Biełaruskaja zbornaja pa frystajle viarnułasia z čempijanatu śvietu pa frystajle ŭ Finlandyi, pryviezšy tolki adzin medal.
U akrabatycy bronzavy pryzer Alimpijady ŭ Sołt-Łejk-Sici Alaksiej Hryšyn taksama byŭ trecim. Źmicier Daščynski spyniŭsia ŭ kroku ad pjedestała — jon čaćvierty. Žančynam podyjum tak i nie pakaryŭsia. Ała Cuper zaniała piataje miesca, Asol Śliviec — dziaviataja.
Nia lepšym čynam vystupili biełarusy i na apošnim etapie Kubku śvietu pa bijatlonie ŭ Chanty-Mansijsku. U niadzielu prajšli estafety-mikst. Našym treneram prajavić by mudraść i vystavić adnu, ale mocnuju zbornuju: dźvie žančyny, dvoje mužčyn. Pahatoŭ jość z kaho vybirać. Ale biełarusy, jak u pieśni, źlapili z taho, što było — i vystavili cełyja dźvie kamandy. Vynik nulavy. Pieršaja zbornaja ŭ składzie Volhi Nazaravaj, Aleny Zubryłavaj, Alaksandra Symana, Aleha Ryžankova zaniała 11-je miesca, adstaŭšy ad pieramožcaŭ — zbornaj Rasiei — na try z pałovaj chviliny. Druhaja zbornaja — Kaciaryna Ivanova, Ludmiła Anańka, Rustam Valiulin, Siarhiej Novikaŭ — pryjšła na finiš 12-j z 22-ch kamand.
Na turniry ŭ Chanty-Mansijsku pastaŭlena kropka ŭ bijatlonnym sezonie, tamu jość što padsumavać. Na dzieviaci etapach biełarusy zavajavali dva załatyja (Alaksandar Syman, Alena Zubryłava), adzin siarebrany (Aleh Ryžankoŭ) i piać bronzavych medaloŭ. Najvyšejšy vynik u žančyn u Zubryłavaj — u ahulnym zaliku Kubku śvietu jana na siomym miescy. Letaś była dziaviataj. U mužčyn lepšy ź biełarusaŭ — Aleh Ryžankoŭ, u jakoha 25-je miesca. A voś Alaksandar Syman dabiŭsia najbolšaha prahresu: jon uźniaŭsia z 59-ha na 35-je miesca. Kolišniaja nadzieja biełarusaŭ — varah Uładzimier Dračoŭ — za hod apuściŭsia z 10 pa 71-je miesca. Choć biary i nazad u Rasieju viartaj veterana zbornaj.
U zaliku Kubku nacyj (kudy sumujucca ŭsie vyniki i indyvidualnych i estafetnych honak), žanočaja i mužčynskaja zbornaja na šostym miescy. Pytańnie, jakoje nie daje spakoju pierad budučymi zimovymi hulniami: z kim buduć spaborničać biełaruskija spartoŭcy? U lutym niama ni siaŭby, ni žniva, ni kasavicy. Tamu kałhaśniki tut nie dapamoha. Mahčyma, jość sens abviaścić spabornictva z kamunalnymi słužbami. Adna medal roŭnaja tysiačy kubametraŭ prybranaha śniehu.
U minułuju piatnicu adbyłosia losavańnie čverćfinałaŭ futbolnaje Lihi čempijonaŭ. Intryhuje skład adnoj z paraŭ: «Juventus»—«Liverpul». Dvaccać hadoŭ tamu, u 1985 h., finalny matč miž hetymi družynami na bruselskim stadyjonie «Ejzel» pryvioŭ da adnoj z najbujniejšych trahiedyj u historyi suśvietnaha futbołu.
Try trybuny stadyjonu mieli nieaficyjnuju nazvu «skotny dvor», bo tam byli samyja tannyja miescy, i asnoŭnaja masa zaŭziataraŭ tam nie siadzieła, a stajała. Pakul nia hrymnuŭ hrom, nichto nie parupiŭsia pra biaśpieku balelščykaŭ.
Poŭny varyjant čytajcie ŭ papiarovaj i pdf-versii hazety "Naša Niva"
