«Hety trafiej pamiežniki vyjavili ŭ mikraaŭtobusie z rasiejskimi numarami, jaki ŭ paniadziełak źjaviŭsia na pamiežnym pierachodzie ŭ 13:30», — raskazaŭ Ryčard Chudy, pres-sakratar Mytnaj Słužby ŭ Olštynie. «U mikraaŭtobusie znachodziłasia 8 pasažyraŭ z bahažom. Škura lažała ŭ adnoj z valizak», — paviedamlaje polska-kaliningrad.ru.
Pavodle papiarednich acenak śpiecyjalista ŭ spravach achovy vymirajučych vidaŭ žyvioł i raślin, heta škura buraha miadźviedzia (Ursus arctos), uniesienaha ŭ dadatak A da zahadu Rady 338/97 u spravach achovy pradstaŭnikoŭ dzikaj fłory i fauny. Vaha škury składaje bolš za 12 kh.
«U fakcie niezakonnaj pieravozki pryznaŭsia adzin z turystaŭ, hramadzianin Rasiei, jaki patłumačyŭ hety tym, što škuru atrymaŭ u Sibiry ŭ jakaści padarunka, i jana źjaŭlajecca jaho ŭłasnaściu, — dadaŭ Ryčard Chudy. — Mužčynu pradjaŭlenaje abvinavačvańnie pavodle artykuła №128 ab achovie pryrody, zhodna ź jakim pahražaje pazbaŭleńnie voli terminam ad 3 miesiacaŭ da 5 hadoŭ».
Pres-sakratar dadaŭ, što handal i pravoz praź miažu raślin i žyvioł, a taksama pradukcyi ź ich, jakija achoŭvajucca Vašynhtonskaj Kanviencyjaj, stroha zabaronieny.
Spadar Chudy taksama adznačyŭ, što škura chutčej za ŭsio zastaniecca ŭ Mytnym viedamstvie jak navučalny invientar. Ale kančatkovy vierdykt abvieścić sud.
