Chronika supracivu

U Horadni 3 listapada pa 20 bazavych vieličyniaŭ štrafu (480 tys. rubloŭ) prysudzili žurnalistam Natalli j Anatolu Makušynym za ŭdzieł u pikiecie pratestu. Staršyniu mienskaj supołki kryšnaitaŭ Alaksandru Karzovu 3 listapada Centralny sud Miensku vynies papiaredžańnie za nabaženstvy ŭ pryvatnym domie biez dazvołu ŭładaŭ. U Vaŭkavysku Mikałaj Aksamit 3 listapada spyniŭ haładoŭku pa stanie zdaroŭja. Na pamiežnym pierachodzie Bierastavica—Babroŭniki 4 listapada supracoŭniki mytni amal razabrali na častki aŭtamabil deputatki Sojmu Polščy Barbary Kudryckaj, u jakim kiravalisia na kanferencyju ŭ Biełastok staršynia Partyi BNF Vincuk Viačorka i hanarovy staršynia Sajuzu palakaŭ Tadevuš Havin — tak šukali zabaronienaje. 4 listapada Bieraściejskaje abłasnoje abjadnańnie FPB u adnabakovym paradku skasavała damovu pra arendu ź miascovaj supołkaj Prafsajuzu rabotnikaŭ radyjoelektronnaj pramysłovaści, aŭtamabilebudavańnia i metałaapracoŭki. Kaardynatar «Zubra» Mikita Sasim 5 listapada zatrymany ŭ Baranavičach na padstavie pastanovy sudu Centralnaha rajonu Miensku, pavodle jakoj jon užo adsiedzieŭ 15 sutak. U toj samy viečar u jahonuju kvateru ŭvarvalisia rabotniki milicyi ŭ cyvilnym, zatrymali «zubroŭcaŭ» Paŭła Juchnieviča, Alaksieja Laŭkoviča, paśla pieratrusu kanfiskavali dakład Ch.Purhurydesa. Prakuratura Partyzanskaha rajonu Miensku 5 listapada admoviłasia razhladać skarhu eks-kandydatki Ludmiły Hraznovaj na paklopnickija ŭlotki biez vychodnych źviestak, raspaŭsiudžanyja ŭ jejnym rajonie ad «Klubu vybarcaŭ Miensku». Michaiłu Maryniču 5 listapada pradjavili kančatkovaje abvinavačańnie: niezakonnyja dziejańni ŭ dačynieńni da zbroi (č.2 art.295 KK), kradziež albo paškodžańnie dakumentaŭ, štampaŭ, piačatak (č.2 art.377 KK), kradziež praz złoŭžyvańnie słužbovymi paŭnamoctvami, učynieny hrupaj ci ŭ asabliva bujnym pamiery (č.4 art.210), chavańnie aficyjnych dakumentaŭ i piačatki (č.1 art.377). 5 listapada ŭ Biełaruś nie puścili Hielmuta Kurta, kiraŭnika biuro pa Ŭkrainie, Biełarusi j Małdovie niamieckaha sacyjał-demakratyčnaha fondu imia Eberta. Zdymačnuju hrupu žurnalistaŭ rasiejskaha biuro francuskaha telekanału TF-1 zatrymali 5 listapada, kali jany zdymali akcyju «Zubra» ŭ Miensku, i pazbavili akredytacyi. 8 listapada ŭ prakuratury Miensku Irynu Chalip papiaredzili pra kryminalnuju adkaznaść za «paklopnickija vydumki»: padstavaj staŭ artykuł žurnalistki nakont referendumu ŭ rasiejskaj «Novoj hazietie». Pavał Mažejka spyniŭ haładoŭku 8 listapada, kali vyjšaŭ sa specraźmierkavalniku, u jakim adsiedzieŭ siem sutak. Prakuratura Savieckaha rajonu Miensku vyniesła Piatru Sadoŭskamu 8 listapada papiaredžańnie: jaho vinavaciać u cisku na siabroŭ vybarčaj kamisii za ahučvańnie faktu źniknieńnia 255 biuleteniaŭ.

AŠ

• 0
• 0
• 0
• 0
• 0
• 0