Valer Ščukin stvaraje Narodnuju asambleju z tych, chto nia trapiŭ u nacyjanalny schod
U Biełarusi vybuchnuła pijar-bomba: rychtujecca stvareńnie Narodnaha parlamentu. Ideja sabrać 110 demakratyčnych kandydataŭ u deputaty, jakija mieli prablemy z rehistracyjaj ci nia zdoleli zdabyć deputackija partfeli praz falsyfikacyi, naležyć pravaabaroncu Valeru Ščukinu. «Nie-nie, heta nie alternatyva apazycyjnym abjadnańniam, — pierakonvaje jon. — Hałoŭnaja meta — stvareńnie alternatyvy aficyjnamu parlamentu, jakoha nichto nie pryznaje lehitymnym».
Valer Ščukin źviartaje ŭvahu na toje, što novaje abjadnańnie, chutčej za ŭsio, budzie nazyvacca nie parlamentam, a asamblejaj — kab paźbiehnuć mahčymych jurydyčnych prablem. Stvaralnik asamblei adrazu papiaredžvaje jaje patencyjnych siabroŭ pra peŭnuju ryzyku: ich mohuć abvinavacić u prysvajeńni čužych paŭnamoctvaŭ, a heta — kryminalnaja sprava.
Čym buduć zajmacca «narodnyja parlamentary»? «Raspracoŭkaj alternatyŭnych prajektaŭ najbolš reakcyjnych zakonaŭ, pryniatych aficyjnym parlamentam, — miarkuje Valer Ščukin. — Jašče adnoj zadačaj budzie pryniaćcie alternatyŭnaha zakonu ab vybarach, jaki b dazvoliŭ demakratyčnym kandydatam być abranymi».
«Ideja cikavaja, — kaža Aleś Michalevič (BNF), jaki byŭ pazbaŭleny ŭładami prava ŭdzielničać u vybarach za niekalki dzion da hałasavańnia. — Mianie, adnak, cikavić u pieršuju čarhu pytańnie lehitymnaści hetych deputataŭ. Treba było b pravieści schod kandydataŭ da vybaraŭ, a taksama zładzić padobny «churał» paśla i ŭžo na im prymać rašeńnie ab mahčymaści abjadnańnia. Heta patrebnaja inicyjatyva, i varta było b sabrać asambleju demakratyčnych kandydataŭ, jakija byli źniatyja ci niezarehistravanyja, ale nielha, kab hetaje ŭtvareńnie było alternatyvaj «Piaciorcy+», bo jana — realny centar kiravańnia abjadnanaj apazycyjaj».
Juraś Ziankovič, pres-sakratar PBNF, paćvierdziŭ aficyjnuju pazycyju partyi: utvareńnie «narodnaha parlamentu» — heta sproba stvareńnia alternatyŭnaha centru pryniaćcia rašeńniaŭ pa-za «Piaciorkaj+», tamu partyja padtrymać jaho nia moža. Tym bolš što ŭžo isnuje abjadnańnie lehitymna abranych deputataŭ — Asambleja deputataŭ miascovych savietaŭ.
Poŭnaściu hety artykuł možna pračytać u papiarovaj i pdf-versii "Našaj Nivy"
Aleś Kudrycki
