U svoj čas Mikałaj nie pastupiŭ vučycca na arnitołaha, ciapier pracuje zvarščykam u vilejskim kaledžy.
Razam z žonkaj Ludmiłaj jon žyvie ŭ pryvatnym domie. Demanstrujučy kalekcyju, jakuju jon źbiraŭ bolš za 40 hadoŭ, Mikałaj akuratna raskłaŭ 4 skrynki z ptušynymi jajkami: ich akazałasia bolš za dźvie sotni, roznych pa kolery i formie.
 |
 |
Usio pačałosia z dapamožnika 1949 vydańnia — «Vyznačalnik ptušak». Budučy vaśmikłaśnik, Mikałaj uziaŭ knihu ŭ školnaj biblijatecy. «U mianie byŭ intares: jak heta žyć i nie viedać, jakija ptuški žyvuć vakoł nas», — kaža surazmoŭca.
Vyvučaŭ ptušak Mikałaj kompleksna: spačatku adroźnivaŭ ptušak pavodle afarboŭki, paźniej — pa hołasie. I pastupova navučyŭsia vyznačać, dzie i jakaja ź ich žyvie. Pieršaje jajka kalekcyi — vierabjinaje.
«Samaje bujnoje jajka — biełaha busła, krychu mienšaje — sierabrystaj čajki. Na astraŭku na vadaschoviščy znajšoŭ, — kaža kalekcyjanier. — Najmienšaje jajka — karalka, samaj maleńkaj ptuški ŭ Biełarusi. Jano važyć usiaho šeść hramaŭ».
 |
Akazvajecca, koler jajka zaležyć ad taho, dzie hniazdujecca ptuška: u duple — biełyja i błakitnyja, na ziamli — strakatyja. Śpiecyjalna pa čarhovy ekzemplar Mikałaj u les nie chadziŭ: čaściej za ŭsio na znachodku arnitołah natykaŭsia, idučy ŭ hryby.
 |
«Adnojčy znajšoŭ u hniaździe malinaŭki ptušaniat ziaziuli, jaje jajki znachodziŭ u kanaplanki. Ziaziuli vybirajuć tych, čyje jajki padobnyja da ichnych pa kolery i formie, a potym padkidvajuć», — adznačyŭ jon.
Nie raz arnitołah naziraŭ, jak ptuški sprytna advodziać voraha ad hniazda, prykidvajučysia paranienymi, a praz 10 mietraŭ rezka ŭźlatajuć.
Za hady šlubu Ludmiła zachapiłasia ptuškami nie mienš za Mikałaja: viedaje ich, a ŭzimku padkormlivaje. Sychodziačy, cikaŭlusia, čyjo jajka chaciełasia b znajści. «Dubanosa, hetaja ptuška pryhožaja, kostački višni dziaŭbie», — adkazaŭ Mikałaj.
Ludmiła nastojliva rekamienduje mužu pakazać kalekcyju ludziam, tolki dzie arhanizavać vystavu, vilejcy pakul nie viedajuć. A dzieciam było b cikava, upeŭnienyja sužency.
