Čym by ni kiravalisia rasiejskija ŭłady, dałučajučy Krym — ciapier nadyšoŭ čas napružvacca biełarusam. Aneksija Kryma — precedent. Usiu prapahandyskuju arhumentacyju, jakoj supravadžałasia dałučeńnie Kryma, my možam vielmi lohka prymieryć i da biełaruskich realij. Kreml, vidavočna, i tak moža ličyć, što maje Biełaruś amal u kišeni: u «rasiejskamoŭnyja» možna zapisać choć 90% nasielnictva, KDB i armija Biełarusi ščylna zaviazanyja na Rasieju. A što samaje prykraje - vidavočna, što Zachad za adyjozny łukašenkaŭski režym zastupacca budzie kudy mienš aktyŭna, čym za Ŭkrainu.
Što ciapier rabić? Adkaz -
treba rychtavacca da abarony, treba infarmavać blizkich i siabroŭ, supraćstajać, najpierš, infarmacyjnaj i idejnaj ahresii.
Byvali i našmat horšyja časy dla biełaruskaj niezaležnaści - ničoha, pieražyli.
Biełarusam treba hurtavacca vakoł biełaruskich symbalaŭ - i Biełaruskaja Narodnaja Respublika, niezaležnaść jakoj my śviatkujem siońnia, biassprečna źjaŭlajecca adnym ź ich.
Adroźnieńnie Biełaruskaj Narodnaj Respubliki ad BSSR, ad jakoj viadzie svoj radavod łukašenkaŭski režym, vidavočnaje:
BNR stvaryli sami biełarusy, a BSSR naviazali Biełarusi balšaviki z uschodu.
Hetaksama balšaviki potym stvarali paralelnyja surahatnyja «raboča-sialanskija» dziaržavy ŭ dziasiatkach inšych krainaŭ, ad Vijetnama da Finlandyi, kab stvaryć nahody dla svajoj vajskovaj ahresii.
Mienavita BNR była pieršaj u sučasnaj historyi ŭłasnabiełaruskaj zajaŭkaj na stvareńnie svajoj suverennaj demakratyčnaj dziaržavy. BSSR hetkaj zajaŭkaj nie była.
Savieckaja ŭłada na Biełarusi była ŭstalavanaja hvałtam vonkavaj inšaziemnaj siłaj — rasiejskaj Čyrvonaj armijaj, dzie nie było biełaruskich atradaŭ i jakaja nie karystałasia padtrymkaj biełaruskaha nasielnictva. Saviecki peryjad u historyi Biełarusi - heta adnaznačna peryjad zamiežnaj, savieckaj akupacyi Biełarusi, jakaja praciahvała kalečyć i niaviečyć biełaruskaje hramadztva, vyniščać biełaruskuju moŭnuju i kulturnuju samabytnaść, zabivać nazhodnych z hetym ludziej. Usie biełaruskija nacyjanalnyja dasiahnieńni savieckaha času adbylisia nie dziakujučy kamunistam - a nasupierak im, vyklučna praz toje, što biełarusy prymusili balšavikoŭ ličycca z svaimi intaresami.
Stvareńnie BNR - heta podźvih. Biełaruskaja respublika źjaviłasia ŭ našmat mieniej spryjalnych umovach, čym niezaležnyja dziaržavy ŭ Bałtyi, na Paŭdniovym Kaŭkazie abo va Ŭkrainie.
Biełaruski ruch byŭ vymušany dziejničać va ŭmovach prysutnaści na terytoryi Biełarusi niamieckich, polskich, balšavisckich vajskovych farmavańniaŭ, adnolkava varožych da idei biełaruskaha suvereniteta i samakiravańnia. Ale sam akt stvareńnia niezaležnaj biełaruskaj dziaržavy byŭ najvažnym žestam, byŭ jak padniaćcie svajho ściaha nad svajoj krainaj: samaarhanizavanaje miascovaje nasielnictva maje prava i maje volu samastojna vyznačać svajo ŭłasnaje žyćcio. I
historyja pakazała, što z hetaj deklaracyjaj usie nastupnyja akupanty byli vymušanyja ličycca.
Mienavita pačynajučy z abviaščeńnia Biełaruskaj Narodnaj Respubliki Biełaruś nieparyŭna isnuje ŭ jakaści adzinki na sučasnaj palityčnaj mapie Eŭropy: jak BNR, jak SSRB/BSSR, jak Respublika Biełaruś. Kali b nie było taho žesta ŭ vyhladzie abviaščeńnia biełarusami BNR, kali b šmathadovaj papiaredniaj i nastupnaj paśla hetaha baraćboj, u tym liku ŭzbrojenaj, biełarusy nie dakazali susiedziam svajo prava na nacyjanalnuju dziaržavu - nas by praihnaravali i my byli b ciapier albo peryferyjnymi kresovymi palakami, albo peryferyjnymi zachodnimi rasiejcami.
Stvareńnie BNR stała momantam jakasnaha skačka biełarusaŭ ad prosta etnahrafičnaj supolnaści da dziaržaŭnaj nacyi.
Dziakujučy BNR Biełaruś maje prava razhladać siabie jak centar svajho ŭłasnaha «śvietaparadku», maje prava na ŭłasnaje bačańnie ŭłasnaj historyi i svajho miesca ŭ budučym śviecie. My skazali pieršaje słova, i apošniaje słova taksama budzie za nami. Biełaruski narod abvieściŭ svaju niezaležnaść, i hetaje abvieščańnie zastajecca ŭ sile niahledziačy ni na što, ni na jakuju savieckuju ci hitleraŭskuju akupacyju, ni na jaki nihilistyčny biazrodny łukašenkaŭski režym.
I toje, što Biełaruskaja respubłka 1918 hoda zastałasia ŭ pieršuju čarhu prajektam, nie pavinna nas zasmučać: značycca,
hety prajekt my jašče majem realizavać. BNR - heta vobraz inšaj, budučaj Biełarusi, jakuju my majem pabudavać zamiest siońniašniaj karumpavanaj izalavanaj tyranii.
Vobraz biełaruskaj, demakratyčnaj i cyvilizavanaj Biełarusi, družnaj z usimi eŭrapiejskimi krainami, pryjaznaj da pravoŭ i da hodnaści kožnaha čałavieka.
Sa śviatam!
