«Šalonyja skački» («Racing Stripes»)
Kali vy zhubili svoj cyrk i vychoŭvalisia na fermie, kali vas nie puskajuć da bahatych susiedziaŭ i z vas śmiajucca čystaparodnyja skakuny — tolki tamu, što vy zebra, — u vas usio roŭna jość šaniec vyjhrać skački na ipadromie. Dla hetaha treba być upartym, vučycca, słuchać parady siabroŭ — i mieć dobraje serca.
Zebrania Pałosik, jakoje adstała ad svajho cyrku, znachodzić na fermie Nołana (Brus Hrynvud) luboŭ i łasku dziaŭčynki Čejni (Chiejden Panećjery). U Nołanavaj siamji kaliści adbyłosia niaščaście: maci Čejni zahinuła na skačkach. Paśla hetych padziej fermer, jaki byŭ kaliści vydatnym treneram, adyšoŭ ad konnaha sportu. Ale jahonaja dačka maje maru. Maje maru i zebrania.
Siamiejnaja kinakamedyja belhijca Frederyka Dziu Šo zroblenaja pavodle ŭsich praviłaŭ i z akuratnym vykarystańniem kamputarnych technalohij. Žyvioły ŭ filmie (jak u papiarednich amerykanskich kamedyjach kociki, sabački, śvinki) razmaŭlajuć, demanstrujučy ŭsio bahaćcie čałaviečaje mimiki j daścipnaść (asabliva havarkimi źjaŭlajucca dźvie hnajavyja muchi-reperki, ad jakich dastajecca admoŭnamu hieroju — kaniu-mocartalubu).
Dabro pieramahaje, a kiepskaja ciocia-ipadromščyca, jakaja zmahajecca za čyściniu konskaj kryvi, idzie admyvacca.
Antyrasiscki patas karciny, zroblenaj pry ŭdziele Paŭdniova-Afrykanskaj Respubliki, uvasobleny ŭ formu niasumnaha j prostaha vidovišča.
Siabry Pałosika — kazačnyja charaktary-maski. Mudraja kaza, daśviedčany muł, prydurkavaty pievień-hadzińnik i prybłudny pelikan, hanhster i vychvalaka. Usie jany — i navat muchi-reperki — ščyrujuć na nivie vychavańnia sapraŭdnaha pieramožcy (jakim moža stać kožny, chto maje spahadlivaje j dobraje serca — i volu zmahacca za svaju maru).
Hetaje kino nie chapaje zorak ź nieba; jano sastupaje bliskučamu «Ŭ pošukach Nema», ale film «Šalonyja skački» zrobleny prafesijna, lohka j hodna.
ZŠA—PAR, 2005, kalarovy, 84 chv.
Žanr: kinakamedyja dla ŭsioj siamji
Adznaka: 5 (z 10)
Ciapier čytajuć
«Dyjalekt padazrony». Śpiavak Siaroha pryjšoŭ na rasijskaje realici i sabraŭ usich chejtaraŭ6
Kamientary