Apazycyjny kandydat, navat nie nabraŭšy bolšaści hałasoŭ, u vačach mižnarodnaj supolnaści budzie lehitymniejšym za Łukašenku.
18 krasavika Kanservatyŭna-chryścijanskaja partyja — BNF źviarnułasia da prezydenta z prapanovaj. «Spadar Łukašenka», pavodle mierkavańnia KCHP-BNF, nia maje jurydyčnaha prava balatavacca na treci termin, prapanavana padparadkavacca Zakonu i nia ŭdzielničać u čarhovych prezydenckich vybarach. «My źviartajem Vašu ŭvahu na toje, što ŭ śviatle palityčnych padziej i tendencyj, jakija raźvivajucca va Ŭschodniaj Eŭropie i Paŭnočna-Zachodniaj Azii, admaŭleńnie ad niezakonnaha ŭdziełu ŭ vybarach jość najlepšym varyjantam asabista dla Vas i taksama dla našaj krainy. Vybary prezydenta Biełarusi pavinny adbycca ŭ 2006 h. biaz Vašaha ŭdziełu», — napisana ŭ zvarocie. Jaho padpisaŭ staršynia KCHP-BNF Zianon Paźniak.
Upieršyniu ŭ chodzie pieradvybarnaj kampanii-2006 vyrazna i ŭhołas pastaŭlena pytańnie pra lehitymnaść samoha ŭdziełu ŭ joj Łukašenki. Zachad nie pryznaŭ vynikaŭ referendumu-2004. Biełaruski apazycyjny kandydat, navat i nie nabraŭšy bolšaści hałasoŭ, usio roŭna ŭ vačach mižnarodnaj supolnaści budzie bolš lehitymnym za Łukašenku, jaki «raśpiačataje» svaju druhuju dziesiacihodku na pasadzie.Usprymańnie Łukašenki nie jak aficyjnaha supiernika, a tolki jak niepaźbiežnaj pieraškody na šlachu da pieramohi moža zrabicca stryžniovym punktam pieradvybarnaj kampanii apazycyi.
U hety ž čas na ścienach staličnych damoŭ źjavilisia nievialikija čorna-biełyja nalepki z rezkim tekstam: «Rasiejskaha najmita Łukašenku pad sud za parušeńnie Kanstytucyi, zakonu, za razbureńnie dziaržavy, za karupcyju, za niezakonnaje ŭtrymańnie ŭłady. Chopić ciarpieć ździek! Inicyjatyva «Biełaruskaja salidarnaść». Vidać, u aktyvistaŭ KCHP-BNF małavata spadziavańniaŭ na toje, što Łukašenka prysłuchajecca da ich zvarotu.
