Najbližejšymi dniami mižviedamasnaja rabočaja hrupa pa pytańniach APK pad kiraŭnictvam premjer-ministra Michaiła Miaśnikoviča vykaža svaje prapanovy pa raźvićci ahrapramysłovaha kompleksu Biełarusi. Ab hetym kiraŭnik urada paviedamiŭ žurnalistam 10 maja padčas naviedvańnia ŭ Minsku haścinicy «Biełaruś».
«Na nastupnym tydni buduć razhladacca padychody pa farmiravańni prahnozu sacyjalna-ekanamičnaha raźvićcia i prahramy na nastupnuju piacihodku, tamu my budziem vynosić davoli śmiełyja rašeńni pa raźvićci narodna-haspadarčaha kompleksu krainy», — skazaŭ Miaśnikovič.
Pavodle słoŭ premjera, najpierš prapanovy buduć datyčycca azdaraŭleńnia hrašova-kredytnaj palityki. U pryvatnaści, miery, jakija prapanoŭvaje rabočaja hrupa, dazvolać źnizić staŭki pa kredytach dla sielhasarhanizacyj. «Jość uskosny miechanizm, heta nie pramaja suviaź pamiž koštam kredytu i depazitu. Tut dziaržava maje namier udzielničać jak aktyŭny, budziem tak kazać, hulec na finansavym rynku», — adznačyŭ kiraŭnik urada.
Padrabiazna padrychtavanyja mižviedamasnaj rabočaj hrupaj prajekty narmatyŭnych pravavych aktaŭ pa pytańniach raźvićcia APK, pavyšeńnia dyscypliny i adkaznaści kadraŭ buduć abmiarkoŭvacca z 12 pa 17 maja ŭ rehijonach z udziełam kiraŭnikoŭ haspadarak, rajonaŭ i abłvykankamaŭ. Udzieł u naradach voźmie ŭ tym liku i Michaił Miaśnikovič.
«My budziem jašče raz davodzić patrabavańni ŭžo pa novaj ekanamičnaj palitycy ahrarnaha kompleksu, pytańni adkaznaści kadraŭ za nievykanańnie technałohij, arhanizavanaści, dyscypliny, — skazaŭ kiraŭnik urada. — My na hetym zatračvajem kala 1,5 młrd. vyručki, tamu treba, biezumoŭna, bierahčy kožnuju kapiejku».
