetaj kredytnaj morkaŭkaj dražniać nieprystojna doŭha. Možna padumać, u Rasiei niama hrošaj! Nie kažu ŭžo pra naftadalary — adzin Čaves za zbroju advaliŭ Maskvie try miljardy (udvaja bolej za sumu toha niaščasnaha kredytu!) i jašče kuplać źbirajecca.
Pa-druhoje, ichni kredyt — heta klasyčny biaspłatny syr. Choć i skazaŭ siońnia Sidorski, što nieŭzabavie budzie tender na AES, ciažka adkaraskacca ad uražańnia, što Miensk užo idzie z hetym prajektam naŭprost u pašču toha samaha enerhietyčnaha ŭdava, ad jakoha nibyta choča ŭciačy.
Darečy, siońnia vice-premjer Bura paviedamiŭ katastrafičnuju ličbu: rentabielnaść naftapierapracoŭki ŭ našaj krainie ŭpała da 1%, "faktyčna balansujučy kala nula". Ekanamist Leanid Zaika, jaki užo nia pieršy tydzień ćvierdzić ab pracesie "pieradprodažnaj padrychtoŭki Biełarusi", adkamentavaŭ ličbu koratka: krynica "biełaruskaha cudu" nadziejna pierakrytaja Rasiejaj.
"Kaśmičnaje zandavańnie", praviedzienaje ŭradoŭcami u Maskvie, pakazvaje, što tam sapraŭdy usurjoz i nadoŭha uzbroilisia žorstkim prahmatyzmam u dačynieńniach ź Mienskam.
