 Džordž Buš |
Prezident ZŠA Džordž Buš vykazaŭ spačuvańni Alaksandru Kazulinu i jaho dočkam Volzie i Julii ŭ suviazi sa śmierciu Iryny Kazulinaj. Pra heta havorycca ŭ zajavie, raspaŭsiudžanaj 25 lutaha pres‑słužbaj Biełaha doma.
«Iryna Kazulina była niastomnym abaroncam svabody ŭ Biełarusi. Jaje budzie nie chapać», — padkreślivajecca ŭ zajavie.
ZŠA taksama asudzili admovu biełaruskich uładaŭ vypuścić A.Kazulina ŭ dni pierad śmierciu I.Kazulinaj i zapatrabavali nieadkładna vyzvalić apazicyjnaha palityka sa źniavoleńnia.
«ZŠA asudžajuć admovu biełaruskaha režymu vyzvalić palityčnaha źniavolenaha Alaksandra Kazulina ŭ dni, jakija papiaredničali śmierci jaho žonki, što vyklikała nierazumieńnie, a taksama adrazu paśla jaje śmierci 23 lutaha. My znoŭ paŭtarajem naša patrabavańnie ab nieadkładnym i biezahavoračnom vyzvaleńni Kazulina», — havorycca ŭ zajavie.
U joj taksama zaznačajecca, što «z‑za jaho niespraviadlivaha źniavoleńnia A.Kazulin nie zmoh dałučycca da inšych lideraŭ abjadnanaj demakratyčnaj apazicyi Biełarusi, kali jany sustrakalisia z prezidentam Bušam u Avalnym kabiniecie Biełaha doma 6 śniežnia 2007 hoda».
Nahadajem, A.Kazulin byŭ zatrymany ŭ sakaviku 2006 hoda za arhanizacyju šerahu akcyj pratestu paśla prezidenckich vybaraŭ. Sud pryznaŭ jaho vinavatym u chulihanstvie i arhanizacyi masavych biesparadkaŭ i asudziŭ da 5,5 hoda pazbaŭleńnia voli ŭ kałonii strohaha režymu.
I.Kazulina pamierła viečaram 23 lutaha ad ankałahičnaha zachvorvańnia. Adnak pytańnie ab karotkaterminovym vodpusku jaje mužu ŭ suviazi z pachavańniem było vyrašana tolki praz troje sutak paśla jaje śmierci. Kala 1 hadziny nočy 26 lutaha A.Kazulina pryvioz dadomu ŭ Minsk načalnik kałonii «Vićba‑3» Vital Ahniścikaŭ.
Hramadzianskaja panichida pa Irynie Kazulinaj pačniecca 26 lutaha ŭ 20.00 u Čyrvonym kaściole Minska. Pachavańnie adbudziecca ŭ sieradu, 27 lutaha.
