Pavieł Vinahradaŭ: Kali tabie niama 30-ci, to ciabie nichto nie słuchaje 7

Paŭłu Vinahradavu niadaŭna spoŭniłasia 25 hadoŭ. Jubilejnuju datu lidar moładzievaha kryła kampanii «Havary praŭdu» «Źmiena» sustreŭ na «sutkach» i adtul ža z dapamohaj siabroŭ źviarnuŭsia da lidaraŭ staroj apazicyi. Prasiŭ sustreć jaho z Akreścina. Ź dziesiaci paklikanych pryjšli tolki dvoje — Niaklajeŭ i Mackievič. Razmaŭlajem z Paŭłam ab tym, čamu hetak stałasia i što budzie dalej.

Adkul ideja paklikać lidaraŭ apazicyi da Akreścina? Navošta heta ŭvohule?

Pavieł Vinahradaŭ: Jak pa mnie, to ŭsio zrazumieła. Zaŭvažyŭ za apošnija dva hady, što ŭ nas, u palitykaŭ, mała ahulnaha — pamiž kłanami, arhanizacyjami. Va ŭsich niejkaja svaja pryncypovaja pazicyja, i my nie možam damovicca. Mała hetaha, my pierastali navat sustrakać palitviaźniaŭ, «sutačnikaŭ». U mianie skłałasia ŭražańnie, što ŭsim na ich naplavać. Ale raniej salidarnaść była. I ja zachacieŭ pravieryć, ci jość u nas niešta ahulnaje. Pravieryć, ci možam my niešta rabić razam, žyvy pacyjent albo miortvy.

Kali ty vyzvalaŭsia, la izalatara z paklikanych taboj byli tolki Niaklajeŭ i Mackievič…

Pavieł Vinahradaŭ: Tak, heta praŭda. Byli jany. Labiedźka pazvaniŭ mnie, u nas ź im asabistaja damoŭlenaść, jon raniej prychodziŭ. Karač Volha pazvaniła taksama, paprasiła prabačeńnia, što nie zmahła. A inšyja — tak… Ale ničoha strašnaha. Voś zaraz vyjdzie Jaromienak, my iznoŭ rychtujem sustreču, ja iznoŭ rablu sioje-toje, kab danieści svaju pazicyju. Miarkuju, što ŭ mianie niešta, ale atrymajecca. Chacia b bolš ludziej budzie prychodzić sustrakać siadzielcaŭ z Akreścina.

Nu dobra, jany pryjduć. Pryjdzie Milinkievič, Labiedźka, Kalakin. Inšyja. I što dalej? Jość płan?

Pavieł Vinahradaŭ: Jość u mianie chitry płan, raskryć jaki ja pa zrazumiełych pryčynach nie mahu. Skažam tak, zaraz vy bačycie pieršuju jaho častku. Stvareńnie niejkaj ahulnaj placoŭki pierad bramaj turmy, dzie lidary mohuć chacia b sustrakacca, niešta abmiarkoŭvać.

A kali nie pryjduć?

Pavieł Vinahradaŭ:

Tady ŭ mianie zastajecca dva varyjanty: zabić na heta bołt i prapuścić mima, albo inšy — davoli žorstki. U hetym vypadku ja prymušu lidaraŭ pa-inšamu havaryć, kantaktavać pamiž saboj.

Kali nie atrymajecca i heta, to budzie mocny ŭdar pa imidžy apazicyjanieraŭ. Ale ja aptymist. Dumaju, što lidary nie prychodziać, bo vielmi zaniatyja. Ale voś zaraz, kali vyzvalajecca Jaromienak, budzie vychadny (siabra «Maładoha Frontu» Uładź Jaromienak vyzvalajecca 9 traŭnia). Pahladzim.

Lidary apazicyi ŭžo vielmi daŭno na svaich pasadach. Niekatoryja amal stolki ž, kolki Łukašenka na pasadzie prezidenta. Ci ŭźnik u apazicyi kanflikt pakaleńniaŭ?

Pavieł Vinahradaŭ: Niesumnienna. U pryncypie, jon zaŭsiody byŭ. Ale zaraz heta adčuvajecca asabliva vostra. Zaraz vielmi dobra bačna, što partyjny aktyŭ, aktyŭ hramadskich abjadnańniaŭ i arhanizacyj stareje. Maładyja sychodziać z partyj i ruchaŭ, na ich miesca nie prychodzić novaja moładź. Zastajucca tyja, kaho niechta nazyvaje «starymi pierdunami». Voś tak.

Što rabić, kab syšli «staryja pierduny»?

Pavieł Vinahradaŭ:

Nie treba, kab jany sychodzili. Treba, kab jany pracavali. U pryncypie, jany charošyja ludzi ŭ svajoj bolšaści. I pracazdolnyja ŭ asnoŭnym. Prosta voś nie padabajecca mnie, jak jany pracujuć.

Nie viedaju navat, ź jakoj pryčyny.

Što mienavita nie padabajecca? Možaš niešta prapanavać uzamien?

Pavieł Vinahradaŭ:

Viała niejak usio. Treba śmialej. Paŭtarusia, u mianie jość ideja. Chutka miascovyja vybary. Pavinna być ahulnaja pazicyja, niešta adzinaje dla ŭsich.

Niezaležna ad taho, udzielničaje taja albo inšaja siła ŭ vybarach albo nie. Bajkot, nie bajkot — pavinna być ahulnaja pazicyja. U mianie jość što prapanavać lidaram.

Ci vynieśli lidary apazicyi uroki ź leta 2011-ha, kali moładź vyjšła pratestavać bieź ich, faktyčna samaarhanizavałasia praź internet? Apazicyjaniery buduć zdolnyja ŭznačalić novyja pratesty moładzi albo nie?

