Vijalančel Hvarnery ŭ Horadni
U Horadni znojdziena vijalančel «Śviataja Tereza» raboty pradstaŭnika znakamitaj italjanskaj siamji. Ličyłasia, što vijalančel zhubiłasia ŭ XIX st. Ekspert aŭstryjskaha aŭkcyjonnaha domu Dorotheum Janaš Barbarosa pa fatazdymkach paćvierdziŭ, što vijalančel, jakoj karystaŭsia adzin z udzielnikaŭ haradzienskaha muzyčnaha kalektyvu, naležała Džavani Hvarnery. Na korpusie jość adpaviedny nadpis i hod vyrabu, 1730.
Pomnik Vorliku ŭ Kasucie
27 krasavika ŭ Vialejcy z nahody 295-ch uhodkaŭ ukrainskaj Kanstytucyi (1710) prajšli histaryčnyja čytańni «Vialejskaja ziamla — kałyska aŭtara pieršaj ukrainskaj Kanstytucyi hietmana Pilipa Vorlika». Na čytańniach słuchali dakłady ajčynnych i ŭkrainskich historykaŭ. Ź vitańniem vystupiŭ daradca pasła Ŭkrainy sp.Kazłoŭski. U časie čytańniaŭ paviedamili, što da 2007 h. u Kasucie (Vialejščyna), na Vorlikavaj radzimie, pastaviać pomnik.
Svaje rasstrelvali svaich
U hady Druhoj suśvietnaj vajny 954 tys. savieckich vajskoŭcaŭ byli rasstralanyja svaimi pa abvinavačańni ŭ bajaźlivaści j za roznyja prastupki — zajaviŭ prezydent Mižnarodnaha fondu «Demakratyja», akademik Alaksandar Jakaŭleŭ. Rasstreły byli zvykłaj rečču. «Ja pryjechaŭ na front, a tam kamisar bataljonu instruktuje: kali vy kažacie «ŭ ataku», a jany nie ŭstajuć — vystrali ŭ luboha, zabi — i tut ža padymucca».
A.Rujtel: mianie pavinny zrazumieć
Prezydenty Estonii i Litvy admovilisia jechać na 60-hodździe Pieramohi ŭ Maskvu. Kiraŭnik Estonii Arnold Rujtel u interviju BBC patłumačyŭ pazycyju: «Tak, savieckaja armija vyzvaliła Estoniju ad nacysckaj akupacyi, ale pačałasia novaja akupacyja, nastupstvy jakoj — vielmi trahičnyja dla estonskaha narodu. My stracili kožnaha piataha-šostaha». «Kali rasiejski narod budzie viedać usiu histaryčnuju praŭdu, jon mianie zrazumieje», — miarkuje prezydent krainy. Eŭrakamisar Hiunter Ferhojhien taksama zaklikaŭ Maskvu paprasić prabačeńnia za akupacyju Bałtyi.
Juščanka suprać dvajnych standartaŭ
8 traŭnia padčas sustrečy ŭ Maskvie na samicie SND z prezydentam Biełarusi Viktar Juščanka abmiarkuje incydent z zatrymanymi 26 krasavika ŭ Miensku piaćciu hramadzianami Ŭkrainy. Pra heta jon zajaviŭ u sieradu ŭ Simfieropali. «Ja nie chacieŭ by, kab incydent źmianiŭ našy stasunki z bratnim biełaruskim narodam», — zaznačyŭ V.Juščanka, ale źviarnuŭ uvahu na fakt dvajnych standartaŭ u dačynieńni da zatrymanych hramadzian Rasiei i Ŭkrainy. Tym časam Administracyja biełaruskaha prezydenta zajaviła, što nijakaj sustrečy Juščanki i Łukašenki 8 traŭnia «pakul nie planujecca».
Druhaja likvidacyja «filamataŭ»
4 traŭnia Viarchoŭny sud pryniaŭ rašeńnie ab zakryćci «Tavarystva filamataŭ». Pazoŭ padaŭ Miniust. «Filamatam» pastavili ŭ vinu toje, što letaś i zaletaś jany brali ŭdzieł u mižnarodnych kanferencyjach, pryśviečanych pracesu eŭraintehracyi i perspektyvam Biełarusi ŭ abjadnanaj Eŭropie. Heta vychodzić za miežy histaryčnaj navuki i tamu «supiarečyć statutu arhanizacyi». Pieršych filamataŭ razahnaŭ u 1823 h. car.
Paspračajemsia z Kanadaj
Za prava vychadu ŭ Suśvietnuju hrupu tenisnaha Kubku Devisa supiernikam zbornaj Biełarusi budzie kamanda Kanady. Matčy projduć 23—25 vieraśnia za akijanam. Usie patencyjnyja supierniki biełarusaŭ majuć słavianskija proźviščy: Frenk Dancevič, Endru Piatroŭski, Denieł Niestar, Piter Palanski, Eryk Chvojka, Pjer Dziukło-Ludovič.
Staŭka panižana
Z 5 traŭnia na adzin pracentny punkt paniziłasia staŭka refinansavańnia Nacbanku, da 14% hadavych. Z pačatku hodu heta treciaje panižeńnie staŭki.
AH, SM; proua.com, interfax.by
