Bavoŭna biez PDV
Pavodle prezydenckaha ŭkazu, bavaŭnianaje vałakno, što ŭvozicca ŭ Biełaruś dla apracoŭki, nia budzie abkładacca PDV. Pradpryjemstvy, jakija vykarystoŭvajuć hetuju syravinu, znachodziacca ŭ ciažkim finansavym stanie — tamu ŭłada pajšła im nasustrač. A voś pryvatnyja pradprymalniki admieny PDV tak i nie damahlisia.
Źnižeńnie naftapošliny
Urad planuje źnizić ekspartnuju pošlinu na naftu z $87,9 za tonu da $83. Cikava, što Rasieja naadvarot pavyšaje pošlinu na ekspartnuju naftu. Reč u tym, što Biełaruś ekspartuje ŭłasnuju naftu, a rentabelnaść jaje zdabyčy nievysokaja. Dziaržaŭny manapalist «Biełaruśnafta», jaki pampuje čornaje zołata, nia zdužaje płacić vialikija pošliny.
Kalijnyja rekardsmeny
«Urałkalij» prapanavaŭ «Biełaruśkaliju» stvaryć sumiesnaje pradpryjemstva. Jano budzie zajmacca prodažam kalijnych uhnajeńniaŭ na mižnarodnym rynku. Nia vyklučana, što da jaho dałučycca taksama rasiejskaje AAT «Sylvinit». U takim vypadku hrupa zrobicca najbujniejšym vytvorcam kalijnych uhnajeńniaŭ u śviecie. Łukašenka pastaviŭsia da prapanovy dosyć strymana: Biełaruś užo stvaraje ŭłasnuju kampaniju, što budzie pradavać kalijnyja ŭhnajeńni za miažu biez pasiarednikaŭ.
Novaja birža
Sioleta 1 červienia adčynicca Biełaruskaja ŭniversalnaja tavarnaja birža. Paśla jaje adkryćcia ŭsie jurydyčnyja asoby ŭ krainie pavinny buduć zaklučać ździełki na sumu, bolšuju za 10 tys. eŭra, tolki na biržavych tarhach. Heta datyčyć handlu lesamateryjałami, šeraham vyrabaŭ z žaleza, stali dy čornych metałaŭ.
Manety nie dla kramy
Srebnaja maneta «Biełaruski balet» vartaściu sto rubloŭ, adbitaja Litoŭskim manetnym dvarom, atrymała tytuł «Maneta hodu-2005» na konkursie, jaki ładzicca amerykanskim vydaviectvam «Kraŭze Pablikiejšns». Jana ž pryznanaja najbolš daskanałaj pa svaim mastackim vyrašeńni. Inšaja maneta vartaściu 20 rubloŭ z vyjavaj lebiedzia-šypuna atrymała tytuł «Karaleŭskaja maneta». Jaje čakanili ŭ Varšavie.
Elektraeksperyment
Biełaruś damoviłasia z uradam Cimašenki raspačać eksperyment pa pastaŭcy elektraenerhii z Ukrainy. Buduć znoŭ zapuščany ŭ dziejańnie linii elektrapieradač, jakija źviazvajuć ČAES z Mazyrom dy Čarnihaŭ z Homielem. Jany stajali biaz pracy z 1989 h. Kali eksperyment budzie ŭdałym, pa hetych linijach Biełaruś zmoža impartavać da 2,5 młrd kilavat-hadzin elektraenerhii ŭ hod. Taksama raspačniecca budaŭnictva jašče adnoj linii elektrapieradač, jakaja źviaža Rovienskuju AES ź Pinskam.
AK, AFN