Pavieł Vinahradaŭ: Nie viedaju dakładna. Mahu skazać, što kali i zrabili vysnovy, to nie ŭsie. Dy i adna sprava zrabić vysnovu, inšaja — pačać niejak varušycca, niešta rabić. Pakul hetaha, ščyra kažučy, nie bačna. Adny starajucca, inšyja — nie. Ja chaču pracavać z tymi, chto starajecca. Pahladzim. Reakcyja na maje zvaroty budzie mocnym indykataram taho, z kim možna havaryć i pracavać, a z kim — nie.

Nastupnyja vybary kiraŭnika Biełarusi ŭžo chutka. U minułaj kampanii ty ŭdzielničaŭ davoli aktyŭna. Zaraz taksama budzieš?

Pavieł Vinahradaŭ:

Ja ŭžo dvojčy sabie abiacaŭ nie ŭdzielničać u palityčnych spravach i dvojčy parušaŭ svaje abiacańni. Ale zaraz ja dumaju, što kampanija 2015 hoda budzie dla mianie apošniaj.

Kali pieramožam — małajcy. Kali prajhrajem — ja tady napeŭna źjedu z krainy.

Niemahčyma zaraz pradkazać, horš budzie prachodzić kampanija albo lepš.

Indykataram stanuć miascovyja vybary. Kali bolšaść apazicyjnych siłaŭ budzie zdolnaja pracavać na ahulnuju stratehiju, nie zvažajučy na svaje ŭłasnyja intaresy, to my majem šansy na haračy 2015 hod.

Kali nie, to ja mocna sumniavajusia, što kampanija 2015 hoda budzie lepšaj za kampaniju 2010-ha.

Ty skazaŭ, što ŭ vypadku parazy źjedzieš. Tak užo zrabiła vielmi šmat ludziej. Jak dumaješ, ci mahčyma z-za miažy vynikova dziejničać? Ci patrebnyja ŭsie hetyja Biełaruskija damy?

Pavieł Vinahradaŭ: Heta zaležyć ad asoby. Ja vielmi dobra razumieju Radzinu, jakaja źjechała i jakaja pracuje. Jak by chto ni staviŭsia da sajta «Chartyja'97», jon usio adno zastajecca samym papularnym — nie viedaju, ci niezaležnym, ale apazicyjnym sajtam. Biełaruskija damy — taksama vydatnaja ideja. Kali ja pryjazdžaju tudy, maju mahčymaść niedzie sustrecca, niedzie papracavać. Pieranačavać u skrajnim vypadku. Nie treba nazyvać ich palityčnymi centrami — heta, chutčej, centry emihracyjnyja.

Ale byvaje i tak, kali źjazdžajuć ludzi i pracujuć tam tolki jazykom.

Heta, naturalna, drenna. Časam padajecca, što lepš by čałaviek maŭčaŭ. Navat kali havoryć pravilnyja rečy — jon robić heta z emihracyi. Šmat chto z takich ludziej nie mieŭ nijakich pryčyn dla adjezdu i dla taho, kab vystaŭlać siabie pakutnikami i achviarami režyma. U Biełarusi ŭsio nie tak drenna. Tut nie 37-y hod.

Ty adnym ź pieršych pačaŭ pravodzić «novyja» akcyi apazicyi, jakija pryciahvajuć uvahu, adroźnivajucca ad tradycyjnych šeściaŭ i mitynhaŭ. Što varta było b źmianić u farmatach Dnia voli, «Čarnobylskaha šlachu»?

Pavieł Vinahradaŭ: Zadača palitykaŭ — padabacca ludziam. Navat nie sabie, a ludziam. Ja liču, što akcyi taksama pavinny padabacca ludziam. Dla mianie važna, ci jość u akcyi pratest. Kali heta prosta niejki Pieršamaj, to heta ŭžo nie cikava.

Voś Dzień voli — jaho pazicyjanujuć jak prosta śviata, Dzień niezaležnaści. Ja liču, što pakul tut Łukašenka, to ŭ hetaj akcyi pavinien być pratest.

Humar abaviazkova pavinien być, niejkaja zabava. Takija rečy, u jakich moža paŭdzielničać luby žadajučy. Voś, naprykład, na Dzień voli ja prapanoŭvaŭ na Banhałory zbudavać śniežny zamak i šturmavać jaho. Voiny viasny zachoplivajuć carstva zimy. Z adpaviednymi ściahami. Takaja viesiałucha, kab ludziam cikava było. Kab žurnalistam było što zdymać. A to nasamreč hladziš, što niama čaho pakazać inšym — niepryhožaja karcinka.

Čamu ideju nie padtrymali?

Pavieł Vinahradaŭ: Tam šmat faktaraŭ. Jana nasamreč była vielmi inavacyjnaj. Była jašče ideja nazvać akcyju «Dniom niavoli». Iści ŭ kajdankach. Albo prosta iści z rukami za śpinoj, jak viaźni. Heta była b fiška, znak pratestu suprać raznastajnych zabaronaŭ. Ale znoŭ ža ideju nie padtrymali. Maŭlaŭ, Dzień voli — heta śviata, i my adznačajem niezaležnaść.

Nakolki ciažka prasoŭvać svaje idei ŭ asiarodku stałych paplečnikaŭ? Jość supraciŭleńnie?

Pavieł Vinahradaŭ: Viadoma. Nie toje kab my ludzi novyja — ja ŭžo siem hadoŭ usim hetym zajmajusia. Ale časam zaŭvažaju, što pakul tabie nie stuknuła 30, ciabie ŭvohule nichto nie słuchaje.

Aleś Pilecki, Jeŭraradyjo

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH