U asiarodździ «naftanaŭcaŭ» cyrkulujuć dźvie versii pryčynaŭ aryštu Kanstancina Časnavickaha. Pieršaja — palityčnaja. Mienavita Navapołacak nia vykanaŭ usich dziaržustanovak pa praviadzieńni parlamenckich vybaraŭ i referendumu. Pa-pieršaje, tut vybary prajšli ŭ dva tury — hetak adznačylisia ŭ Biełarusi tolki Navapołacak i Horadnia. Pa-druhoje, u pasiołku Mižrečča (u narodzie jaho nazyvajuć «Carskaje Siało»), dzie žyvie amal usia elita «Naftanu», referendum «zavalili». U horadzie naftavikoŭ užo miesiac chodzić čutka pra mahčymyja represiŭnyja miery i ŭ dačynieńni da staršyni navapołackaha harvykankamu Alaksandra Kamarova.
Darečy, Kamaroŭ z Časnavickim znajomyja ź junactva, i, vidavočna, mienavita apošni prałabiravaŭ u 1998 hodzie prychod Kamarova ŭ navapołacki «bieły dom» z pasady namieśnika staršyni połackaha harvykankamu. Kamaroŭ staŭ «pravilna» adstojvać intaresy navapołackaha naftavaha łobi, byŭ zaciatym praciŭnikam abjadnańnia dvuch haradoŭ — Połacku i Navapołacku (hetaha nie chacieli na «Naftanie»). 2004 hod staŭsia dla staršyni navapołackaha harvykankamu vielmi składanym. Asabliva šmat było skarhaŭ na metady pryvatyzacyi ŭ naftahoradzie i na biazdarnaje dobraŭparadkavańnie hałoŭnaj vulicy horadu — Moładzievaj. Kažuć, što Kamaroŭ hatovy pa ŭłasnym žadańni pajści ŭ adstaŭku (spasyłajučysia na kiepski stan zdaroŭja), ale jaho pakul nie adpuskajuć.
Poŭny varyjant artukułu čytajcie ŭ papiarovaj i pdf-versii haety "Naša Niva"
Vasil Krokva, Połacak
